2 “Eara pacha rabé chonka baritiaya iki, jaskara ikaxa ea wetsanko kawanhatanti nokon koshi moa yamake. Jaskábichopananra, ea Ibon yoike, en Jordán shitayamai.

3 Ikaxbira mato kaai bebon maton Ibo Dios kati iki, jatianra mato kaai betan senenribi kakin jainoa jonibo jato keyoboti iki, jaton mai maton binon ixonra jaskáati iki. Ibon jaskati yoia iketianra, maton koshi ikax Josué mato bebon kati iki.

4 Sehón betan Og, amorreobaon apobo aní keskaribiakinra Ibon nato jonibo jato ati iki, jabora jaton jemaboyabi jato keyoa iki.

5 Jatian Ibon amaa ja jonibo jatoaresxonra, jatíbi ja en jaskaati yoia keská maton jato ati iki.

6 Matonra koshiakin shinanti iki; jato betan reteanani, ratéyamai itan rakéyamanoxikanwe, maton Ibo Diossa mato betan iki, matora potatima iki, matora jenebaintima iki”, akin.

7 Japekáora Moiséssen Josué kenaxon jatíbi Israelbo bebonxon yoia iki: “Koshiakin shinankin jeneyamawe, akonkin jato meniti ixon Ibon maton reken papabo yoini mainkora, nato jonibo min jato boti jake, mia riki ja iboakin bikanon ixon jan jato mai meniti.

8 Ja Ibobira mii bebon kati iki, jatianra miibetan iti iki, miara potatima iki, miara ochóatima iki, jaskara iketian rakéyamawe, jainoaxibi shinan yosmayamawe”, akin.

9 Nato eséra Moiséssen wishaa iki, jaskáaxonra ja senenhabekonti joi jain iká Ibon ani bonanti jan boai sacerdote Levitabo, itan jatíbi Israel joni koshibo jato menia iki,

10 jaskáaxon jato yoia iki: “Kanchis baritia senenatiibi, ja ribinbo moa jato shinanxontima baritia iketian, ja Peotabaon fiesta atitianra,

11 jain ikanti Ibon katotainko jatíbi israelitabo tsinkitax jaton Ibo Dios bebon ikanaitian, jatíbi jabo bebonxon nato esé maton yoyo ati iki.

12 Jatíbi jonibora tsinkíti iki, benboboyabi ainbobo, bakebo itan ja maton jemanko jaa wetsankonia jonibo, ja esé yoyo akai ninkánox, jaskatax ja maton Ibo Dioski yoiti iti onankanti kopí, itan jatíbi ja esekan yoiaibo aki axenox.

13 Jatianra maton bakebaon ja esé onanama ixonbi, jabaonribi ninkákanti iki, jatianra maton Ibo Dios yoiti ixoni axeax, Jordán shitabainxon mai biax jain jaai kaman, jatíbitian jaskati mato jati iki”, akin.

14 Jainxonra Ibon Moisés yoia iki: “Oinwe, mia jatian mawátira moa nokotai; jaskara iketian Josué kenawe, mato rabébira jainoax Nokoananti Carpa Xobonko mato kati iki, jaskara atibo en mato yoinon”, akin. Jatianra Moisés betan Josué jainoax Nokoananti Carpa Xobonko kaa iki,

15 jainxon nai koin meranxon Ibon jato oinmaa iki, ja iká iki ja xobo xepikoti manaon pania.

16 Jatianra Ibon Moisés yoia iki: “Basimara moa mia mawatai, jatianra nato jonibo moa yoitimaax, wetsa mainmea jonibo nato main jakanabaon diosbo ikonhax, masákanti iki; jatianra ea jenekanti iki, ja senenhabekonti joi en jato betan akára ras akanti.

17 Jaskákanketianra ea jatoki sináti iki, jaskáxonra jatobicho inon ixon en jato jeneti iki, jawekeskaxonbira en jato koirantima iki, jatokira ichabires jakonma masá tenetibo beti iki, moa jaskarabo ionaxparira neskákanti iki: ‘¿Non Dios moa nobetama iketianmarin nato jakonmabaon noa masá tenemai?’ ikibo.

18 Jaskara kopí riki noa neskatai ixon onankankebira, jatíbi jakonma axon, wetsa diosbo rabikana kopí, jatoibakeax ea bebonbires ochó iti iki.

19 Jaskara iketian, nato bewá wishakanwe, jaskáaxon israelitabo axeakanwe, ja bewakanon ixon, jara jaskara akanon ixon onantiakin en moa jato yoia ikax, ja en jato yoixonti iti iki.

20 Maton reken papabo akonkin jato meniti ixon en jato yoini maira, jain jatíbitian icha jawékiati já iki, jain en jato jikimaara potóakin piax xoákanti iki, jatianra ea potabainxon wetsa diosbo chibanxon, rabikanti iki, eara moa jawemabi shinankanti iki, jaskaaxonra ja senenhabekonti joi en jato betan aká sekekanti iki.

21 Icha jakonmabo itan masá tenetibo jatoki nokoketian, jan jato shinanmatira nato bewá iti iki, jaskara ikanti en jato yoira ikon iká iki ixonra, jaton bakebo bewaitian shinankanti iki, jatianra bewakanti iki; jato meniti en yoia mainko jato jikimaamatianbira, jao bokanti jaton shinan en moa onanna iki”, akin.

22 Ja netebira Moiséssen ja bewá wishaa iki, jaskáaxonra ja axekanti israelitabo jato yoia iki.

23 Ja Josué, Nunman bakera, Ibon jaskara anon ixon neskaakin yoia iki: “Koshiakin shinanwe, en jato meniti yoini mainko jan israelitabo jikimatira mia iki, jaskara iketianra ea miibetan ikai”, akin.

24 Jatianra Moiséssen ja nato esébo westíora kirikanin wishakin keyoxon,

25 ja Ibon jato betan ja senenhabekonti aká joi jain iká ani bonanti boai Levitabo yoia iki:

26 “Nato esé kirika bixon, ja maton Ibo Diossen jato betan ja senenhabekonti aká joi jain iká ani bonanti patax akanwe, ibanon jain ixon maton jakonma akábo jan mato yoixonti.

27 Enra kikinhakin, onanke mato riki yoitima itan maton keena keskáres akai jonibo; jatian rama, mato xaran jiriapari ea ikenbi, mato Iboki yoitimake, ¿Jawe ibiraibetin ea mawata pekáo, mato ibiresi?

28 Jemamea joni koshibo betan, ja jonibobires ikax ja tsamábaon joni koshibo neno jato tsinkiwe, nato jawékibo onantiakin en jato yoinon, noara yoiama iki ikantima kopira, ja en jato yoia nai itan mai maton onanakeská ikon iki.

29 Enra moa onanke ea mawata pekáora yoitimakanti iki, jatianra ja anon ixon en jato axeabo akin jenekanti iki; jainxonribira en onanke ichabires rabintibora jatoki joti iki, Ibo bebonxon jakonma axon, sinámakana kopi”, akin.

30 Jatianra israelitabo tsinkita bebomeax, nato bewá peokootainoaxbi senenain kaman Moisés bewaa iki: