Keriso Kipokia Mauri Ebenaka.
2
ꞌUainai wai hanona toꞌari emi beho mai emi kiꞌa paukiai.
2 Weia tomiaho aonai hanopaka neiana ena hoahoa taina totai abomo Tiaporo weiana kupa mai hanopaka baiatakia nipoki aina hauna aiana tokaꞌa aina,
aubana hanona bariu Tirama aiana aꞌi tikaꞌaina haukia aokiai niaka.
3 ꞌUainai aika ikoikai abomo ia ihobokia hauanika ekia nuatae taikia hatai,
ekia hoahoa mai ekia raona kiꞌa obokia hababai,
maearima ikoinai ihobona ramai aika hanona Tirama ena opuere ihoaina hauka.
4 ꞌA Tirama ena aokoꞌo eapaꞌua,
ena raonaꞌau rarina herekai paunai,
5 weia eka beho paukiai aba haꞌari hauka Keriso kipokia mauri mahamahana ebeni haeamonaka.
(Tirama ena aokoꞌo hoanai wai bamauri toaꞌina.)
6 Keriso Iesu aonai Tirama ehore ia kipokia ebamikiri haeamonaka,
kupai ia kipokia ebamiati haeamonaka.
7 Weiana hanona ena rabo harai ebaihanaka Keriso Iesu aonai,
ena aokoꞌo hoana aea eapaꞌua aiho kebawaira tinana bariu mai waira ranikiai maearima kateꞌiobina paunai.
8 Pokina Tirama ena aokoꞌo hoana paunai wai Keriso toaꞌikakaumana hanona eba maurinimi.
Neiana hanona wai kipomi emi taburai ahaꞌi,
ia Tirama ena beruberu.
9 Aka harai paunai ahaꞌi,
ua buonai tai ha kipona aꞌi keapa.
10 Aika hanona Tirama ebabainaka,
Keriso Iesu aonai ebaramanaka aka namokia ibabaikia paunai,
weiana Tirama aba ebaꞌoru baihana hanona aika ua kahamauri aiho.
Aika Kahabahamomo Keriso Aonai.
11 Ua buonai tomoraonana,
ꞌuainai ramai hanona wai rama haeai haumi,
weiakia itare haukia ṉa tehoma haukia hanona wai teaparinimi ‘itare ahaꞌi haumi’.
(Weiana hanona hauani ahanai mai maearima imakiai tebabaina.)
12 Tomoraonana,
rani weianai wai hanona Keriso aꞌi toꞌiobina,
Tirama etinaꞌanakia haukia Isaraela haukia baiatakiai wai hanona ahaꞌi,
wai ꞌeka haeai haumi.
Haeamona ꞌabiꞌuai rauhubuna herenai wai maearima ꞌetemi,
hanopakai emi buabeni ahaꞌi,
mai heremiai Tirama ahaꞌi aonai tomiaho.
13 Wai ꞌuainai atauꞌai tomiaho haumi,
bariu hanona Keriso Iesu aonai ia aruarunai emaiainimi Tirama herena.
14 Keriso hanona aika eka baibua,
ia hauaninai Iuda haukia mai rama haeai haukia baiatakiai ikaiabu iꞌaeana tabana etapana,
terarua ebahamomonakia,
15 ia Iuda ekia rauhubu weiana mai rauhubu ꞌabikia tererenakia tabakia ikoikia ebaorenakia.
Pokina Iuda haukia mai rama haeai haukia terarua hanona ia kipona aonai rama mahamahanai kebaramana,
taeara neianai baibua ebabaina.
16 Haeamona matiu ibiri ropo ahanai Keriso ehore rama rua neiakia ebahamomonakia ebairarao ainakia Tirama herenai.
Neianai hanona ekia baiꞌoata ebapuana.
17 Keriso emai wai rama haeai haumi atauꞌai haumi heremiai baibua pouna namona eiroro aina haeamona herenai Iuda haukia abomo herekiai baibua pouna namona eiroro aina.
18 Keriso paunai aika ikoikai Iuda mai rama haeai haukia Auba Robe hamonai kahaeao Hamaka herena.
19 Ua buonai wai bariu hanona maearima ꞌetemi ahaꞌi ꞌao aru haumi ahaꞌi,
wai hanona Tirama ena maearima robekia kipokia itubu hamomona mai Tirama ena itu maearimami.
20 Wai hanona itu ꞌabana,
iuhubeau haukia mai mahabanai haukia tebakorina hauna ahanai wai tokori ꞌau,
Keriso Iesu ia kipona itu kupuana piharanai eao.
21 Keriso aonai itu tabakia maikoina niaraꞌau nikori niapaꞌua marea robeai niao Obiapaka aonai.
22 Ia aonai wai rama haeai haumi abomo Iuda haukia kipokia itu hamonai nibakori haeamonimi Tirama ena miaho ꞌekanai keao ena Auba Robe aonai.