Tirama Aona Ibanamona Maurina.
4
Uahoꞌabamai e,
puana neiana,
ai tabaꞌiobinimi aea katomiaho aiho Tirama keaonamo hauna aba tubabaina emi mauriai.
Bariu Obiapaka Iesu atanai ṯanoinimi haeamona ṯabahi ahinimi mauri neianai katomiaho toꞌona.
2 Wai aba toꞌiobina baꞌiobi ꞌabina aeana hauna tabenimi Obiapaka Iesu ena hiabuai.
3 Tirama ena nuatae hanona neiana,
wai ikoimiai hanona katorobe.
Wai maha porepore hoakia katohabonakia.
4 Ba ikoimiai ha ha atawami kipokia hauanimi katerobe mai marikimi katomiaho.
5 Aꞌi katonabau rama haeai haukia ꞌabakia,
ia haukia hanona Tirama aꞌi teꞌiobina.
6 Babai neiana aonai hau ha uahoꞌabana rabona keaꞌi kiꞌana hanona Tirama kehore ena kiꞌa ꞌarana kehorena,
ai aba tahina benimi haeamona tabaꞌiobinimi.
7 Tirama eaparinaka hanona maha porepore paunai ahaꞌi,
ia mauri robenai kahamiaho paunai.
8 Ua buonai baꞌiobi ꞌabina neiana nibakiꞌana hauna hanona maearima aꞌi nibakiꞌana,
ia Tirama nibakiꞌana,
ia hanona Auba Robe ebenimi.
9 Uahoꞌabaka aea kaharaonaꞌau aihonakia ꞌabina hanona aꞌi katarere benimi,
pokina Tirama wai aba ebaꞌiobinimi ha ha katoraonaꞌau ainimi.
10 Wai neiana aba tubabaina ba uahoꞌabaka Makedoniai ikoikiai turaonaꞌau ainakia.
Uahoꞌabamai e,
ai ṯabahi ahinimi naiana katobabai hao babai haona.
11 Ai tahina benimi ihobonai emi miaho maurina katobabai haraina katomia ꞌororo,
kipomi emi roba katoahu mai emi aniani akana kipomi imami tohakiai katobabai.
12 Mauri namona weiana kehore murimuri haukia katemariki ainimi,
ba wai hau ha ahanai aꞌi katoehe ꞌau aꞌi katonoinoi.
Obiapaka Ena Mai Mue.
13 Uahoꞌabamai e,
ai ṯanuatae ainimi,
weiakia teꞌari haukia poukia hanona katoꞌiobina,
weiakia ekia buabeni ahaꞌi haukia ꞌabakiai aꞌi katoao aomi aꞌi keaokoꞌo.
14 Aika nahaꞌikakauma Iesu eꞌari haeamona emikiri mue,
weiana haꞌiobina Tirama Iesu kemaiaina raninai weiakia Iesu teaꞌikakaumana teꞌari haukia kipokia Tirama ena mauri ꞌekanai kebakaꞌa totonakia.
15 Obiapaka ena baꞌiobi ꞌabina neiana ai wai ṯahina benimi,
aika miaho hauka tai kemiaho keao Obiapaka ena muemai raninai haukia aba teꞌari haukia aꞌi kekahaonakia.
16 Tirama ena pihi keꞌarara mai aneru apaꞌuana baꞌiobi ꞌabina keio aina aonai Obiapaka kipona kupai keriri kemai hanona Keriso teaꞌikakaumana teꞌari haukia katemikiri ꞌuai.
17 Weiana murinai aika hanopaka ai kahamiaho oho hauka keaꞌi taeanaka kahaeao ꞌauhao ꞌubinai ia kipokia kebararonaka Obiapaka kipokia kahabaitabu ahi,
ba aika weia Obiapaka kipokia kahamiaho banaibanai.
18 Ua buonai ꞌabi neiakiai ha ha kahaba taburanaka.