Keriso Iesu Ena Huari Haumu Namomu ai Koao.
2
Ua buonai,
nahaꞌu e,
Keriso Iesu aokoꞌo hoana weiana ebeniꞌo hauna aonai kotabura.
2 ꞌAbi naiakia maearima boꞌona wairakiai airoro ainakia ꞌurukia oꞌo haukia maearima weiakia nubatohanakia haukia kobaꞌiobinakia,
ba ia katehore maearima baika kateba ꞌiobinakia.
3 Keriso Iesu ena huari haumu namomuai koao,
hau haiara aokiai kobatabura ihobona au nababaina ꞌabana.
4 Huari hauna maearima ꞌabaeakia ekia mauri hoahoana aonai aꞌi nitoto.
Ia huari akana nibabai haraina pokina ena nuatae poki hauna aona kebanamona.
5 Abomo beau baitaeai hauna beau rauhubukia ikoinai kekaꞌai harainakia,
ahaꞌi raninai beauai ꞌuai ꞌarana aꞌi keaꞌina.
6 Biraura hauna kearoꞌari ba aniani koriꞌuaina hanona ia keaꞌi ꞌuaina.
7 Au taba nahinana hauna koraona haraina,
pokina Obiapaka hanona aba aomu kekaikauna taba ikoinai obokia kobo.
8 Iesu Keriso ꞌariai emikiri mue hauna koraona ꞌinina,
ia hanona Davida ꞌabaꞌabana,
neiana hanona pou namona au nairoro aina.
9 Pou namona airoro aina paunai ṉahau haiara mai tebirinaꞌu matoha beho hauna ha ꞌabana,
ia Tirama ena ꞌabi katebirina hanona aꞌi ketaina.
10 Ua buonai eꞌu atetua ikoikiai aokiai abatabura kiꞌa Tirama ena aꞌi taea haukia paukiai,
weiakia kabarainakia Keriso Iesu aonai bamauri mai nuabi banaibanai hauna kateaꞌina.
11 Neiana hanona ꞌabi tohana aoka tohakiai kahaꞌi taeana mai kahaꞌikakaumana.
“Aika Keriso kipokia
haꞌari raninai,
aika ia kipokia kahamauri oioi.
12 Aika hau haiara aokiai
kahabatabura raninai,
aika ia kipokia kahaobia oioi.
Aika ia kahabuniaina raninai,
ia abomo aika kebuniai ainaka.
13 Aika aia aꞌi nahababua ꞌauna reꞌa
ia hanona aia nibabua ꞌau ohona,
pokina ia hanona kipona
aꞌi kebuniai aina.”
Tirama Kebatohaniꞌo Ena Aka Haumu Tohamu.
14 ꞌAbi neiakia maearima kobaraonanakia.
Ba Tirama wairanai kohinabe pahihinakia,
ꞌabiꞌabi ꞌabaeakia ahakiai aꞌi katebaiara,
ꞌabi weiakia hanona anikia ahaꞌi,
maearima aia weiana tiona hanona ekia mauri niaꞌi kiꞌanakia.
15 Koaka tabura harai,
kipomu Tirama wairanai kobatohaniꞌo oi hanona aka haumu weiamu emu aka aꞌi nuhaumaeaina,
ba oi haumu hanona Tirama ena ꞌabi tohana ꞌabina taearana beronai nubaꞌiobi.
16 Hanopaka ꞌabiꞌabikia mai poꞌo ꞌabiꞌabikia herekiai kokapare,
pokina weiakia hanona maearima Tirama herenai tibakaꞌa ꞌakaumanakia.
17 ꞌAbi ua homakia tibaꞌiobi hanona matoha tua kiꞌa obona koipe ꞌabana bitio niani obona,
Humenaio mai Fileto hanona maearima neiakia baiatakia.
18 Ia terarua hanona ꞌabi tohana taearana aba tehabona ia ekia baiꞌoiai tiꞌabi,
aika aba hamikiri mue muri hanona ꞌariai aꞌi kahamikiri mue,
ba ꞌabi weiana nihore maearima baika ekia aꞌikakauma niaꞌi kiꞌana.
19 Ia Tirama ehore kori ꞌini ꞌekana ha aba ehorotina weiana aꞌi keibiu ꞌapua,
ba ahanai ꞌabi neiakia tererenakia,
“Obiapaka hanona ena maearima ikoikiai eꞌiobinakia,”
abomo “Taimo taimo tiꞌabi ia Obiapaka ꞌeuna hanona babai kiꞌa ikoikiai katehabonakia.”
20 Itu apaꞌuana ha aonai hanona uro mai ꞌororo haeai haeai weia ṯemiaho,
baika hanona gold ꞌao silba ai tebabainakia,
ia baika hanona matiuai ꞌao tipuai tebabainakia,
ba baika hanona aka apaꞌuakiai kateakainakia,
ia baika hanona aka ꞌabaeakiai kateakainakia.
21 Hau ha ena mauri aonai kipona kiꞌa herenai kekapare raninai,
ia hanona aka apaꞌuakia aokiai kateakaina,
ia hanona tebarobena,
haeamona ena aka keboꞌo kiꞌa baha ena poki hauna herenai,
abomo aba eꞌoru aka namokia ikoikiai keakainakia.
22 Baꞌaruꞌaru raonaraonakia kiꞌa obokia kohabonakia,
ia kotabura aka beroai,
aꞌikakauma,
raonaꞌau mai baibuai komiaho,
haeamona weiakia aokia tenamo Obiapaka atanai tiapari haukia kipokia katobahamomo.
23 Poꞌo mai ao ꞌabaea baihara taeakia herekiai kokapare,
pokina aba oꞌiobina weiakia puakia hanona baiara katerama.
24 Ia Obiapaka ena taꞌaraꞌi hauna hanona aꞌi kebaiara,
ia hanona maearima ikoikiai herekiai kerabo harai haeamona baꞌiobi hauna namonai keao mai kebapahihi.
25 Weiakia ia tiꞌoatana haukia hanona baihauai kehinabe harainakia ba taeara weianaimo Tirama mehore mebaraona kabenakia katemai Tirama ena ꞌabi tohana kateaꞌi taeana.
26 Ba weianai ekia raonaraona katebero Satani weiana eaꞌinakia aiana tekaꞌaina hauna ena rioai katekapare.