Paulo Ena Marere
GALATIA
Haukia Herekiai
Banamo ꞌAbina.
1
Au Paulo,
Iuhubeau hauꞌu,
aka neiana maearima aꞌi tebenaꞌu ꞌao aꞌi teuhunaꞌu,
ia Iesu Keriso mai Hamana ꞌariai ebamikiri muena Tiramana ohi teuhunaꞌu.
2 Au uahoꞌabaka neia ṯamiaho ikoikiai atakiai aꞌikakauma haumi Galatia hanona aonai marea ha ha aokiai ṯomiaho haumi narere benimi.
3 Ṯabahubaꞌari Tirama aika Hamaka mai Obiapaka Iesu Keriso ekia aokoꞌo hoana mai baibua hanona ahamiai kemiaho.
4 Keriso kipona ena mauri ebaibeni aika eka kiꞌa paunai,
ia hanona hanopaka kiꞌa obona neiana aonai kebamaurinaka,
aika Hamaka Tirama enuatae ihobonai.
5 Ua buonai Tirama ena nuabi kemiaho banaibanai.
Amen.
Keriso Pouna Namona Ikupaianamo.
6 Au ataꞌu taꞌu huri heremiai hanona Keriso ena aokoꞌo hoanai eaparinimi Tiramana abamo tohabo ꞌabaeana ia tuao pou haeai ṯehinana haukia herekia.
7 Weiana hanona pou namona tohana ahaꞌi.
ꞌEka neianai maearima baika tibabaoaonimi pokina ṯenuatae Keriso pouna namona katebahaeaina.
8 Ai ꞌao kupa aneruna ha pemai reꞌa,
ia pou haeai ha peiroro aina ba pou namona ꞌuainai heremiai tairoro aina hauna terarua aꞌi teihobo raninai puma banaibanai kehoaina.
9 ꞌUainai tahinana hauna bariu haeamona nahina muena.
Tai ha pou namona toaꞌina hauna ahaꞌi ia pou haeai ha keiroro aina raninai puma banaibanai kehoaina.
10 Bariu au maearima ekia nuatae nakaꞌaina?
Ahaꞌi ꞌakina.
Tirama ena nuatae nakaꞌaina.
ꞌAo maearima aokia kabaonamona taearana natabuna?
Maearima aokia ibaonamona manuatae aina raninai,
au hanona Keriso ena taꞌara iaꞌina hauꞌuai aꞌi paeao.
Iuhubeau Hauna Paulo Kipona Kikipana.
11 Uahoꞌabaꞌu e,
au nanuatae katoꞌiobina pou namona airoro aina hauna hanona maearima ena ꞌiobiai aꞌi emai.
12 Maearima ha herenai aꞌi aꞌina ꞌao tai ha aꞌi ebaꞌiobinaꞌu,
ia Iesu Keriso hereꞌuai ebawaira tinana hauna aꞌina.
13 Eꞌu mauri ꞌuainai Iuda haukia ekia aꞌikakauma taearanai amiaho raninai ababaina hauna ꞌuruna aba toꞌona,
Tirama ena marea haukia aꞌoata kiꞌa bahanakia anuatae kabapururunakia.
14 Au ihaburiꞌu haukia Iudai boꞌokia baiatakiai Iuda ekia aꞌikakaumai au hanona aotipa kiꞌa baha,
mai ꞌabaꞌabamai ekia hoahoa hanona anuataeai kiꞌa bahanakia.
15 Ia hinaꞌu nuanai aꞌi arama baha aonai Tirama aba etinaꞌanaꞌu,
ena aokoꞌo hoanai eaparinaꞌu,
ia ena nuatae ai
16 nahuna ebawaira tinana hereꞌuai,
pouna rama haeai haukia herekiai kairoro aina,
weiana hau ha ohi aꞌi tarobahu aina.
17 ꞌAo aꞌi mo aeao Ierusalema,
iuhubeau haukia ꞌuaikia aꞌi aihanakia,
ia beronai mo aeao Arabia,
muriai haeamona aeao Damaseko.
18 Ihau aihau teore murinai,
au akaraꞌau aeao Ierusalema Petero herena taꞌabiꞌabi,
weia tamiaho wapu harau haea ima.
19 Weia Iuhubeau haukia haeai ha aꞌi aihana,
Obiapaka hatina Iakobo mo ikupaiana aihana.
20 Tirama wairanai ꞌabi neiana arerena hanona tohana ia aꞌi nabaiꞌoi.