Paulo Rama Haeai Haukia Ekia Iroro Hauna.
3
ꞌEka neiana buonai,
au Paulo nahina benimi au hanona Keriso Iesu ena aka paunai nawapura wai rama haeai haumi emi namo itabuna paunai.
2 Paꞌe wai ꞌuru aba tona Tirama ena aokoꞌo hoanai aka neiana ebenaꞌu wai ibaraimi taearanai.
3 Tirama ena raona bunina hanona hereꞌuai ebawaira tinana,
ba au ahore arere ꞌuai ꞌabi bita ꞌaki aokiai.
4 Weiana katotuabina raninai,
eꞌu ꞌiobi Keriso ena raona ebuni tabana aꞌina hauna aba katoꞌiobina.
5 Rani ꞌuaikia aokiai hanona Tirama raona bunina neiana maearima aꞌi ebaꞌiobinakia,
ia bariu hanona Tirama ehore ena Auba Robeai ena iuhubeau haukia robekia mai ena mahabanai haukia robekia herekiai ebawaira tinana.
6 Ebuni tabana hanona neiana,
pou namona paunai rama haeai haukia Keriso Iesu aonai Iuda haukia kipokia Tirama ena banamo hamona kateaꞌi haeamona,
hauani hamonai keba haeamonakia,
ba ꞌabiꞌuai weiana Tirama ebenakia Keriso Iesu paunai hauna kateaꞌi haeamo.
7 Tirama ena aokoꞌo hoana paunai ena hiabu aoꞌuai eaka taearanai pou namona ihinana hauꞌuai aeao.
8 Tirama ena maearima ikoinai baiatakiai au hanona taba ahaꞌi ꞌabana,
iamo Tirama aokoꞌo hoana neiana ebenaꞌu hanona rama haeai haukia herekiai Keriso ena obia eapaꞌua kiꞌa baha mai aꞌi kepua hauna pouna kairoro aina.
9 Taba ikoinai ebabainakia Tiramana ena raona bunikia ꞌuaina raninai emai mo bariu ihau boꞌokia aba teao aonai ehore bunina hauna aea kebakarahi aihona hanona au kahore kahina pounakia maearima ikoikiai herekiai.
10 Weiana buonai bariu Tirama ena marea maearimakia paukiai poki anerukia mai hiabu aubakia weiakia kupai ṯemiaho haukia abomo Tirama ena aotipa haeaihaeai kateꞌiobina.
11 Neiana hanona aba waꞌi baha Tirama eraonana eka Obiapaka Keriso Iesu aonai kebabaina hauna ebabaina.
12 Aika Keriso aonai ia naha aꞌikakaumana paunai kahatabura mai nuakoꞌoka kahaeao Tirama wairanai.
13 Ua buonai nanoinimi,
au wai paumiai ṉahau haiara hauna aomi aꞌi kebaoao,
pokina weianai wai emi nuabi katotabu ahina paunai.
Keriso Ena Raonaꞌau Katoꞌiobina.
14 Weiana paunai Hamaka wairanai nakaipehu nabahubaꞌari,
15 rama ikoinai kupai mai hanopakai hanona ia herenai terama mai atakia ebaibeni,
16 Tiramana nanoina,
ia ena obia tabakia nuabikia aokiai Auba Robe hiabunai aubami keba taburanakia,
17 ba emi aꞌikakauma paunai Keriso wai aomiai kemiaho.
Au nabahubaꞌari wai raonaꞌau aonai katoramu mai katokori ꞌini harai.
18 Weiana wai Tirama ena robe haukia ikoikiai kipokia tabura katoaꞌi haeamona,
Keriso ena raonaꞌau ena mata mai ena homaꞌa,
ena roꞌe mai ena ꞌoura aea homana hauna katoꞌiobi haraina.
19 Ba katoꞌiobina,
Keriso ena raonaꞌau hanona ekabanai kiꞌa baha ba aika eka ꞌiobi,
weiana Tirama ena taba ikoikiai kebabonunimi.