32
“Ea yoyo ikai, ninkawe, naiorikeabó,nokon joibo ninkawe, mainmeabó.
2 Ja en jato axeakai joira oi maannai keská jakon iti iki,
ea yoyo ikára nibí maanna keská jakon iti iki,
xobiki onpax shorotai keská jakonra iti iki.
3 Ibon jane ninkakaatiakinra en yoiti iki:
¡Onankanwe non Diossa kikin iki!
4 Dios iki noa jakonmanin anaketian noa koirannai;
jawen tee akábora senen iki,
jawen aká jawékibora atikeskabiakin akábo iki.
Jara ikon Dios iki,
janra jaskara atima aká yamake;
¡Jara atikeskabiakin akai iki, itan ikonkon iki!
5 Matora jakonmabires iki, itan jakonmabires shinanya jonibo iki,
matora jakonmai yoyo ixon Dios sinámaabo iki,
jakonmabo ikaxa mato jawen bake iti jisámabo iki:
6 ¿Jaskaratonki akai maton Ibo kopíakin?
Matora shinanhoma jonibo, itan jaskáaxon jakon ati onanma jonibo iki,
¡Janra mato jonia iki, jainxonra westíora jema keyótima mato imaa iki!
7 Pekáori naiskanwe, moatian mato winotabo shinankanwe;
jan mato yoinon maton papabo yokákanwe,
jaskara winotabo mato yoinon ixon yosiboribi yokákanwe:
8 Westíoraakinra jemabotiibi, itan maibotiibi naikanmea koshi Diossen, jonibo janbisaa iki,
jaskáaxonra jain senenbo iboakanti jato mai menipakea iki.
Ikaxbi mato israelitabobiribi jakonhiraakin aká iki,
9 mato jonibora jawenashamanbiribi iti Ibon mato katotabo iki,
janwena iti katóxon biara Jacob iki.
10 Jawebi jain xoxoyamai mananmameara mato nokoa iki,
ja niwen aabichoa, mai manxana ikáinoa;
matora ikota iki, jaskara itira mato onanmaa iki,
jawen bero wiso akai keskaakinra mato koirana iki.
11 Tetekan jawen bake beshébo noyati onanmakin,
jawen naakamea pakea, ketó meran kaaitian jawen pechín biai keskáakin bixonra,
mato Ibon koirana iki.
12 Tsonbi akáma, Ibonbira jato boa iki;
¡Wetsa onankanama diossen akintira maxkáyamaa iki!
13 Jawenbi chitetimaakinra ja mainmea manan keyakan jato boa iki,
niimeranoa bimira jato jawékiamaa iki, shankankonia bona jenera jato xeamaa iki,
makan chorishainoara jato xeni menia iki;
14 jaton wakankoniabo biaxa leche itan leche seróya ikana iki,
jainxonra kikin jakon carnerobo pikana iki,
ja carnero benebo betan cabra benebora Basánhinoa iká iki;
kikin jakon trigo bimibora pikana iki,
jainxonra kikin jakon uva jene xeakana iki.
15 Jawékinin bebonaxbira israelitabo Diossen shinanbenokana iki,
(onantibires kikinbires xoabora ikana iki). Jan jato jonia Diossa jenekana iki;
jakonmanin anaketian panaxon jato xabaa ikenbira, omiskana iki.
16 Ja rabitima kerás jawékibo rabixonra, Diossen washí shinan kepenxon sinámakana iki;
17 yoshinbo axonkinra yoinabo retekana iki,
ja jawetianbi onankanama diosbo;
jawetianbi jaton papabaon rabiosma, bená diosbora iká iki ramabi jatoki nokota.
18 Jakomanin anaketian mia jan panaa min papanra mia shinanbenota iki, Israel;
ja mia jati menia Dioskira mia shinanbenota iki.
19 Jaskara oinnaxa Dios sinata iki, jatianra jawen benbo bakebo itan jawen ainbo bakebaon moa keenyamaa iki;
20 jaskáxonra jato yoia iki: ‘Enra moa mato jeneai, ¡Oinkanwe jawekeskarainki mato nokotai ixon!
Matora ikonshaman jakonma jonibo iki, matora jaki koshitima bakebo iki.
21 Maton iresa dioskira en mato washita iki,
jatianra maton ea jaki washinon ixon,
¡Wetsabo en nokon jonibo imati iki!
maton jakonma diosbaonra ea sinámaa iki.
22 Nokon siná ketetara chii keská iki, jatianra ja mai xanken neminhainbobi ja tirí nokoti iki;
mai itan jain banaa bimibora en keyoti iki,
manan chankata tasenenainbora en chii tirímati iki.
23 Jatíbi jakonmabora en jatoki tsamanti iki, jatíbi nokon piara en jatoki potati iki;
24 jawékiatinin itan yonakanra mawákanti iki; keyomis isin chexakaatininra en jato keyoti iki;
pimis yoinabo itan retemis ronobora en jatoki raanti iki.
25 Callemeara reteanankin jaton bakebo retekanti iki,
jatianra jaton xobomeax kikini rakékanti iki;
bake ranonbo, bake xontakobo, yosibo itan bake xoma akaibora mawákanti iki.
