Pilipo hanona aiara apaꞌuana ha Makedonia ai (Iuhubeau 16), Paulo ehore pou namona eiroro aina ꞌekana. Weiana murinai, eao ꞌeka ha hanona wapura ituai tekapo totona, ba pou eona hanona maearima baika tehore Pilipo haukia ekia aꞌikakauma tibahaeaina. Iamo puka neiana aonai hanona atetua weiakia aꞌi kahatabu ahinakia. Paulo ena aꞌikakauma hanona Iesu aonai ehoroti tohana, ua buonai ia hanona aona namonai. Paulo ena mauri aonai hanona ehau haiara, euraru mai hauani tabakia enuatae ainakia.

Ua buonai puka neiana irerenai hanona Paulo enuatae namo ꞌabina apaꞌuana kebaibeni pokina Pilipo haukia ekia barai barai ia herenai hanona eapaꞌua kiꞌa baha paunai. Mai taba ha hanona, Paulo ena nuatae apaꞌuana hanona ekia aꞌikakauma kebatabura muenakia katekori ꞌini, pokina aꞌi temeraona Paulo hanona bariu aba wapura itu aonai ba aꞌi temeaokoꞌo mue. Paulo ia nehina benakia, beruberu weiana Tirama herenai tetabu ahina hanona mauri mahamahana ba weiana hanona Keriso aonai tetabu ahina. Paulo ena nuatae apaꞌuana hanona Pilipo haukia Keriso ena hoahoa mai ena babai kateaꞌinakia katemauri ainakia. Weiana Keriso kipona aona ebaꞌaiaununa, ba aka weiana Tirama ehore ia ebena hauna katebaore haraina.