2 Tesalonika 2

Hau Pairipairi Tiaporo Kewaira Tina.

Uahoꞌabamai e,

eka Obiapaka Iesu Keriso ena muemai abomo aika ibararoka ia herenai hauna pouna ṯahinana,

ba ṯanoinimi,

2 aomi aꞌi katenoanoa,

mahabanai ꞌabikia ꞌao ꞌabi baika ꞌao marere heremai ai ewahi ṉa tiho tiꞌabi Obiapaka ena beraura aba emai hanona wai aꞌi kebataꞌunimi ꞌao nuami aꞌi ketae.

3 Hau ha taeara neianai aꞌi keꞌoinimi.

Pokina beraura weiana hanona aꞌi kemai baha keaomo maearima Tirama katemurina kateꞌoata ꞌuaina ba hau pairipairi tiaporo kewaira tina,

ia keao ꞌekana hanona haiara banaibanai ꞌekana.

4 Ia hanona maearima ṯekuti ainakia tabakia ikoikiai mai tiaparinakia tirama ṉa tiho haukia keꞌoatanakia,

ia kipona kehorotina neiakia ikoikiai arakiai abomo keao Tirama ena marea robe aonai kemiati ba keꞌabi ia kipona hanona Tirama.

5 Au wai heremiai raninai taba neiakia ikoikiai ahinabe ainimi,

weiana wai aꞌi turaona ꞌininakia, u?

6 Abomo bariu wai aba toꞌiobina hiabu tabana nihore ia niaꞌi ꞌinina weiana keaomo ia ena rani tohanai hau weiana kewaira tina.

7 Pokina hau pairipairi tiaporo ena hiabu aba niaka bunianai,

ꞌa ia weiana bariu niaꞌi ꞌinina hauna keaꞌi ꞌinina keaomo ia kehe pare.

8 Ba hau pairipairi tiaporo kewaira tina,

iamo Obiapaka Iesu kemai raninai pinana maeabunai tiaporo keahu ꞌarina mai ena nuabiai kebapuana.

9 Hau pairipairi hanona Satani ena hiabuai kemai hiabu baiꞌoikia haeai haeai,

babai baiꞌoikia mai hoa apaꞌuakia baiꞌoikia kebabai,

10 mai aka kiꞌa obokia haeai haeai ai niꞌoinakia ia hanona kateꞌari haukia.

Ia kateꞌari pokina ꞌabi tohana weiana mauri kebaibeni hauna iraonaꞌau aina teubo aina.

11 Pokina neiana buonai Tirama ehore ahurea raonana hiabuna aokiai ehorotina keaka,

ia baiꞌoi weiana kateaꞌi taeana.

12 Weiana ꞌabi tohana aꞌi teaꞌikakaumana haukia mai kiꞌa teaonamo aina haukia ikoikiai hanona puma katehoaina.

Tirama Etinaꞌanimi Bamauri Katoaꞌina.

13 Uahoꞌabamai e,

wai Obiapaka niraonaꞌau ainimi haumi,

ai wai paumiai rani ikoinai mo Tirama namo ꞌabina katabena,

pokina popounai Tirama etinaꞌanimi,^a

ba mauri katoaꞌina Auba Robe ena hiabuai,

mai emi aꞌikakauma weiana ꞌabi tohana herenai haunai wai Tirama ena maearima robekiai katoao.

14 Tirama ehore pou namona weiana ai heremiai tairoro aina haunai eaparinimi tomai mauri robena neianai,

weiana emi itau eka Obiapaka Iesu Keriso ena nuabi aonai katoaꞌina.

15 Ua buonai uahoꞌabamai e,

katokori ꞌini,

mai emai baꞌiobi ꞌabikia tairoroai pinamaiai tahina ꞌao marere ai tabenimi haukia katoꞌini benakia.

16 Eka Obiapaka Iesu Keriso mai aika Hamaka Tirama ṯanoinakia,

ia hanona eraonaꞌau ainaka ena aokoꞌo hoana aonai batabura banaibanai mai buabeni namona ebenaka,

17 ia kehore aomi kebakirona mai kebataburana rani ikoinai aka namokia katobabai mai ꞌabi namokia katohina.