Ai Paumaiai Katobahubaꞌari.
3
Uahoꞌabamai e,
orenai ai paumaiai katobahubaꞌari,
Obiapaka ena pou kerama otarai biaina ba kateaꞌi taeana mai aonamokia ihobona wai heremiai erama ꞌabana.
2 Abomo katobahubaꞌari weiana Tirama kehore poꞌo haukia mai aka kiꞌa haukia herekiai keba karahinamai,
pokina maearima boꞌona Keriso aꞌi tiaꞌikakaumana.
3 ꞌA Obiapaka hanona aia ibabua ꞌau hauna,
ia kehore kebataburanimi mai keꞌaeanimi aka kiꞌa haukia herekiai.
4 Ai Obiapaka aonai wai ṯabatohanimi tabahi ahinimi aka naiakia tubabainakia haukia katobabai toꞌona.
5 Obiapaka kehore aomi keꞌuai ainakia Tirama ena raonaꞌau anina mai Keriso ena bapahihi hoana katoꞌiobi harainakia.
Aka Namona Ibabainai Aꞌi Katohauhororo.
6 Uahoꞌabamai e,
eka Obiapaka Iesu Keriso atanai ṯaharabunimi,
uahoꞌabaka weiakia tiaboro ꞌao baꞌiobi tabenimi ihobokiai aꞌi ṯemiaho haukia herekiai katokapare.
7 Weiana ai tababaina hauna wai kipomi aba toꞌiobina aea katokaꞌa aiho.
Ai wai heremiai raninai aꞌi taꞌaboro ꞌapua.
8 Ai maearima ekia aniani aꞌi tani ꞌabaea ia ꞌarakia tahorenakia,
ai hanona rabi mararani taka taroꞌari pokina wai puma aꞌi tamabenimi.
9 Ua tababai aiho hanona ai mai emai bero baraibarai weiana kataꞌina,
ꞌa neiana tababaina hanona ihaiha tabana wai taearanai katokaꞌa.
10 Ai wai heremiai aonai bairobe neiana abomo tabenimi,
“Hau ha aꞌi keaka raninai,
ia aꞌi keaniani.”
11 Ai ꞌuru ṯaoꞌo baiatamiai maearima baika hanona teꞌaboro,
aka ha aꞌi tibabaina tiaomo maearima baika ekia aka aokiai titoto.
12 Obiapaka Iesu Keriso atanai ṯahina benakia mai ṯabahi ahinakia,
katemia ꞌororo ekia aniani tabu akakia katebabai ekia aniani katerama.
13 Uahoꞌabamai e,
wai aka namona ibabainai aꞌi katohau hororo.
14 Hau ha emai baꞌiobi ꞌabikia marere neiana aonai aꞌi niaꞌi taeanakia hauna hanona katoiha ꞌinina,
ia kipokia aꞌi katobahamomo,
ba kipona abiabina keonobaina hanona kehaumaea.
15 Ia hau weiana katoihana hanona ꞌou haunai aꞌi katobaona,
ꞌa uahoꞌabami ai katobaona katorobena.
Banamo ꞌAbina Orena.
16 Obiapaka hana eka baibua pokina hauna,
bariu ai ṯanoina ia kehore kipona baibua kebenimi.
Rani ikoinai mai taeara ikoikiai Obiapaka hana wai ikoimiai heremiai.
17 Au Paulo eꞌu banamo ꞌabina neiana imaꞌu tohanai narerena,
eꞌu marere ikoikiai aokiai hanona ṉa narere aihonakia katobatohana au eꞌu marere.
18 Ai ṯabahubaꞌari eka Obiapaka Iesu Keriso ena aokoꞌo hoana hana wai ikoimiai heremiai kemiaho.