2 Shinankanwe ja chosko chonka baritia senen, tsoa jonibi jain jaama mananman iká bain mato Ibon nimaa, mato msá tenemaa iki, jainxon jaki koshia mato onannoxon mato tanaa iki, jaskáaxon matonki ati iki jan yoiabo senenhakin, o matonki atima iki ixon onannoxon.

3 Jatianra masá tenemaribaxonbi, jawékiatinin mato imaa iki, japekáora mato maná jawékiamaa iki, matonbi itan maton rekenbaonbi onanama piti, jaskáaxonra mato onanmaa iki, jonira jawekiatininbicho jayamake, jatibi ja Ibon kexakameax pikotai joinribira joni jake ixon.

4 Ja chosko chonka baritia senenra maton chopa payóyamaa iki, maton taeribira soo iamaa iki.

5 Onankanwe, papan jawen baken jakonma akaitian akai keskáribiakinra, maton Ibo Diossen mato pontea iki.

6 Jaskara iketian, maton Ibo Diossen ja senenhati yoia joibo senenhakanwe, kikinman rabikanwe, jainxon jan mato onanmaa joibo chibankanwe.

7 Ibonra jakon mai ikain mato boai, ja maira icha weanya iki, mai teshanpa betan mananboribira jake, jainra jene jokonai kinibo jake, jawetianbi tsosinyosma jene pononaiboribira jake;

8 ja mainra jake trigo, cebada, uva waibo, higuerabo, kokoti granadobo, olivobo jainoax mishkin.

9 Ja mainko moa kaaxa, jawékiatinin yoroni ja shinanni mato iitima iki, wetsa jawékibaonbi yoronkin maton shinantira yamake, ja mainmea makanbo ikainoara maton yami nokoti iki, jainoax ja mainkonia mananbo ikainoara maton cobre tsekati iki.

10 Ikaxbira moa piax potota pekáo, mai jakon mato menia iketian, maton Ibo Dios maton rabiti iki.

11 Maton Ibo Dioski shinanbenonaketian koiramekanwe. Ja maton anon ixon rama en mato yoia, ja senenhati koshi joibo, ja koshibaon yoia joibo, ja esekan yoiai keskábo jeneyamakin senenhakanwe.

12 Jawetianki moa piax mato potóshaman ikai, jainoax maton aká jakon xobobaon mato jaai,

13 jainxonribi maton wakaboyabi maton carnerobo kaia maton oinnai, jaskáribiakin oroyabi plata ichabires maton bia iti iki, jainoaxibi jatíbi maton meskó jakon jawékibo kaia ointaanan,

14 ikonbiresi jaskaraton rabíyamakanwe, itan maton Ibo Dioskiribi shinanbenoyamakanwe, Egiptonko ikonbiresi yankabires yonokaatai iketianra, mato jainoa pikoa iki;

15 tsoa jonibi jain jaama manan ani onsá ikainra mato nimaa iki, ichabires retemis ronoyabi ninbobo ikainko, jainoax jain onpax yamanko. Jaskara ikenbira shanka chorish ikainoa onpax jokonha iki, jaskáaxonra mato xeamaa iki,

16 jainxonra tsoa jonibi jain jaama mananmanxon mato maná jawékiamaa iki, ja pitira maton rekenbaonbi onanama iká iki, mato onitsapimaa iki, jaki koshia onannoxon mato tanaa iki, jaskaapekao mato jakon inon ixon.

17 Jawekeska ixonra maton shinannake: ‘Nato jatíbi icha jakon jawékibora non koshinbi non biabo iki’ ixon.

18 Maton Ibo Diossa maton shinanti iki, ja jawékibo maton binon ixon jan mato koshi menia iketian. Jaskáaxonra ja maton rekenbo betan ja senenhabekonti joi aní, mato betan senenhaa iki.

19 Ikaxbi mato iti iki, maton Ibo Diossen shinan benoti, jaskaxon maton ati iki, wetsa diosbo ikonhaxon chibankin, jainxon maton ati iki jabo rabikin, rama nenoxon peoxonra en mato ikon yoiai, jaskara akáxa jatíbi mato keyóti iki.

20 Ja kakin maton nokoboai maibotiibi iká jonibo, Ibon jato keyoboai keskáakinra, maton Ibo Dioski yoitimaketian matoribi keyoti iki.