Kahabaꞌoru Obiapaka Ena Mai Paunai.
5
Uahoꞌabamai e,
taba neiakia katerama ranikia mai wapukia hanona wai aꞌi katarere benimi.
2 Pokina wai abomo aba toꞌiobi haraina Obiapaka ena muemai beraurana hanona bainao hauna rabi nimai ꞌabana.
3 Weiana maearima kateꞌabi,
“Taba ikoikiai tenamo aba nahamiaho harai” raninai,
kiꞌa rarina ꞌakina kebataꞌu kemai ahakiai,
matoha babiꞌe nimauri haiarana ꞌabana,
ekia robo ꞌau taearana ahaꞌi.
4 Uahoꞌabamai e,
wai hanona wapurai aꞌi ṯomiaho paunai beraura neiana wai aꞌi kebataꞌutaꞌu hurinimi bainao hauna ꞌabana.
5 Wai ikoimiai hanona ea nahuna mai beraura nahuna haumi.
Aika ikoikai hanona rabi ꞌao wapura ꞌeuna hauka ahaꞌi.
6 Ua buonai aika hanona tiparua haukia ꞌabakiai aꞌi kahaeao aꞌi kahaparua,
ia aika hanona kahanoꞌa aoka ketabura.
7 Pokina parua haukia hanona rabi tiparua,
abomo inuinu haukia hanona rabi ṯeinuinu.
8 ꞌA aika hanona beraura ꞌeuna hauka buonai aoka ketabura,
aꞌikakauma mai raonaꞌau aonai kahamiaho haharaka iꞌaeanai keao abomo bamauri buabena hanona kahabauꞌuna araka ibahu abunai keao.
9 Tirama aika etinaꞌanaka hanona ena opuere kahahoaina paunai ahaꞌi,
ia aika bamauri kahaꞌina eka Obiapaka Iesu Keriso paunai.
10 Aika paukai Iesu eꞌari hana ena mue mai raninai hamauri ꞌao haꞌari reꞌa aika ia kipokia kahamiaho haeamo.
11 Ua buonai aba tubabaina ihobonai ha ha katoba taburanimi mai katobakori ꞌininimi.
ꞌAbi Orekia Mai Banamo ꞌAbina Orena.
12 Uahoꞌabamai e,
bariu ṯanoinimi naia baiatamiai barai barai akana tibabaina haukia weiakia Obiapaka etinaꞌanakia kateꞌuai ainimi katerobenimi haukia katomariki ainakia.
13 Ekia aka paunai ia katomariki ainakia mai katoraonaꞌau ainakia,
mai baibuami ha ha kipokia katomiaho oioi.
14 Uahoꞌabamai e,
ai ṯabahi ahinimi,
ꞌaboro haukia katorobenakia,
ao ꞌubo haukia katoba taburanakia,
ꞌabeꞌabe haukia katobarainakia,
ikoikiai herekiai katobakiro.
15 Katoraona ꞌinina ha ena kiꞌa ꞌarana aꞌi katohorena,
ia rani ikoinai katobabai harai ꞌabami herekiai mai maearima ikoikiai herekiai.
16 Rani ikoinai katoaonamo,
17 katobahubaꞌari toꞌo baihana,
18 taba ikoikiai aokiai Tirama katobanamona,
pokina neiakia hanona Tirama ena nuatae wai Keriso Iesu ꞌeunai haumi emi mauriai katobabainakia.
19 Auba Robe ena aka aꞌi katobaꞌorona matoha iruba aꞌi katobaꞌaona ꞌabana.
20 Auba Robe herenai timai ꞌabikia aꞌi katobaoao ainakia.
21 Taba ikoikiai katohobonakia,
ba namokia haukia hanona katoꞌini benakia.
22 Ia taba kiꞌa obokia ikoikiai herekiai hanona katokapare.
23 Baibua nibenaka Tiramana ṯanoina,
ia kehore taeara ikoikiai aokiai kebaberonimi kebarobenimi,
ba aubami,
aomi mai hauanimi maikoinai keꞌini benakia,
eka Obiapaka Iesu Keriso ena mue mai raninai beho ikoikiai herekiai kebakaparenimi.
24 Eaparinimi hauna hanona ena ꞌabi nibatohanakia,
ia kehore neiana kebabaina.
25 Uahoꞌabamai e,
ai paumaiai katobahubaꞌari.
26 Uahoꞌabaka ikoikiai baipau robenai banamo katobenakia.
27 Obiapaka atanai au wai nahina benimi,
marere neiana hanona katotuabina uahoꞌabaka ikoikiai wairakiai.
28 Eka Obiapaka Iesu Keriso ena aokoꞌo hoana ahamiai kemiaho.