Wapu Orekiai.
3
Neiana hanona koraona ꞌinina,
wapu orekiai hanona kiꞌa rarikia ꞌakikia katerama.
2 Maearima hanona kipokiamo kateraonanakia,
moni mo katenua kiꞌaina,
kateꞌabi kiꞌa,
kateapa,
katebaroꞌe,
maearima herekiai kateꞌabi kiꞌa,
nahu hama hina aiakia aꞌi katekaꞌainakia,
namo ꞌabikia aꞌi katehina,
mai robe akakia aꞌi katebabai,
3 herekiai haukia aꞌi kateraonaꞌau ainakia,
kiꞌa aꞌi katehina hao,
kateꞌuahi ꞌuahi,
katebaripu ripu,
kateaiahu,
aka namona kateꞌoatana,
4 katehinahina,
aꞌi kateraona raona ia katebabai ꞌabaea,
aokia apa katebonu,
aonamo akakia katenuatae ainakia,
ia Tirama aꞌi kateraonaꞌau aina.
5 Hauaniaimo Tirama ikutiaina maurinai ṯemiaho,
ia mauri weiana hiabuna tohana hanona tibakiꞌana.
Maearima uahomakia haukia hanona herekiai kokapare.
6 Maearima uahomakia baika hanona babiꞌe ekia raona tekoꞌikoꞌi haukia ekia itu aokiai titoto,
aokia tiani kipokia nabau akakia kiꞌa obokia tibabainakia babiꞌe weiakia hanona aka kiꞌa aonai ṯemiaho ekia nuatae kiꞌa obokia ihobonai.
7 Babiꞌe weiakia rani ikoinai tibahobona ṯenuatae taba mahamahakia patemarereai haraina,
ia Tirama ena ꞌabi tohana hanona aꞌi mo ṯeꞌiobi bahana.
8 Ihobona Iane mai Iambore Mose teꞌoatana ꞌabana,
maearima uahomakia hanona Tirama ena ꞌabi tohana abomo tiꞌoatana,
ekia raona hanona aꞌi tebero,
Tirama ekia aꞌikakauma aꞌi tibatohana.
9 Ia ekia baꞌiobi hanona aꞌi keao homaꞌana,
pokina maearima ikoinai hanona ia ekia poꞌo kateiha tinana,
ihobona Iane mai Iambore ohi herekiai erama ꞌabana.
Tirama Ena ꞌAbi Tohanai Komiaho.
10 Ia oi hanona eꞌu baꞌiobi akakia ikoinai aba oꞌiobinakia,
eꞌu hoahoa,
eꞌu raonaraona apaꞌuana,
eꞌu aꞌikakauma,
eꞌu bakiro,
eꞌu raonaꞌau,
eꞌu bapahihi aba oꞌiobinakia.
11 Oi oꞌiobina au teꞌoatanaꞌu abomo ahau haiara weia Antioka ai,
Ikonio ai mai Lustera ai.
Baiꞌoata pahihikia terama ia abapahihi,
ba Obiapaka ehore kiꞌa weiakia aokiai eaꞌi maurinaꞌu.
12 ꞌAbi tohana maearima tenuatae Keriso Iesu aonai Tirama ikutiaina maurinai katemiaho haukia ikoikiai hanona kateꞌoatanakia.
13 Ba aka kiꞌa haukia mai ahu ꞌoiꞌoi haukia ekia aka kiꞌa tebabai toꞌo baihana eaomo tekiꞌa kiꞌa baha,
weiana ia tihore maearima baika tiꞌoinakia haeamona ia kipokia abomo tiꞌoinakia.
14 Ia oi hanona Tirama ena ꞌabi tohanai komiaho,
weiana oꞌiobina omarere aina mai nuaꞌikakauma aina hauna,
abomo oꞌiobina tai hanona oi emu baꞌiobi haukia.
15 Koꞌikoꞌimuai raninai Puka robena aba oꞌiobina emai mo bariu,
ba Puka robena kehore aobero kebenaka,
weianai Keriso Iesu oaꞌikakaumana bamauri oaꞌina.
16 Puka Robena ꞌabikia ikoikiai hanona Tirama Aubana ena baraibarai ai tererenakia,
ba ekia aka hanona teapaꞌua kiꞌa baha,
weiakiai ꞌabi tohana kahabamarere aina,
katebaraona beronaka,
katebakaꞌa beronaka,
mai mauri berona katebaꞌiobinaka weianai kahamiaho.
17 Ua buonai Puka robena ꞌabina kehore maearima Tirama ena aka tibabaina haukia kebaꞌoru harainakia aka namokia ikoikiai katebabainakia.