2 ja rama en yoia keskati, jatíbi maton shinanyanixbi itan jatíbi maton kayayanixbi, mato itan maton bakebo, Iboki banetax mato yoiti iti iki,

3 jatianra maton Ibo Diossen jakon imaribinoxon mato noibati iki. Jain mato potani mainkoniabora, jakiribi mato tsinkiti iki,

4 matoki jakonmaakin wetrsanko kikin ochó bokana mato janbisa ikenbira, maton Ibo Diossen jainoa mato beti iki, mato benaira jainkamanbi kati iki.

5 Ibonra ja maton rekenbo ikátiai mainko, jakiribi mato banémati iki, jatianra jain jakiribi mato jati iki; matora bebonmati iki, jainxonra ja maton rekenbo aní bebonbires mato icha bakeamati iki.

6 Maton jointiain, itan maton chiní bakebaon jointiainra, onanti itiakin ja senenhabekonti joi jain ati iki, jatíbi maton jointiaxonbi itan jatíbi maton kayayaxonbi noiax, mato basi janon ixon.

7 Maton Ibo Diossenra jatíbi nato jakonma jawékibo, maton rawiboki maanti iki, jainxonra omiskin mato jakonma anoxon mato chibanaiboki, ja jakonmabo maanhati iki,

8 jatianra matobiribi Iboki banetax, jaki yoiti mato iti iki, jatianra ja maton anon ixon rama en mato yoia ja senenhati joibo senenhai mato axeti iki.

9 Jatianra Ibon, jatíbi jawéki maton akaibo mato bebonmaxonti iki, matora icha bakeya imati iki, maton yoinabora icha bakeamati iki, jainxonra yoabo benbonbires bimimaketian maton ichabires tsekati iki, mato jakonhaira maton Ibo Dios jakiribi raroshaman iti iki, ja maton rekenbo jakonhai moatian rarokatitai keskati,

10 yoiti ixonkin ja maton Ibo Diossen koshi joibo, jawen esébo, ja nato esé kirikain wishaa joibo senenhaxonaitian, itan jatíbi maton shinanyanix, itan jatíbi maton kayayanixbi mato Dioski banéketianpari.

11 Rama en mato meniai nato ja senenhati joira, matona atibires iki, wetsaxonbiresa ja senenhati atipanke.

12 Ikaxbi: ‘¿Ja senenhai axenon ixon noa jan onantiakin yoiti kopiki, tsoa naikan kati iki?’ Jaskati mato yoyo iti ikaxbira, nato joi naikanma iki.

13 Jainoaxa aniparo keibamaribi iki: ‘¿Ja senenhai axenon ixon jan noa onantiakin yoiti kopiki, tsoa aniparo keiba katiki?’ iki mato iti ikaxbi.

14 Mato jaskatabira, ja senenhati joi matoiba iki, maton senenhati kopíra maton kexainbi iki, itan maton shinan meranbi iki.

15 Oinkanwe, ramara en mato katomai, ja jati betan jakon iti, jainoax mawáti betan jakonma iti.

16 Yoiti ixonra rama en mato yoiabo maton ati iki, maton Ibo Diossa maton noiti iki, jawen shinanbora maton chibanti iki, ja senenhati joibo, ja senenhati esébo, ja koshi joibo, jabo senenhaxa mato jakon jati iki, ja maton iboakin biti mai biax mato jain iketianra, maton Ibo Diossen mato jakonhakin shinanxonti iki.

17 Ikaxbi nato jatíbi jan yoia keskabo axonyamaxon, wetsa diosbaon mato boa kaxon rabii jabo bebon chirankootaxa,

18 iamama jatianbi mato mawáti iki, maton onannon ixonra ikamatianbi en moa mato keshanke, jatianra Jordán shitabainxon maton jato bichini kaai mainko, basi mato itima iki.

19 Ja matonbi katónon ixonra, jati itan mawáti en mato yoike, jainxonra en mato yoike jaskatax jakon iti itan jaskatax jakonma iti, ja matonbi katónon ixon nato nete en yoiara nai betan maira jake ixon non onanna keská ikon iki. Jaskara iketian maton chiní bakeboyabi mato jakon janon, ja jakon jati katókanwe;

20 maton Ibo Dios noikanwe, yoiti ixonkanwe, ja senenhaxoni ikon ikanwe, jaskataxparira mato jakon jati iki, ja maton reken papabo Abraham, Isaac, Jacob akonkin meniti ixon Ibon yoini mainko, icha baritia jati joniboribira jaskatax jakon jakanti iki”, akin.