Israel jonibo Moiséssen jakon shinanxona
33
Jawen mawáti ochómashoko iketianra, Diossen joni Moiséssen israelitabo jakon shinanxonkin,2 neskara joibo jato yoia iki:
“Sinaí mananmameaxa Ibo joai;
Seir ikainxonra jawen joekan noa tenake.
Parán mananbo ikainxonbi tenaara,
Meriba-cades kaman jawen pené nokota iki;
noa noixonra jawen mekayaokea mekenman chiibires esé noa bexonai.
3 Ibonra jawen jonibo noike,
jawenabiribi iti shinanabora jakonmanin anaketian jato panai,
jabaonra jatíbitian yoiti ixonai,
keenshamankinra jawen joi senenhaxonkanai.
4 Moiséssen noa Diossen esé meniara,
noa Jacobnin jonibaona kikin jakonshaman iká iki,
5 jatianra ja jemamea joni koshibo tsinkixon,
itan ja Israel meskó jonibo tsinkitabaon,
Israelitabaon apora Jesurúnhain, Diosbi iki ixon jabaon onanna iki”, akin.
6 Rubén yoiira neskata iki:
“¡Rubénra jatíbitian jaresti iki!
¡Ichama jawen jonibo ikaxbira mawákantima iki!” iki.
7 Judá yoiira neskata iki:
“Judakan yokatara, Ibon ninkatai;
jawen jonibo tsinkitainkora jato betan ikai.
Min koshi shinanman jato akinwe;
jaton rawíbo jatonhareskanon jato akinwe”, iki.
8 Leví yoiira neskata iki:
“Ibo, Tumim itan Urim, jan min shinan onanti makan paróyashokobora mina iki;
nato minabora, ja min joi akin senenhai jonibaonaribi iki.
Jara Masahainxon min tanakaama iki,
Meribá onpax ikainoaxa mibé join iká iki,
9 Diossen jato reteti yoia kopíra ikana iki:
‘Jawetianbira non papabo non oinnama iki, iki jaton papabo yoii’,
‘non wetsabora non onanyamake iki, jaton wetsabo yoii ikana iki’,
jabora tsoabobira iki, ‘nonra onanyamake iki jaton bakebo yoii ikana iki’.
Jato yoii jaskataibora min joi senenhaibo iki,
min jato betan ja senenhabekonti aká joira akonkin senenhakanai.
10 Jacob, ja Israel jonibora ja senenhati esébo itan ja koshi joibo maton jato onanmai;
mia axonkin jawékibo menoti, makan tsamanainkora ininti betan yoinabo mia menikin tsamankanai.
11 Mia axonkin akana riki, jato jakonhakin shinanxonwe, Ibó,
kenshamaanan jaton tee bixonwe”, iki.
12 Jatian Benjamín yoiira neskata iki:
“Jara Ibon noia ikax jawe iamai jakon jake;
Jatíbitianra koshi Ibon koirannai,
¡Jara ani Ibon panaa jati iki!” iki.
13 José yoiira neskata iki:
“Ibonra jawen mai jakonhakin shinanxonti iki;
naikanmea kikin jakon nibíra jawen main maanhaxonti iki,
jawen mai chichóbobira kikin jakon onpax imaxonti iki,
14 kikin jakonhakin yoá tsekati baritiara imaxonti iki,
jainxonribira kikin jakon bimibo tsekati oxebo imaxonti iki,
15 moatian manan keyábo ikain,
jatíbitian mai matóbo ikainkobo banaxon kikin jakon yoabo tsekatira imaxonti iki,
16 kikin jakon bimibo bochora jawen mai imaxonti iki,
ja zarza jiwishokonko iní Diossen jakon shinanyara jatíbitian iti iki.
Jatíbi nato jakon jawékibo Joséki bebánon,
jara jawenashaman iti jawen wetsabo xaranmea Diossen katota iká iki.
17 Joséra reken torón bakea keská metsá iki,
búfalo waka keská koshi riki,
jatíbi jemabora jawen machaman mai senenainko kamánbi jato chirinboti iki.
Efraínman icha jonibora jaskara koshi iki;
Manaséssen warankabires joniboribira jaskara koshi iki”, iki.
18 Zabulón betan Isacar yoiira neskata iki:
“Wetsankobo kawaantanti ikax, rarowe Zabulón,
jatian mia Isacar, ja min carpa xoboshokotonin ikáx rarowe.
19 Jato iká mananman bekanon ixonra jato patax iká jemabo kenakanti iki,
jatianra jatíxonbi Dios menikin, jainxon jawékibo menokanti iki;
aniparomea jakon jawékibo biax, itan aniparo mashimeax kikin kopí joné jawékibo biaxa rarokana iki”, iki.
20 Gad yoiira neskata iki:
“¡Jan mia ani maibo menia Dios, jakon ibanon!
Gadra, león awin yoina biax pokón rakáxon, jawen ponyanbo itan jawen mapo jaxkapakeai keská iki.
21 Gadra kikin jakon maia baneta iki,
joni koshibaona iti keskáshaman riki.
Jonibo bebonxonra ja ati Ibon yoia senenhaa iki,
Israelbora ja atikeskabiakin jakonhakin jato ikinna iki”, iki.
22 Dan yoiira neskata iki:
“Danra koshi iki, jainoaxa ino bake ranon keská siná iki”, iki.
23 Neftalí yoiira neskata iki:
“Neftalíra Ibon oinna jakon iki,
jaskara iketianra ichabires akin Ibon jakonhati iki,
¡Ja surhorikea mai jain senenayabira ian iboake!” iki.
24 Aser yoiira neskata iki:
“Jatíribi Jacobnin bakebo akai bebonbires akin,
Aser Diossen jakonhakin shinanxonbanon,
jainxon jawen wetsabo kikinhakin noimabanon.
Jawen taenkobobi serotiakin icha xeni menibanon;
25 min xepotibo ibanon yami tonron akábo itan bronce tonron akábo, ikax kikin koshibo,
mia jaai kaman kikin koshi mia imabanon.
26 Israelitabaon Diossa tsobébi senenma ani iki,
jara nai koin pekaten iká apo iki,
jaskara ixonra jatíbitian mia akinti iki.
27 Jatíbitianbires jaa Dios iki onsá jakonmanin anaketian jain mia jonéti,
jawen jatíbitianbires koshinra mia akinnai;
min rawíbora mii bebomea jato jabamaa iki, jainxonra jato keyoti mia yoia iki.
28 Israelra moa jawe jakonmabi shinanyamai jati iki,
jawen chiní bakebora tantitishaman shinanyares jakanti iki.
Jawen maibaonra icha trigo wai jati iki,
jainoaxa icha uva waiboribi jati iki,
jaskara ikaxa jawetianbi naikameax oi bei jenetima iki.
29 Israel, miara jakon iki,
¿Tsoaki mia keskaribi ikax mibé senenti iki?
Ibonbira mia xabaa iki;
janra mia koiranti iki, jainxonra mia akinti iki,
¡Ibo riki min jan jatoaresti, min koshi espada keská!
Min rawibo min jatoaresara mii naman ikanti iki,
jaskáaxonra jaton rabí shinanbo min jato keyonaanti iki”, iki.