4
Tirama mai Keriso Iesu wairakiai au oi nabahi ahiniꞌo,
Keriso hanona kemai mue mauri haukia mai ꞌari haukia kebabakainakia ena obia aiarana keꞌarana.
2 Tirama ena ꞌabi koiroro aina,
tiaꞌi taeaniꞌo ꞌao aꞌi tiaꞌi taeaniꞌo ranikia ikoikiai aokiai,
mai bakiromu maearima kobamarerenakia,
kobaberonakia,
korobenakia,
haeamona koba taburanakia.
3 Pokina maearima baꞌiobi berona aiana aꞌi kateona ranina hanona kemai,
weiana ia kipokia ekia nuatae taikiai katetai abomo kipokia ekia baꞌiobi haukia boꞌona katetabu ahinakia aokia ibanamona ꞌabikia katehina aiakia kateoꞌo.
4 Tirama ena ꞌabi tohana ionai katebua keꞌe,
ia kikipa baiꞌoikia katebahu ainakia.
5 Ia oi hanona rani ikoikiai koꞌima harainiꞌo,
mai bakiromu haiara aokiai kobakiro,
pou namona ihinana akana kobabaina,
Tirama ena aka ibabaina haumuai koao aka ikoikia kobabai ore harainakia.
6 Au eꞌu mauri maikoinai hanona beruberu tabanai keao Tirama herena,
ba eꞌu ꞌari ranina weiana hanona aba herekai.
7 ꞌAu aonai aba aꞌau harai,
mai beau baitaeai aonai beau abaore haraina,
abomo eꞌu aꞌikakauma hanona aꞌima haraina.
8 Ba bariu hanona eꞌu bero paunai ꞌuai hoana ebaꞌoruna ꞌeuꞌu,
weiana Obiapaka bero hauna bakai keꞌuai aina hauna kehore au ꞌuai hoana kebenaꞌu,
au mo ikupaiaꞌu ahaꞌi,
ia weiakia ikoikiai mai raonaꞌaukia Obiapaka ṯeꞌimana kewaira tina ena mai wapunai haukia abomo kebenakia.
Paulo Ena Nuatae ꞌAbina.
9 Taeara kotabu konoanoa komai biai au hereꞌu.
10 Pokina Dema hanona hanopaka maurina eraonaꞌau aina buonai ehabonaꞌu eao Tesalonika.
Kereske hanona eao Galatia,
ba Tito hanona eao Dalamatia.
11 Luka mo ikupaiana hanona au hereꞌuai nemiaho.
Mareko kobakaꞌana torarua katomai,
pokina ia hanona aka neianai kebarainaꞌu aba ketaina.
12 Tukiko hanona aba auhuna Epeso eao.
13 Komai raninai,
eꞌu habuni ibatoto imukina weia Toroai Kapo herenai ahabona hauna komaiaina,
mai puka komaiainakia,
puka weiakia mamoe paruakiai tererenakia haukia hanona aꞌi koreanakia koaꞌinakia komaiainakia.
14 Alesanda auri akana nibabaina hauna hanona hereꞌuai ebabai kiꞌa kiꞌa baha,
ia Obiapaka kehore ena babai weiana ihobonai ꞌarana kebamuena.
15 Ia herenai oi abomo koꞌima ꞌima harainiꞌo,
pokina eka baꞌiobi ꞌabikia hanona eꞌoata kiꞌa kiꞌa bahanakia.
16 Bakai koriꞌuainai,
akoroti eꞌu pou ahinana aonai tai ha aꞌi ebarai ꞌapuanaꞌu,
ikoikiai tehabonaꞌu tekaꞌa.
Ia Tirama ekia kiꞌa weiana ꞌarana aꞌi pehorena.
17 Ia Obiapaka hanona au here hereꞌuai emiaho tabura ebenaꞌu,
weiana au ahore pou namona maikoina airoroai haraina rama haea haukia ikoikiai kateona,
eꞌu ꞌari katebatohana ꞌekanai ebarobo maurinaꞌu.
18 Obiapaka kehore au kiꞌa ꞌekakia ikoikiai aokiai kebarobo maurinaꞌu mai keaoai harainaꞌu ena kupa aiaranai.
Nuabi hanona ia herenai kemiaho keao mo banaibanai.
Amen.
Banamo ꞌAbina Orena.
19 Eꞌu banamo ꞌabina Priskila mai Akula ohi kobenakia,
abomo Onesiforo ena itu haukia kipokia kobenakia.
20 Erasto hanona Korintoai nemiaho,
ba Trofimo hanona einawa buonai Miletoai ahabona weia nemiaho.
21 Taeara kotabu konoanoa,
ꞌama ranina aꞌi nikaraꞌau baha hanona komai.
Eubulo,
Pude,
Lino mai haibuka Klaudia,
haeamona uahoꞌabaka ikoikiai ekia banamo ꞌabina ṯeuhuna heremu.
22 Nabahubaꞌari Obiapaka hanona aubamu herenai kemiaho.
Tirama ena aokoꞌo hoana ikoimiai heremiai kemiaho.