Puka neiana ena poki hanona ṉahomana. Tirama ena nuatae hanona taba ikoikiai kupai mai hanopakai Keriso aonai katebahaeamo. Weiana Keriso hanona taba ikoikiai ꞌarakia haunai keao (1.10). Haeamona Tirama ena nuatae hanona kipona ena maearima keberi noꞌanakia, ba ekia mauri maikoina hanona Keriso kipokia katebahaeamo, weiana aokia hanona kehamona.

Puka neiana iroꞌana koriꞌuainai hanona Paulo ehore ao namonai eꞌabi tabura, maearima kebaꞌiobi harainakia Iesu kateaꞌikakaumana, ba katebahaeamo ihobona aꞌikakauma haukia toꞌuna hamona. Pokina Iesu ena aka namona ahanai hanona Tirama maearima ebamaurinakia, ba Auba Robe kebenakia, weiana hanona ia ikupaiana kehore ena maearima ekia aka namokia kebabainakia ena ꞌabi ihobokiai (1.4). Iroꞌana ibaruanai hanona Paulo niꞌabi, maearima Keriso kipokia tebahaeamo hanona aokia kehamona haeamona Tirama ena taeara tainai katetai.

Puka neiana aonai hanona Paulo ꞌabi ibabatai boꞌona ebaibeni maearima kebaꞌiobi harainakia, weiana ekia bahaeamo Keriso kipokia hanona maearima toꞌuna hamonai tiao, matoha hauani hamona ꞌabana (4.16), ꞌao matoha itu ꞌabana (2.19-21). Puka neiana kahatuabi haraina hanona Tirama ena nuatae ena maearima ekia taba namokia kebabainakia hanona kahaꞌiobi harainakia.