Paulo Ena Aka Tesalonika ai Hauna.
2
Uahoꞌabamai e,
wai kipomi aba toꞌiobina ai tawahi heremi hanona mai anina.
2 Aba toꞌiobina ai Pilipo ai puraꞌa tahoaina mai tebataeainamai ba tawahi wai heremi.
Tebatetua kiꞌanamai mo ia ꞌabi nahaꞌi,
ia eka Tirama ebataburanamai ena pou namona tairoro aina heremiai.
3 Emai batabura ꞌabikia hanona raona kiꞌai ahaꞌi ꞌao raona opukiai ahaꞌi ꞌao baiꞌoiai ahaꞌi.
4 Ia ai hanona Tirama eaꞌi taeanamai ena pou namona ebenamai hauna ṯahinana,
ai maearima kataba aonamonakia paunai ahaꞌi ia aoka eꞌiobina Tiramana aona kenamo paunai.
5 Wai toꞌiobina ai aoani ꞌabikia aꞌi tabenimi ꞌao emai aoꞌaea harabukia aꞌi tabenimi.
Tirama hanona ai nibatohanamai.
6 Ai mariki aꞌi ṯatabuna maearima herekiai mai wai heremiai ꞌao baika herekiai.
7 Ai Keriso ena iuhubeau haumai paunai taba boꞌona heremiai patanuataeai,
ia ai wai baiatamiai hanona taꞌaiaunu matoha babiꞌe nahuna neꞌimanakia.
8 Ai ṯanuatae ainimi Tirama ena pou namona mo ikupaiana aꞌi katabenimi ia emai mauri abomo katabenimi,
pokina wai ṯaraonaꞌauai kiꞌa bahanimi.
9 Uahoꞌabamai e,
aba toꞌiobina Tirama ena pou namona tairoro aina heremiai hanona taroꞌari kiꞌa rabi mai mararani taka aniani itabukiai pokina hau ha puma aꞌi katabena.
10 Wai mahamiai toihana,
abomo Tirama eꞌiobina ai wai aꞌikakauma haumi baiatamiai hanona emai babai erobe,
ebero abomo behona ahaꞌi.
11 Wai toꞌiobina ai ha ha taiha ꞌininimi matoha hama ha nahuna tohakia neꞌimanakia.
12 Ai tabataburanimi,
aomi tabakirona abomo tabahi ahinimi Tirama ena nuatae maurina aonai katomiaho,
Tirama hanona eaparinimi ena aiara nuabina aonai katomiaho.
13 Ai rani ikoinai Tirama namo ṯabena,
pokina Tirama ena ꞌabi heremaiai tona hauna toaꞌina aonai maearima ekia ꞌabiai aꞌi tobaona,
ꞌa toaꞌi haraina Tirama ena ꞌabi tohanai tobaona,
Tirama ena ꞌabi weiana hanona tuaꞌikakauma haumi aomiai niaka.
14 Uahoꞌabamai e,
wai hanona Tirama ena maearima Iudeai ꞌabanai toao,
ia hanona Keriso Iesu tiaꞌikakaumana,
Tirama ena maearima weiakia Iudeai ekia maearima herekiai puraꞌa tehoaina ihobona mo wai abomo emi maearima herekiai puraꞌa tohoaina.
15 Iuda haukia hanona Obiapaka Iesu mai mahabanai haukia teahu ꞌarinakia,
ai abomaimo teura ahinamai.
Ia Tirama aona tebaopuerena mai maearima ikoikiai ekia ꞌou haukiai teao.
16 Ia tehore rama haeai haukia katairoro benakia ia mauri kateaꞌina taearana weiana tekaiabuna.
Neiana tibabaina hanona ekia kiꞌa tibapaꞌuanakia,
Tirama ena opuere hanona aba ia ahakiai.
Paulo Enuatae Keiha Muenakia.
17 Uahoꞌabamai e,
rani papana ai tahabonimi aonai hauaniai hanona baiataka epaꞌa ia aubai hanona ahaꞌi,
ai taraona kiꞌanimi taeara tatabu pataihanimi.
18 Ai taeara tatabu patawahi heremi,
ꞌabi tohana au Paulo rani baika ahobona taeara atabu,
ꞌa Satani hanona emai taeara ekaiabunakia.
19 Eka Obiapaka Iesu Keriso ena muemai raninai,
emai buabeni,
emai aonamo mai emai apa hoana hanona taba ia wairanai?
Weiana hanona wai.
20 ꞌAbi tohana,
emai apa mai emai aonamo pokina hanona wai.