Aꞌikakauma Berona Tohana Kebaꞌiobinakia.
2
Ia oi hanona aꞌikakauma berona tohana kobaꞌiobi ainakia taeara weianai katemauri.
2 Hau kirokia kobaꞌiobinakia katebakiro,
ekia hoahoai maearima ia katemariki ainakia,
aoberoai katemauri mai ekia aꞌikakauma ketabura harai,
kate raonaꞌau haeamona katebapahihi.
3 Taeara ihobonaimo babiꞌe kirokia kobaꞌiobinakia Tirama ena nuatae maurinai ketemiaho,
baika herekiai aꞌi kateꞌuahi ꞌuahi,
ꞌao aꞌi kateinu ꞌari,
ia aka namo taearakia katebaꞌiobi ainakia.
4 Weiana ia katehore babiꞌe ꞌaruꞌarukia kateba marerenakia kipokia atawakia mai nahukia kateraonaꞌau ainakia,
5 kateaobero mai ekia hoahoai katebero harai,
ekia itu akakiamo kateaꞌi rea,
katerabo harai,
mai atawakia taikiai katetai,
weiana hau ha Tirama ena ꞌabi aꞌi kebakiꞌana.
6 Taeara ihobonaimo,
hau ꞌaruꞌarukia koba taburanakia aoberoai katemauri.
7 Oi hanona taba ikoikia aokiai ihaiha namona kobaihanakia emu babai namokiai.
Emu baꞌiobi aokiai hanona hoahoa beronai mai aomu tohanai kobaꞌiobi.
8 ꞌAbi berona tohanai koꞌabiꞌabi weiana tai ha aꞌi keꞌabi kiꞌa bena.
Ba weiakia oi tiꞌoataniꞌo haukia katehaumaea pokina herekai ꞌabi kiꞌa obona katehinana ꞌekana ahaꞌi.
9 Taꞌaraꞌi haukia kobaꞌiobinakia taba ikoikiai aokiai ekia poki haukia aiakia katekaꞌainakia,
aokia kateba namonakia mai ekia ꞌabi aꞌi kateba muenakia.
10 Ekia poki haukia herekiai aꞌi katebainao iamo taeara ikoikiai aokiai hanona ekia namo mai aia ibabua ꞌau hoana katebawaira tinana,
weianai maearima Tirama aika ibamaurika hauna iꞌiobina katenuataeai taburana.
Keriso Ena Mue Mai Wapuna Nahaꞌimana Aonai.
11 Hoahoa uahomakiai kahamiaho,
pokina Tirama ena aokoꞌo hoana weiana maearima ikoikiai keba maurinakia hauna aba ebawaira tinana.
12 Aokoꞌo hoana weiana aika nibaꞌiobinaka Tirama ibakiꞌana maurinai aꞌi kahamauri mai hanopaka inuatae aina akakia kiꞌa obokia aꞌi kahababai,
iamo bakiroai mai beroai kahamiaho,
haeamona Tirama ena nuatae maurina kahamauri aina hanopaka neiana aonai.
13 Aika hanona ua kahamiaho aiho eka buabeni apaꞌuana weiana Tirama apaꞌuana mai ibamaurika hauna Iesu Keriso ena mue mai wapuna nuabina nahaꞌimana aonai.
14 Keriso kipona ena mauri ebaibeni aika paukai weiana ꞌaraka ehorenakia babai kiꞌa ikoikiai aokiai erubunaka mai kiꞌa ahaꞌi haukai ebaonaka ia kipona ꞌeuna tohaka,
maearima weiaka aoka tohakiai nahanuatae rani ikoikiai namo akakia mo kahababainakia.
15 ꞌAbi neiakia kobaꞌiobiai mai maearima koba taburanakia,
abomo ekia mauriai taba tekiꞌa haukiai mai taburamu maikoinai kobaberonakia.
Hau ha aꞌi koiha haona oi aꞌi kebamiori poꞌoniꞌo.