Paulo Ena Marere
EPESO
Haukia Herekiai
Banamo ꞌAbina.
1
Au Paulo,
Tirama ena nuatae paunai Keriso Iesu ena Iuhubeau hauꞌu ai naeao,
wai robe haumi Epeso ai Keriso Iesu tuaꞌikakaumana haumi narere benimi.
2 Nabahubaꞌari Tirama aika Hamaka mai eka Obiapaka Iesu Keriso ekia aokoꞌo hoana mai baibua hanona ahamiai kemiaho.
Keriso Paunai Tirama Taba Namokia Kebenaka.
3 Tirama eka Obiapaka Iesu Keriso Hamana kahabanamona!
Tirama hanona aika Keriso aonai ebanamonaka,
auba ena banamo ikoinai kupa ai hauna aba ebanamo ainaka.
4 Hanopaka aꞌi ebabai bahana raninai,
Tirama ehore Keriso aonai aba etinaꞌanaka ia ꞌeuna,
weiana ia wairanai kaharobe mai kiꞌa ha aꞌi kahababaina.
5 Ena raonaꞌau ai Tirama hanona aba eraona ꞌuaina aika ena bakiro miorikiai kahaeao Iesu Keriso paunai,
ena raona weiana hanona ia ena nuatae mai ena aonamo.
6 Tirama kahabanamona ia hanona ena aokoꞌo hoana ebenaka ena nuabi aonai,
aokoꞌo weiana hanona Nahuna niraonaꞌau aina paunai aika ebeni ꞌabaeanaka.
7 Keriso eꞌari aruarunai eka kiꞌa aba ehina hao mai bamauri aba haꞌina.
Tirama ena aokoꞌo hoana hama ua eobia aiho,
8 ia ebenaka hauna eapaꞌua kiꞌa baha.
Ena ꞌiobi mai ena aobero maikoinai,
9 Tirama ena raona bunikia ꞌuainai eraonana hauna ebawaira tinana aika herekai mai aonamona,
raona weiana hanona aba ebaꞌoruna Keriso paunai kebabaina.
10 Weiana Tirama ena raona eraonana wapuna ketaina raninai,
ebabai tabakia ikoikiai keba hamomonakia kupa mai hanopaka tabakia ikoikiai ꞌarakiai hanona Keriso mo ikupaiana kepoki.
11 Tirama hanona ena nuatae ihobonai taba ikoikiai ebabainakia,
ena raona aba ebaꞌoruna hauna paunai aika eaꞌi taeanaka ia ena maearima tohakai kahaeao Keriso aonai.
12 Weiana paunai ai Keriso herenai emai buabeni nemiaho ꞌuai haumai hanona etinaꞌanamai,
Tirama ena nuabi katabanamo haraina.
13 Wai abomo ꞌabi tohana ꞌuruna tona raninai Tirama ena maearimai toao,
pouna namona weiana hanona wai ibamaurimi.
Haeamona Keriso toaꞌikakaumana ba Tirama ena ꞌabiꞌuai Auba Robena ebenimi,
weiana hanona ibatoha hoana wai ia ꞌeunai toao.
14 Auba Robe hanona ibatohana hoana koriꞌuaina Tirama kehore eꞌabiꞌuai tabakia aika kebenaka abomo ia kehore ena maearima kebamaurinakia.
Tirama ena nuabi hamabanamona.
Paulo Ebahubaꞌari Epeso Haukia Paukiai.
15 Weiana paunai,
au abomo emi aꞌikakauma Obiapaka Iesu herenai hauna mai emi raonaꞌau Tirama ena robe haukia ikoikiai herekiai hauna ꞌuruna aba aona,
16 wai paumiai banamo ꞌabina Tirama nabeni toꞌona.
Eꞌu bahubaꞌari aokiai wai atami nahinana,
17 Tirama nanoina,
eka Obiapaka Iesu Keriso Hamana nuabina kehore Auba Robe kebenimi kebaotipanimi abomo Tirama heremiai kebawaira tinana,
weiana wai hanona Tirama katoꞌiobi haraina.
18 Haeamona Tirama nanoina,
aomi mahakia kebanoꞌanakia ena ea katoihana ba katoꞌiobina,
weiana ia eaparinimi haumi emi buabeni hanona taba,
mai banamo namoabukia eꞌabiꞌuai ainakia Tirama ena robe haumi katoaꞌina hauna hanona aea keapaꞌua aiho.
19 Ba katoꞌiobina Tirama ena hiabu rarina ꞌakina weiana aika aꞌikakauma hauka herekai niaka hauna eapaꞌua kiꞌa baha ena pua ahaꞌi.
20 Tirama ena hiabu weiana hanona Keriso aonai eaka ba ꞌari haukia baiatakiai ebamikirina eaoaina kupai weia Tirama itipana tainai ebamiatina.
21 Keriso hanona aba ꞌubi ꞌakinai kupa tabakia apaꞌuakia ikoikiai ꞌubikiai,
poki haukia,
hiabu haukia,
tabura haukia,
obia haukia ikoikiai ꞌubikiai,
mai ia atana hanona aba ꞌubi ꞌakinai ata ikoikiai ꞌubikiai,
hanopaka neiana maurina aonai abomo mauri weiana wairai kemai hauna ikoikiai ꞌubikiai.
22 Tirama ehore taba ikoikiai Keriso ꞌapuna panabana baꞌanai ehorotinakia abomo Tirama ena marea haukia ikoikiai arakiai ebaona ba taba ikoikiai kepoki ainakia.
23 Tirama ena marea haukia hanona Keriso hauanina,
ꞌeka maikoinai aonai taba ikoikiai ua nibabonu aihonakia.