1 Tesalonika 1

Paulo Ena Marere Koriꞌuaina

TESALONIKA

Haukia Herekiai

Banamo ꞌAbina.

Au Paulo,

Sila^a mai Timoteo emai marere ṯarerena niwahi marea robe haumi Tesalonikai ṯomiaho haumi heremi,

wai hanona Tirama aika Hamaka mai Obiapaka Iesu Keriso ꞌeukia.

Ai ṯabahubaꞌari Tirama ena aokoꞌo hoana mai baibua ahamiai kemiaho.

Tesalonika Haukia Ekia Mauri Mai Ekia Aꞌikakauma.

2 Ai rani ikoinai wai paumiai Tirama namo ṯabena mai atami ṯahinana emai bahubaꞌari aokiai.

3 Ai Hamaka Tirama wairanai emi aꞌikakauma akana tobabaina hauna mai emi raonaꞌau hoana toaroꞌari hauna haeamona emi buabeni Obiapaka Iesu Keriso herenai tobakori ꞌinina hauna ṯaraona ꞌininakia.

4 Uahoꞌabamai e,

ai aba taꞌiobina Tirama wai eraonaꞌau ainimi abomo etinaꞌanimi.

5 Pokina eka pou namona ekaraꞌau heremiai hanona ꞌabi ꞌabaeanai mo ahaꞌi ia mai hiabuna Auba Robe ai wai aomiai ebatohana.

Ai wai kipokia aea hamiaho aiho hanona wai aba toꞌiobina,

weiana hanona wai emi namo.

6 Tohau haiara kiꞌa baha mo ia ꞌabi nahaꞌi,

ia ai ꞌabamai ai mai Obiapaka ꞌabanai toao ꞌabi toaꞌi taeana mai aonamomi weiana hanona Auba Robe herenai emai.

7 Ua buonai wai hanona aꞌikakauma haukia ikoikiai Makedonia ai mai Akaia ai haukia ekia ihaiha tabanai toao.

8 Obiapaka ena pou namona wai heremiai ꞌuruna ekarahi hauna Makedonia mai Akaia ai mo aꞌi epua ia eao ꞌeka maikoina,

emi aꞌikakauma Tirama herenai hauna abomo ꞌeka maikoinai ekana.

Weiana buonai ai ꞌabi ha katahinana hanona ꞌekana ahaꞌi.

9 Pokina ai aea toaꞌi taea aihonamai hanona ia kipokia pouna tehinana mai aea toraona kabe aiho kaibaꞌuku tiramakia tohabonakia ꞌa Tirama tohana mauri Tiramana taꞌarana toaꞌi,

10 mai Tirama Nahuna Iesu ꞌariai emikiri hauna kupai kemai hauna ṯoꞌimana pouna abomo tehinana.

Iesu hanona Tirama ena opuere kemai aonai araka kebamaurina.