Aꞌikakauma Haukia Katebaꞌoru Aka Namokia Ibabaikiai.
3
Aꞌikakauma haukia kobaraonanakia Kabamani haukia mai poki haukia ekia hiabu baꞌanai katemiaho,
aiakia katekaꞌaina abomo katebaꞌoru aka namokia ibabaikiai.
2 Kohina benakia hau ha herenai aꞌi kateꞌabi kiꞌa,
baibuai katemiaho,
kateꞌamari ꞌamari,
mai katerabo harai maearima ikoikiai herekiai.
3 ꞌUainai aika abomo hapoꞌo,
aia aꞌi hakaꞌai,
teꞌoi ahinaka habeho,
mai hauani ena nuatae akakia kiꞌa obokia taꞌarakia haꞌi abomo haonamo ainakia.
Haeamona eka mauri aokiai kiꞌa akakia hababai mai hawamuru,
maearima baika teꞌoatanaka,
mai aika ha ha abomo kipoka habaiꞌoataina.
4 Iamo Tirama aika ibamaurika hauna ena rabo harai mai ena raonaꞌau tewaira tina raninai,
5 aika ebamaurinaka.
Weiana hanona aika eka aka bero paunai ahaꞌi,
ꞌa ia kipona ena aokoꞌo hoanai ebamaurinaka.
Auba Robeai ebaꞌuerenaka harama mue maearima mahamahakai haeao ebamaurinaka.
6 Tirama ehore ena beruberuai Auba Robe ahakai eheina ibamaurika hauna Iesu Keriso paunai.
7 Weiana buonai Tirama ena aokoꞌo hoanai bero ebenaka ia wairanai,
weiana aika mauri banaibanai nahabuabena hauna kahaꞌina.
8 Baꞌiobi neiana hanona ꞌabi tohana,
ba au nanuatae oi koꞌabi taburaina maearima hanona taba neiakia obokia kateobo.
Ba maearima weiakia Tirama tiaꞌikakaumana haukia hanona kateꞌima ꞌima harainakia aka namokia katebabai ekia mauri aokiai.
Neiakia hanona taba namokia maearima ikoikiai katebarainakia.
Hoahoa Kiꞌa Obokia Herekiai Kokapare.
9 Iamo poꞌo baihara taekia,
mai rama kupu torikia kikipakia,
mai Mose ena rauhubu paunai tibaiara ꞌao tiꞌau haukia herekiai kokapare.
Taba weiakia hanona anikia ahaꞌi mai hau ha aꞌi katebaraina.
10 Baiata hore nibaramanakia hauna rani koriꞌuaina mai ibaruana korobena,
ba murinai hanona kohabo ꞌabaeana kateba karahina.
11 Oi koꞌiobina maearima uahomakia hanona taeara tohana tehabona mai ia hanona kiꞌa haukia,
kipokia ekia kiꞌa tihore tibatohanakia ia hanona tebeho.
Paulo Ena Nuatae ꞌAbina Mai Banamo ꞌAbina Orena.
12 Weiana au Aretema ꞌao Tukiko kauhuna kewahi heremu ꞌekamu keaꞌina raninai,
taeara kotabu komai biai hereꞌu weia Nikapoli ai,
pokina au aoꞌu aba aꞌiaꞌi haraina weia kamiaho ꞌama ranina neiana aonai.
13 Sena rauhubu hauna mai Apolo ohi kobarainakia ekia harima taearana koaꞌiaꞌi haraina weiana ia taba ikoikia ṯenuatae ainakia haukia kateaꞌinakia.
14 Eka maearima ꞌiobi kateaꞌina ekia mauriai aka namokia katebabai ba maearima weiakia taba ṯenuataeai haukia katebarainakia.
Weiana aꞌi tememiaho ꞌabaea ekia mauri buabuakia aꞌi temeahaꞌi.
15 Maearima neia hereꞌuai haukia ikoikiai ekia banamo ꞌabikia ṯeuhunakia heremu.
Emai banamo ꞌabikia eka maearima ikoikiai weiakia aꞌikakauma aonai tiraonaꞌau ainamai haukia kobenakia.
Nabahubaꞌari Tirama ena aokoꞌo hoana ikoimiai heremiai kemiaho.