Paulo Ena Marere
PILIPO
Haukia Herekiai
Banamo ꞌAbina.
1
Paulo mai Timoteo,
ai Keriso Iesu ena taꞌara iaꞌina haumai,
marere neiana ṯarerena niwahi wai robe haumi ikoimiai Pilipo ai ṯomiaho Keriso Iesu tuaꞌikakaumana haumi mai ihaꞌini haukia mai tibarainakia haukia kipokia heremi.
2 Ṯabahubaꞌari Tirama aika hamaka mai Obiapaka Keriso Iesu ekia aokoꞌo hoana mai baibua hanona ahamiai kemiaho.
Paulo Ena Bahubaꞌari Pilipo Haukia Paukiai.
3 Rani ikoikiai naraonanimi aonai eꞌu Tirama nabanamona.
4 Eꞌu bahubaꞌari ai hanona mai aonamoꞌu nabahubaꞌari wai ikoimiai paumiai,
5 pokina emi aꞌi turi pou namona akana herenai iaꞌi ramana raninai emai mo bariu.
6 Weiana buonai aba aꞌiobina Tirama aka namona weiana aomiai ebaramana hauna aka weiana nibabaina keao mo Keriso Iesu ena mai mue raninai kebaore haraina.
7 Taeara neianai eꞌu raonaraona ikoimiai heremiai hanona ebero,
au hanona wai naraona toꞌo baihanimi,
pokina bariu au nawapura aonai abomo pou namona auhore aina abakori haraina ranikiai ikoikiai toaꞌi turinaꞌu Tirama ena aokoꞌo hoana aonai.
8 Au Keriso Iesu aonai ikoimiai aea naraonaꞌau aihonimi hanona Tirama neꞌiobina.
9 Eꞌu bahubaꞌari hanona neiana.
Emi raonaꞌau hanona pekupu toꞌona ꞌiobiai mai aoberoai,
10 weiana paunai wai hanona taba namokia tohakia katotinaꞌanakia,
aomi kemahamaha mai beho aꞌi katoaꞌina keao mo Keriso ena mai mue raniai,
11 aka bero buabuakia Iesu Keriso ꞌeunai temai haukiai katobonu,
weianai Tirama ena nuabi ibawaira tinana mai ibanamona.
Paulo Wapura Itunai Emiaho Pou Namona Ibarainai eao.
12 Uahoꞌabaꞌu ikoimiai e,
au nanuatae katoꞌiobina taba weiana hereꞌuai erama hauna hanona pou namona ibarainai eao.
13 Pokina obia ꞌarana Kaisa ena itu iꞌimana haukia ikoinai mai maearima ikoinai teꞌiobina au hanona Keriso paunai wapura itunai namiaho.
14 Au nawapura paunai,
uahoꞌabaka boꞌona Obiapaka niba nuakoꞌonakia,
aꞌi titaꞌu Tirama ena ꞌabi ṯehinana mai taburakia.
15 ꞌAbi tohana Keriso pouna ṯeiroro aina aonai baika hanona mai wamurukiai mai baiarakiai,
ia baika hanona aokia namokiai.
16 Baika neiakia hanona raonaꞌauai ṯeiroro aina pokina teꞌiobina aka neiana Tirama ebenaꞌu hanona pou namona kauhore aina.
17 Baika weiakia hanona Keriso pouna aokia namokiai aꞌi ṯeiroro aina,
ia ekia nuatae hanona atakia patebapaꞌua,
mai ekia raona hanona wapurai namiaho aonai eꞌu haiara patebapaꞌuana.
18 ꞌAbina ahaꞌi.
Baiꞌoiai ꞌao tohakiai ṯeibiu ibiu,
ia taba apaꞌuana hanona Keriso pouna aba ṯeiroro aina,
neiana paunai au naonamo.
ꞌE,
au hanona kaonamo toꞌona.
19 Au aꞌiobina weiana emi bahubaꞌari ai abomo Iesu Keriso Aubana ena baraibarai ai,
taba hereꞌu ai erama hauna kehore ibamauriꞌu ai keao.
20 Eꞌu nuatae apaꞌuana mai eꞌu buabeni hanona neiana eꞌu aka aokiai aꞌi kahaumaea,
ia ꞌuaina raninai ihobonai bariu abomo panuakoꞌo harai,
mauriai ꞌao ꞌariai reꞌa rani ikoikiai hauaniꞌu ai Keriso atana kabapaꞌuana.
21 Pokina eꞌu mauri aonai hanona Keriso,
eꞌu ꞌari ai abomo namo katabu ahina.
22 Ia hauani maurinai kamiaho aka namokia kababai mo raninai,
ia aꞌi naꞌiobina aeana hauna katinaꞌana.
23 Au hanona ꞌeka rua baiatanai namiaho,
nanuatae mauri neiana kahabona kaeao Keriso herena,
weiana hanona kenamo hereꞌu ai.
24 ꞌA mauriꞌu ai namiaho hanona taba apaꞌuana tohana pokina kabarainimi paunai.
25 Aba aꞌiobi haraina hanona neiana,
au hanona ꞌekaꞌu ai kamiaho,
mai wai ikoimiai kipokia kahabahaeamo emi aꞌikakauma ibapaꞌuanai mai aonamomi paunai.
26 Weiana buonai au kamue kamai heremiai raninai,
wai hanona Keriso Iesu aonai emi aonamo keapaꞌua au pauꞌuai.
27 Taba apaꞌuana hanona neiana,
Keriso ena pou namonai kipomi hoahoa namonai tomobakaꞌa harainimi.
Weiana kawahi kaihanimi ꞌao aꞌi kawahi reꞌa poumi mo paona,
wai hanona raona hamonai tukori ꞌini ṯohuari pou namona iaꞌikakaumanai.
28 Taba ikoinai tiꞌoatanimi haukia aꞌi katotaꞌu ainakia katotabura.
Weiana hanona ia ekia ꞌari hoana,
ia wai heremiai hanona mauri hoana Tirama herenai nimai.
29 Keriso paunai eberuberu benimi hanona ia iaꞌikakaumana mo kipona ahaꞌi,
ia paunai katohau haiara.
30 Wai abomo tuaꞌi turinaꞌu huari neiana aonai,
weiana hanona ꞌuainai toihanaꞌu ihobona,
bariu abomo pou tuona au nahuari oho mo.