26 Wetsankobo jato janbisatira en shinanna iki,
tsonbi shinantimaakin nato mainmea jato keyotiribira en shinanna iki,
27 jaskara ati ixonbira ja rawibo shiroai en teneti atipanyamaa iki;
nokon rawíbo rabítininra ea keenyamaa iki, jainoaxa neskati yoyo ikantinin ea keenyamaa iki: Natora Ibon akáma iki; non koshinbi non aká riki, iki ikantininra ea keenyamai’.
28 Israel jonibo riki moa jaton jakon shinan keyotabo; ¡Jaton jaskáaxon jawéki ati onan shinanra yamake!
29 Onan shinanya ixonra, jaskara jakonmain paketi kaai onankeankana iki.
30 ¿Jawekopíki westíora jonin waranka israelita jato jabámaa iki?
Jainoax ¿Jawekopíki rabé jonin chonka waranka israelitabo jato jabámaa iki?
¡Jato koiranna Ibon, jaton rawibaon jato abanon ixon jato menia kopíra iká iki!
31 Jaton diossa koshima iki ixonra non rawíbaon onanke,
jara non koshi Ibo betan senenti atipanyamake.
32 Jabora jakonma uva jiwi waí keskábo iki,
Sodoma betan Gomorra iníbaon chiní bakebo riki,
jabora moka itan jan mawáti uva keskábo iki;
33 jaton uvara jan mawáti rao keskábo iki, ¡Jan mawáti ronon moka keská riki!
34 ‘Nato jatíbira en jain imaresapari iki; kopí jawéki akai keskáakin en benxoa riki,
35 jatian jato masá tenemati nokotai en manaaresiki, ja en jato masá tenemai netera,
ja atikeskabiakin kikinhakin en jato masá tenemati iki.
Jaton keyóti netera moa ochóma iki, ¡Jaton jatian itira moa jatoki nokotibi iki!’
36 Jaton koshi maxkata oinnaxa, Ibo jawen jonibaon paranan ikin jato akinni pikóti iki;
moa jaton koshi keyóketianra noibaxon Ibon jawen yonotibo jato akinti iki.
37 Jatianra israelitabo yokáti iki: ‘¿Jan koirankin panaa, mato jaki koshikatitai maton diosboki jawerano iki,
38 ja maton yoina retexona jawen xeni pikatiaibo, itan maton uva xeati menia xeakatitaiboki jawerano iki?
¡Mato akinni bebákanon! ¡Mato akanaketian mato panai bebákanon!
39 Eabicho riki Dios; epekáora wetsa diosbo yamake.
Ea riki jato jati nete meniai, earibi riki jato jati bichinai;
eabicho riki jan payóbo raonai.
¡Nokon koshin jato akára tsoabi kenekaati yamake!
40 Enra nokon meken naiori sananai,
jaskáaxonra en akonkin yoia, nokon jati nete jatíbitian iki,
41 nokon pené espada kenshoxonra, jakonma akana iketian, atikeskabiakin nokon rawibo en kopíti iki.
¡Ea omisaibora jato kopikin en akonbireskin masá tenemati iki!
42 ¡Ja mawatabo betan ja rawí yatankanabaon jiminra, nokon piabo en pokoti iki!
¡Jaton joni koshibaon boo nenkeyabira jaton mapo en xateti iki!
Nokon espadaninra jato keyoti iki’.
43 ¡Jato patax iká jemabo, ja Diossen jonibo betan rarokanwe!
¡Jawen yonotibo reteabora jato kopíxonti iki, jawen rawíbo jato kopixonra, jawen mainmeabo itan jawen jonibo jaton jakonma akábo shinanxonyamakin oinresti iki!” akin.
Senentiainbi jato Moiséssen yoia
44 Moisés betan Nunman bake Josuéra jatíbi Israel jonibo bebon iká iki,
peokootiainxonbi axon ja senenain kamanra nato bewá jato yoia iki.
45 Jatian moa jato joi yoikin senenhaxonra,
46 ja israelitabo yoia iki: “Rama en mato yoia kikinhakin shinankanwe, maton bakebo yoikanwe jatíbi nato esé akonkin senenhai axekanon.
47 Iresa joi riki ixonra maton shinantima iki; natora jan mato jamati esé iki, ja esé kopíra Jordán paro keibakea main basibires mato jati iki, ja maira iboakin maton biti iki”, akin.
Ja bikanti mai Diossen Moisés oinmaa
48 Ja netenbira Moisés Ibon yoia iki:
49 “Jericó bekeiba moabitabaon mainko iká Abarim mananbo ikainko ja Nebo mananman mapétanwe, jainxonbira ja Canaán mai min ointi iki, jara iboakanon ixon israelitabo en jato meniai.
50 Ja Hor mananman mapetaxa mia mawati kaai, min anibo iní keskaribiira mia miinmeeti kaai, Hor manameax mawatax min wetsa Aarón iká keskáribiira mia minmeeti kaai.
51 Mato rabéra israelitabo bebonmeax eki yoitimaa iki, jain jawebi xoxoyamai Zin mananhin, Meriba-cades onpax ikain mato inontianra, en yoia senenhayamakin israelitabo bebonxon maton ea jakon ninkakamayamaa iki.
52 Jaskara iketianra, israelitabo en jato meniai mai min ochóxonres ointi iki, ikaxbira mia jain jikitima iki”, akin.