2 Ṯabahubaꞌari Tirama aika Hamaka mai Obiapaka Iesu Keriso ekia aokoꞌo hoana mai baibua hanona ahamiai kemiaho.

3 Uahoꞌabamai e,

ai wai paumiai rani ikoikiai Tirama namo ꞌabina ṯabena,

weiana hanona ebero pokina wai emi aꞌikakauma hanona niapaꞌua hao apaꞌua hao,

mai emi raonaꞌau ha ha heremiai mai ꞌabami herekiai hanona nikaraꞌau niao.

4 Hau haiara ikoikiai mai baihobo ikoikiai aokiai tubapahihi abomo emi aꞌikakauma aꞌi tuhabona,

weiakia haukia Tirama ena marea ha ha haukia wairakiai ṯapainakia.

5 Taba neiakia ikoikiai tibawaira tinana hanona Tirama ena bakaiai tebero.

Wai Tirama ena obia aiarana paunai bariu haiara tuhoaina,

ia keao puana hanona wai bero katoaꞌina Tirama ena obia aiarana haumi.

6 Tirama hanona mai ena bero.

Ia kehore weiakia wai teba haiaranimi haukia ꞌarakia kebamuenakia keba haiaranakia.

7 Haiara tuhoaina haumi wai ai kipokia ꞌaraka kebenaka kaharai.

Obiapaka Iesu kupai kewaira tina ena aneru taburakia kipokia katemai raninai neiana hanona kerama.

8 Ia kemai mai iruba upana,

weiakia Tirama aꞌi ṯeꞌiobina haukia mai eka Obiapaka Iesu ena pou namona aiana aꞌi tikaꞌaina haukia hanona puma kebahoainakia.

9 Ia katehaiara banaibanai mai puma katehoaina abomo katekatuꞌa baihana Obiapaka wairanai mai ena hiabu nuabina herenai.

10 Obiapaka kemai beraurana weianai ena maearima robekia katekuti aina mai weiakia teaꞌikakaumana haukia ikoikiai katebanamona.

Weiana aonai wai abomimo baiatakiai weia pokina pou tahinana wai heremiai hanona toaꞌikakaumana.

11 Neiana ṯaraonana paunai,

ai wai ahamiai ṯabahubaꞌari toꞌona,

weiana eka Tirama kehore miaho banaibanai haumiai kebaonimi ena apari ihobonai,

mai ia kehore ena hiabuai emi hoahoa anikia namokia kebaramanakia mai emi aꞌikakauma akakia ikoikiai kebatohanakia.

12 Taeara neianai eka Obiapaka Iesu atana wai paumiai katebanamona,

ba ia paunai wai katebanamonimi,

eka Tirama mai Obiapaka Iesu Keriso ekia aokoꞌo hoana paunai.