Rani weianai maearima koriꞌuaikia tohakia Iesu murinai teꞌau haukia hanona Iuda haukia. Iamo Iesu ehore Paulo iuhubeau haunai ebaona ba euhuna eao rama haeai haukia herekiai pou namona keiroro aina. Maearima boꞌona aꞌikakauma haukia kipokia tebahaeamo. Iamo atetua apaꞌuana ha erama. ꞌUaina maearima weiakia hanona Mose ena rauhubu aꞌi tekaꞌa ainakia haukia, matoha Iuda haukia Mose ena rauhubu tikaꞌaina ꞌabana, ba aꞌikakauma haukiai teao aonai rauhubu weiakia katekaꞌa ainakia ꞌao ahaꞌi? Maearima baika hanona ia tibahi ahinakia itare kateaꞌina Iuda haukia ekia hoahoa ihobonai, ba ia katehore Mose ena rauhubu katekaꞌa ainakia.

ꞌA Paulo niꞌabi weiana hanona taba apaꞌuana ahaꞌi, aika Iesu Keriso kaha aꞌikakaumana hanona Tirama wairanai kahabero. Iuda haukia baika hanona teao weia Galatiai, ba tenuatae aꞌikakauma haukia weia katebahi ahinakia Mose ena rauhubu katekaꞌa ainakia. Aka neiana hanona Galatiai nirama ba Paulo pouna eona. Ua buonai puka neiana ererena, weiana ekia aꞌikakauma mai ekia hoahoa kebaberona.

Koriꞌuainai hanona Paulo eꞌabi Tirama ehore ia etinaꞌana iuhubeau akana kebabaina. Haeamona eꞌabi maearima weiakia Iesu Keriso aonai tiaꞌikakauma haukia hanona Tirama wairanai tebero. Ba puka puanai hanona eꞌabi Keriso aika kiꞌa herenai ebaꞌabaeanaka hanona Auba Robe kehore aika keꞌuai ainaka, weiana aika hanona rani ikoinai hoahoa namokia maearima herekiai kahababai.