2 jain jaabora ani joni Anacnin chiní bake ikax, ani itan keyá jonibo iki, jaskara ikanaitian ja yoii iká joira maton moa onanke: ‘¿Tsonmein ja ani joni Anacnin chiní bakebo jatoaresti iki?’ iki iká.

3 Ramara maton onanti jake, maton Ibo Diossenra mato bebon kakin, chii tiri keyomis keská ixon, ja maibotiibi iká jonibo jato keyoboti iki, itan jato onitsapimati iki. Reteananatiibira jainoa maton jato potati iki, ishtonbiresa maton jato keyoti iki, mato jaskáamati moabi Ibon yoini keskáakin.

4 Maton Ibo Diossen, mato bebomea jato potaketianra mato itima iki: ‘Irake noa jakon iketianra Ibon nato mai ibo inon ixon noa menike’, iki. Jaskáakin Ibon jato potaara, jaton jakonma aká kopí iká iki.

5 Ja mato jakon kopima, itan maton jakon akai kopímara jaton mai maton iboakin biai; mato bebomea Ibon jato potaira jaton jakonma kopí iki, itan ja maton rekenbo Abraham, Isaac, Jacob jaskara jato axonti yoini ixon, ja senenhakin akai iki.

6 Matonra onanti jake, mato jakon kopima riki ja jakon mai ibo inon ixon, ja maton Ibo Diossen mato meniai, matora maton keena keskáres akaibo iki.

7 Ja tsoa jonibi jain jaama mananmameax, maton Ibo Dios bechitei mato yoitimanira, jawetianbi mato shinanbenotima iki. Ja Egiptonkoniax pikonontianbi peokootax neno nokotai senenra, jatíbitian mato yoitima ikana iki.

8 Ja Horeb mananmanxonra, maton ja Ibo sinámaa iki, jatianra matoki ikonbiresi sináxon moa mato keyoti iká iki.

9 Makan tablabo biira ea mananman mapeta iki, ja mato betan senenhabekonti aká joi jain wishakaata tablabo, jatianra chosko chonka nete itan chosko chonka yamé, piamaibi itan xeayamaibi ea jain iká iki.

10 Jatianra Ibon, janbi jain wishaa makan tabla rabé ea menia iki, ja mananman noa tsinkita inontian chii meranxon mato yoia joibora, jatíbi jain wishaa iká iki.

11 Ja chosko chonka nete, itan chosko chonka yamé winóketianra, mato betan ja senenhabekonti joi jain aká makan tabla rabé, ea menia iki,

12 jatianra ea yoia iki: ‘Katanwe, nenoax ishton ipakewe, ja Egiptonkonia min pikoa jonibora yoitimaxon moa wetsa shinan akanke. Jaskara ati en yoia joira ishtonbires jenekanke, moara senenhayamakanai, jaskákinra yami charaaxon jatonbi ja rabiti jawéki akanke’, akin.

13 Jainxon ea Ibon yoiribia iki: ‘Enra moa oinke nato jonibora ikonbires jaton keena keskáres akaibo iki.

14 Oke iwé, en jato keyobanon, ja shinantimaakinra nato mainmea en jato keyoai; ikaxbira miibakea en akai imakin koshi jonibo, itan jato xewina icha ikantiakin’, akin.

15 Ja manan chii tiritainkoniax ea ipakenontianra, nokon mekenman axon, jato betan ja senenhabekonti joi jain iká tabla rabé en bea iki.

16 Ikaxbi mato Iboki ochaa oinxon, itan maton yami charaaxon matonbi waka bake aketian, jainxon Ibon jaskara ati yoiabo chibankin maton jeneketianra,

17 ja en bea makan tabla rabé en besheaa iki, jainxonra mato bebonxon en beshéakin roroa iki.

18 Japekáora ea Ibo bebon chirankoota iki, jatianra moatianbi en jaskáakatitai keskáakin, chosko chonka nete, chosko chonka yamé en piamaa iki, itan en xeayamaa iki maton ocha aká kopi, jaskaraton jakonma shinanmaxonra maton Ibo sinámaa iki.

19 Já sináketianra ea rateta iki, jatianra onantibiresi matoki ikonbiresi sinata iki, mato keyokasnon kaman. Jaskáxonbira jakiribipari ea Ibon ninkáxona iki.

20 Aarónkiribi ikonbiresi Ibo sinata iki, jaskákinra retekasa iki, ikaxbira ayamanon ixon en já kopí yokata iki;

21 jainxonra ja akáx mato ochaa matonbi aká waka bake, yatantaanan en chiiki potaa iki, japekáora en renea potoketian, ja mananmameax joa weanman en nepota iki.

22 Jainxonribira ja Taberá, Masat, Quibrot-hataava ikainxon Ibo maton sináma iki.

23 Jatianra jan mato meniai mai bii, Cades-barnea ikainoax kati mato Ibon yoiabi, jawen joi ninkakashamai mato jaki yoitimaa iki, jatianra jaki koshikashamai jaki yoiti itin mato keenyamabobia iki.

24 ¡En mato onannontianbira, Ibon yoia atin keenmabo mato iká iki!

25 Ibon mato keyokasaitianra, chosko chonka nete itan chosko chonka yamé, Dios bebon ea chirankoota iki;

26 jatianra eaparikaya ninkawe akin en aká iki: ‘Ibó nato jonibo jato keyoyamawe, minnabo riki, min kikin shinanmanra min jato xabaa iki, min ani atipana koshinra Egiptonkonia min jato pikoa iki.

27 Ja min yonotibo Abraham, Isaac, Jacob shinanwe. Nato jonibo jaton keena keskares akaibo ikenbi, jaton jakonmabo itan jaton ochabo shinanyamawe,

28 jatianra jainoa min jato pikoni mainmea jonibo itima iki: Moatianbi jato meniti yoini mainkora Ibon jato jikimati atipanyamaa iki, jato omisai kopíra, nenoa jato pikoxon tsoa jonibi jain jayamainko jato mawámatin keena iki, iki.

29 Ikaxbira jabo min jonibo iki, minnabo riki, min ani koshi jishtiaxonra Egiptonkonia min jato pikoa iki’, akin.