Keriso Kipokia Aba Hamikiri Mue.
3
Weiana paunai,
wai hanona Keriso kipokia aba tomikiri mue buonai aomiai hanona kupa aona tabakia mo katotabunakia,
weia Keriso Tirama itipana tainai emiati.
2 Aomiai hanona ꞌubi tabakia weiakia katoraonanakia,
ia hanopaka neiana tabakia aꞌi katoraonanakia.
3 Pokina wai hanona aba toꞌari,
ba emi mauri hanona Keriso kipokia aba Tirama aonai ebunina.
4 Keriso hanona wai emi mauri pokina tohana,
ba kewaira tina raninai wai abomo ia kipokia katowaira tina haeamo ena nuabi weiana aonai.
Aika Hanona Aba Maearima Mahamahaka.
5 Ua buonai hanopaka maurina ena nuatae akakia aomiai ṯemiaho haukia katobaꞌarinakia,
hoahoa neiakia maha porepore,
raona ꞌopukia,
rea,
raona kiꞌa obokia,
uhore.
Uhore hanona kaibaꞌuku ikutiaina hoana.
6 Pokina hoahoa weiakia paukiai Tirama ena opuere nimai maearima weiakia aiana aꞌi tiaꞌi taeana haukia herekiai.
7 ꞌUainai wai abomo ua tomiaho aiho hauani ena raona taearakiai.
8 Ia bariu hanona wai hoahoa neiakia ikoikiai katohabonakia,
opuere,
ao kiꞌa,
raona kiꞌa,
uahiuahi,
mai baibata ꞌabikia,
weiakia ha pinamiai aꞌi katohina ꞌapuana.
9 ꞌAbami herekiai aꞌi katobaiꞌoi,
pokina emi mauri ꞌaiꞌaikia ekia hoahoa hanona aba tobakuri obonakia.
10 Ia bariu wai hanona hauani mahamahana aba tobatotona.
Hauani maha mahana neiana hanona barama Tiramana ena aotipai rani ikoinai kebamaha mahanimi keaomo ia kipona ihaihanai katoao.
11 Mauri mahamahana neiana aonai hanona Iuda hauna ahaꞌi hauna ꞌao Iuda hauna,
tetarena hauna ꞌao aꞌi tetarena hauna,
aona aꞌi niea hauna ꞌao nua kiꞌa hauna,
taꞌaraꞌi hauna ꞌao taꞌara aꞌi niaꞌi hauna,
weiakia ikoikiai ekia haeai ahaꞌi,
ikoikiai hanona Keriso ꞌeuna,
Keriso hanona ikoikiai aokiai nemiaho.
ꞌAbaka Kahaꞌi Turinakia.
12 Wai hanona Tirama etinaꞌanimi,
ebarobenimi,
mai niraonaꞌau ainimi maearimami,
ua buonai wai kipomi aokoꞌo,
rabo harai,
ꞌaiaunu,
mamata mai bakiro katobatotonakia emi mauriai.
13 ꞌAbami katoaꞌi turinakia mai emi ꞌabi baitaeai aꞌi nirama baha aonai ekia kiꞌa katohina hao ihobona Obiapaka emi kiꞌa ehina hao ꞌabana,
wai abomo ua katobabai aiho.
14 Ba taba neiakia ikoikiai ahakiai hanona raonaꞌau katohore ꞌauna,
pokina raonaꞌau nihore taba ikoinai niba hamomonakia nibabero ꞌaunakia.
15 Keriso ena baibua hanona aomi kepoki aina,
weiana paunai Tirama ehore eapari haeamonimi hauani hamona aonai.
Rani ikoinai banamo ꞌabina Tirama katobena.
16 Keriso ena ꞌabi hanona aomiai kemiaho keobia,
weiana ha ha kipomi aobero maikoinai katobaꞌiobi mai kato bairobe,
Salamo ai,
hui ai,
auba huikiai Tirama katobanamona mai aomi ikoinai banamo raonaraonai.
17 Emi akai ꞌao emi ꞌabiai,
tabakia ikoikiai hanona Obiapaka Iesu atanai katobabai,
abomo Hamaka Tirama banamo ꞌabina katobena Iesu paunai.
Bairobe Rama Hamona Aonai.
18 Babiꞌe e,
atawami aokia katokaꞌainakia,
pokina weiana hanona ebero Obiapaka wairanai.
19 Hau e,
atawami katoraonaꞌau ainakia,
aokia aꞌi katoba haiaranakia.
20 Miori mai uaho e,
taba ikoikiai aokiai hamami hinami aiakia kato kaꞌaina,
ba weiana hanona Obiapaka aona ibanamona.
21 Hama hina e,
nahumi aꞌi katobaꞌabi kiꞌanakia,
aokia aꞌi meꞌabeꞌabe marikina.
Taꞌaraꞌi Hauna Mai Poki Hauna.
22 Taꞌaraꞌi haumi e,
hanopakai tipoki ainimi haukia rani ikoinai aiakia katokaꞌainakia,
ia pateihanimi patebanamonimi paunai ahaꞌi,
ia mai aomi ikoinai katoaka ihobona Obiapaka tumariki aina tuaka ꞌabana.
23 Aka tabana tubabaina hauna katobabaina mai aomi ikoinai,
ihobona matoha Obiapaka ena aka tubabaina ꞌabana ia maearima ꞌeukia ahaꞌi.
24 Aba toꞌiobina Obiapaka itau aba kebaꞌoruna katoaꞌina wai aramiai keao,
pokina wai hanona emi poki hauna tohana Keriso ena aka haumi.
25 Ia aka kiꞌa haukia ekia aka kiꞌa weiana ꞌarana ihobona kateaꞌina,
pokina Tirama hanona maearima ha aꞌi nitaina.