Ja senenhati ani esé
6
“Natobo riki ja senenhati koshi joibo, esébo itan koshibaon jato senenhamati joibo, ja maton Ibo Diossen jato onanmati ea yoiabo, ja maton biai mainxon maton ja senenhatibo.2 Ja Ibo Diossa maton kikin shinanti iki, mato jaai kamanra ja en mato yoiai esébo, ja senenhati koshi joibo, itan koshibaon jato senenhamati joibo, maton bakebaon, itan maton bababoyaxonbi maton senenhati jake, jatianra icha baritiabo mato jati iki.
3 Jaskara iketian, israelitabó, jabo senenhakanwe. Jaskataxa mato jakon iti iki, jainoaxa ja mai jakon ikain ichabires jawékiati jainko, westíora jema kikinshaman icha joni mato iti iki, ja Ibo Diossen maton rekenbo jato meniti yoini keskáshaman.
4 Ninkákanwe, Israelbo: Ja non Ibo Diossa jabichores Ibo iki.
5 Min Ibo Dios noiwe jatíbi min shinanyaxon, jatíbi min kayayaxon, itan jatíbi min koshiaxon.
6 Min shinan meran biwé, ja rama en mia yoia jatíbi jawékibo,
7 jainxon ja joibo jeneyamakin min bakebo onanmawe, jakiakinres jato yoyo awe, min xobonxon aríbaxonbi bain kakinribi awé, jainxon moa oxai rakákin, itan moa weníkinribi jato yoiwe.
8 Ja oinxon onantira, nato koshi joibo wishaax mia menexeeti iki, jainoaxa mia bonexeeti iki,
9 jainxonribi min xobo witainbo, itan xepótiainbo wishawe.
Yoiti ikanon ixon israelitabo Moiséssen yoia
10 Ja maton rekenbo Abraham, Isaac, Jacob jato meniti yoini ixonra, ja maton Ibo Diossen ja main mato jikimai. Maton akáma ikaxbira, ani itan metsáshaman jemabo ja main jake;
11 maton tsinkiama ikaxbira, jatíbi kikin jakon jawékibo bochoa xobobo jain jake; maton akáma ikaxbira jain pozobo jake, itan uva waibo jake, jainoaxa maton banaama ikaxbi olivobo jake, jaskara ikenra jabo jawékiaax mato potóti iki.
12 Jawetianki jaskarabo atinko mato nokotai, koirameekanwe matora Ibon shinanbenonake, iboaxon kikinhakin yonokanaibo ikenbira Egiptonkonia mato tsekáa iki.
13 Maton Ibo Dios rabikanwe, já bichores jatibi axonkanwe, jawetianki akonkin ja senenhati ixon maton yoiai, ja Ibon janenkobichores akanwe.
14 Ja mato patax iká jemabaon rabiai diosbo chibanai iamakanwe,
15 ja mato betan iká maton Ibo Dios iki, westíora Dios washimis, jaskara ixonra matoki sináxon, jatíbi mato keyoti atipanke.
16 Ja Masáinxon akani keskáakin, maton Ibo Dios tanayamakanwe.
17 Maton Ibo Diossen koshi joibo akonkin senenhakanwe, ja senenhati mato yoia joibo, itan ja senenhati esébo akanwe.
18 Ibon oinna kentishaman ponté jakonbichores akanwe, mato jakon inon, ja maton rekenbo Ibon akonkin meniti ixon yoini, jakonshaman mai maton iboakin binon,
19 jatian abánon, ja mato betan reteananai jatíbi maton rawíbo Ibon jabámakin, jaskara ati moabi yoia keskáakin.
20 Wetsa netebaonra maton bakebaon mato yokáti iki: ‘¿Ja koshi joibo, ja senenhati esébo, ja koshibaon joibo, non Ibo Diossen ja anon ixon noa yoiaboki, jawekeska yoii ikábo iki?’ akin.
21 Jatianra maton jato yoiti iki: ‘Faraónman iboaxon yanka yonotira Egiptonko noa iká iki, jainoara jawen ani atipana koshin, ja Ibon noa pikoa iki.
22 Nonra oinna iki, ani itan onsábires jaskara iosmabo, itan ja oinxon onantibo, faraón akin jatíbi jawen xobon ikábokiribi, Egiptonkoxon Ibon jaskarabo akaitian,
23 ikaxbira noa jainoa pikoa iki, jaskáaxonra ja non rekenbo meniti yoini ixon, ja main boxon noa ja mai menia iki.
24 Jaskáaxonra ja Ibo Diossen noa yoia iki, jatíbi jawen koshi joibaon yoiai keská non ati, itan noa jaki rakéti, noa jakon iti kopi itan ramakamanbi aká keskáakin, basibires noa jan jamanon ikax.
25 Jatian jaskara ati noa jan yoiabo, akonkin ja koshi joibo senenhaxa noa iti iki, Ibo Diossen oinna, atikeskabiakin jakon akaibo’ ”, akin.