Paulo Ena Marere
TITO
Herenai
Banamo ꞌAbina.
1
Au Paulo,
Tirama ena taꞌara aꞌi mai Iesu Keriso ena iuhubeau hauꞌu.
Au hanona teuhunaꞌu maearima weiakia Tirama etinaꞌanakia haukia ekia aꞌikakauma kabarainakia Tirama ena ꞌabi tohana kateꞌiobina weianai Tirama katemariki aina.
2 Aꞌikakauma mai aotipa weianai mauri banai banai katebuabena Tirama hanona aba waꞌi baha hanopaka aꞌi erama baha aonai mauri neiana eꞌabiꞌuai aina,
ia hanona aꞌi nibaiꞌoi.
3 Aba eraona ꞌuaina ba ena rani tohanai ena pou namona ebawaira tinana maearima ikoikiai kateꞌiobina,
weiana hauna nairoro aina,
Tirama ibamaurika hauna ebatohanaꞌu ia ena aka neiana ibabainai.
4 Tito,
nahaꞌu tohana eka aꞌikakauma hamona aonai,
au oi narere beniꞌo.
Tirama aika hamaka mai Keriso Iesu aika ibamaurika hauna aokoꞌo hoana mai baibua katebeniꞌo.
Tito Ena Aka Krete Aonai, Kiro Haukia Kateaꞌi taeanakia.
5 Krete ai ahaboniꞌo ena poki hanona aka ikoinai aꞌi teore haukia koaꞌiaꞌi harainakia ba aiara ikoikiai aokiai Tirama ena mareai kiro haukia kotinaꞌanakia ꞌuai akana katebabaina,
ꞌiobi abeniꞌo haunai koaka.
6 Kiro hauna hanona behoai aꞌi tikaiahina hauna,
atawana babiꞌena hamona,
nahuna kateaꞌikakauma abomo aia katekaꞌaina,
aꞌi kateripuripu.
7 Pokina Tirama ena aka neiha ꞌininakia hauna hanona beho ai aꞌi tikaiahina,
kipona ena nuataeai aꞌi kekaꞌa,
ꞌao aꞌi keopuere noanoa,
aꞌi keinu ꞌari,
aꞌi keripuripu,
mai moni aꞌi kenua kiꞌaina.
8 Baki haukia keaꞌi taeanakia ena ituai mai taba namona hauna keraoanaꞌau aina,
aoberoai kemiaho,
bero taearanai kemauri,
ena mauri kebaibeni Tirama herenai,
mai aona kebairobe.
9 Tirama ena ꞌabi tohana weiana tebaꞌiobi aina haunai keaꞌi ꞌini.
Taeara neianai baꞌiobi tohana kebaꞌiobinakia maearima aokia keba taburanakia,
mai weiakia baꞌiobi tohana tiꞌoatana haukia ekia beho kebaberonakia.
Baꞌiobi Haukia Baiꞌoikia Katebaꞌoronakia.
10 Pokina baiꞌoata haukia boꞌokia weia ekia ꞌabi ꞌabaea ꞌabi ꞌabaeai maearima tiꞌoinakia,
ba weiakia tetarenakia haukia boꞌokia abokiamo weia.
11 Maearima weiakia kato baꞌoronakia ꞌurukia kepua,
pokina aꞌikakauma haukia ekia itu haukia boꞌona aokia tibaroꞌarina,
aꞌi patebaꞌiobiai tabakia tibaꞌiobiai moni iraonanai haumaea akakia weiakia tibabai.
12 Kerete haukia kipokia ekia mahabanai hauna ha Kerete haukia ehina benakia etibaha,
“Kerete haukia hanona baiꞌoi haukia,
ꞌaki aiporokia kiꞌa obokia ꞌabakia,
teꞌaboro kipokia mo nuakia tiraonanakia.”
13 Neiana hanona ꞌabi tohana ehinana,
ua buonai kobata kiꞌanakia,
weianai hanona ekia hoa hoa katebero Tirama kateaꞌikakauma taburana.
14 Ba Iuda haukia ekia ori ꞌao kikipa ꞌaiꞌaikia mai weiakia maearima ekia rauhubu ꞌabikia aiakia aꞌi kateoꞌo,
weiakia hanona maearima herekiai timai Tirama ena ꞌabi tohana tiꞌoatana.
15 Weiakia aokia tebero harai haukia hanona herekiai taba ikoinai tebero harai,
ia weiakia aokia kiꞌai tebonu haukia mai aꞌi tiaꞌikakauma haukia hanona herekiai taba ha aꞌi ebero.
Ekia raona mai aokia tohana hanona tekiꞌa.
16 Ia tiꞌabi Tirama teꞌiobi haraina,
iamo ekia babai ai hanona Tirama aꞌi tiaꞌi taeana.
Ia hanona maearima weiakia ꞌarikia aꞌi niꞌari haukia aia aꞌi tikaꞌaina haukia haeamona taba namona ha katebabaina herekiai hanona aꞌi ketaina.