1 Tesalonika 3

Weia katabaiꞌima homaꞌa taobona aꞌi etaina buonai tanuatae ikupaiamai Atene ai katamiaho.

2 Uahoꞌabaka Timoteo tauhuna,

ia hanona Tirama ena aka hauna Keriso ena pou namona neiroro aina hauna ewahi heremi emi aꞌikakauma kebataburana mai kebakironimi.

3 Weiana puraꞌa neiakia paukiai wai naiami ha aꞌi komue,

wai aba toꞌiobina puraꞌa hanona aika kahahoainakia haukia.

4 Naia kipokia hamiaho aonai aba tahinabe ꞌuainimi aika hanona puraꞌa kahahoainakia,

ba aba erama neiana.

5 Ua buonai au weia kabaiꞌima homaꞌa aobona aꞌi etaina buonai abaiuhu emi aꞌikakauma kaꞌiobina,

au ataꞌu hanona taeara baikai baihobo hauna Tiaporo kehobonimi reꞌa emai aroꞌari anina aꞌi meahaꞌi.

6 Timoteo heremiai naia bariu abemue emai heremai,

emi aꞌikakauma mai emi raonaꞌau poukia namokia emaiainakia.

Ai haiamaiai eꞌabi,

wai rani ikoinai turaona kiꞌa bahanamai ṯonuatae patoihanamai ihobonai ai abomo ṯanuatae pataihanimi.

7 Ua buonai uahoꞌabamai e,

emai aroꞌari emai puraꞌa aokiai wai emi aꞌikakauma ehore ai eba taburanamai.

8 Bariu ai emai miaho hanona abenamo,

pokina wai Obiapaka ꞌeunai aba tukori ꞌini.

9 Eka Tirama atanai wai ṯaonamoai kiꞌa bahanimi weiana banamo ꞌabina Tirama wairanai aea katahina aihona?

10 Rabi mai mararani ai ṯabahubaꞌari tabura ṯanuatae wai pataiha muenimi,

emi aꞌikakauma ena ꞌabeꞌabe ꞌekakiai pataba taburanimi.

11 Ṯanuatae bariu Tirama aika Hamaka mai eka Obiapaka Iesu katehore taeara ha katebaꞌoruna ai ꞌeumai katawahi heremi.

12 Eka Obiapaka kehore emi raonaꞌau kebapaꞌuana kebabonu ꞌaunimi ha ha katoraonaꞌau ainimi abomo maearima ikoikiai katoraonaꞌau ainakia,

ai wai ṯaraonaꞌau ainimi ihobona.

13 Taeara ṉahomanai Obiapaka kehore aomi keba taburanakia,

eka Obiapaka Iesu ena robe haukia kipokia katemai raninai wai hanona robe haumi mai beho ahaꞌi haumiai katoao Hamaka Tirama wairanai.