Paulo Mai ꞌAbana Kipokia Ekia Aka Haeamo.
2
Ihau harau haea bani teao murinai haeamona au Banaba ohi Tito tabakaꞌana kipokia takaraꞌau taeao Ierusalema.
2 Tirama ena ꞌabi aoꞌuai ewaira tina buonai aeao Ierusalema,
pou namona weiana rama haeai haukia herekiai airoro aina hauna robana ahuna.
Aꞌikakauma haukia tipoki ainakia haukia kipokia hanona haia haiai taꞌabiꞌabi aina kateraonaraona,
pokina ꞌuainai airoro aina hauna mai bariu nairoro aina hauna eꞌu aka maikoina anina aꞌi meahaꞌi taꞌuna.
3 Iꞌabamai hauna Tito hanona Helene hauna ia aꞌi tebahi ahina itare keaꞌina.
4 Eka toꞌu aonai uahoꞌaba baiꞌoikia baika bunianai tetoto,
teꞌitimanaka Keriso Iesu aonai mauri haꞌina hauna kateꞌiobina,
ekia nuatae hanona rauhubu ena taꞌara iaꞌinai patehoroti muenaka.
5 Ekia raona aꞌi tabatohana,
pokina pou namona ꞌabina tohana heremiai aꞌi mehaeai.
6 Ia weiakia apaꞌua haukiai tibaonakia haukia (au hereꞌuai hanona ekia haeai ahaꞌi.
Tirama hanona maearima hauani ena namo aꞌi nibatohana,)
ba maearima weiakia pou namona au airoro aina hauna ahanai taba ha aꞌi tehore ꞌauna.
7 Ia teihana Tirama aka ebenaꞌu pou namona rama haeai haukiaa herekiai airoro aina ihobonamo Petero Iuda haukiab herekiai eiroro aina.
8 Tirama ena hiabuai Petero hanona iuhubeau haunai eao Iuda haukia herekiai,
ihobonai mo Tirama ena hiabuai au hanona iuhubeau hauꞌuai aeao rama haeai haukia herekiai.
9 Toꞌu weiana kupuana haukia Iakobo,
Petero mai Ioane Tirama aokoꞌo hoana neiana ebenaꞌu hauna teiha tinana raninai,
au mai Banaba ohi imamai teaꞌinakia uahoꞌaba hoana.
Weiana tebatohana ai haumai hanona rama haeai haukia herekia kataeao,
ia hanona Iuda haukia herekia kateao.
10 ꞌAbi hamona tehinana heremaiai hanona uraru haukia kataraona apaꞌuanakia,
ꞌabi weiana taꞌi taeana ba aka neiana hanona au aba waꞌi baha nababai toꞌona.
Paulo Antioka ai Petero Ebatana.
11 Ia Petero emai Antioka raninai maearima wairakiai abatana pokina ena babai hanona aꞌi ebero.
12 Petero rama haeai haukia kipokia teaniani haeamo aonai Iuda haukia baika weiakia Iakobo euhunakia haukia tekaraꞌau,
ba Petero hanona emikiri herekiai ekapare,
pokina ia weiakia itare tibaꞌiobi ainakia haukia etaꞌu ainakia.
13 Iuda haukia baika abomo ia ena ꞌubo weiana ihobonai baiꞌoi hoana tebabaina,
ba ekia ꞌuboai Banaba abomo eahurea.
14 Au babai weiana aiha pouna pou namona ꞌabina tohanai aꞌi tekaꞌaina,
ua buonai ikoikiai wairakiai Petero abatana atibaha,
“Oi hanona Iuda haumu,
ia emu babai hanona matoha rama haeai haukia ihobonai nomiaho,
ia Iuda haukia ꞌabana ahaꞌi.
Aea homanai rama haeai haukia kobahi ahinakia Iuda haukia ekia hoahoai katemiaho?”
Bamauri Hanona Aꞌikakaumai Nimai.
15 Aika hanona Iuda ai harama toha hauka,
ia ‘kiꞌa hauka’ ahaꞌi,
rama haeai haukia ꞌabakia ahaꞌi.
16 ꞌA nahaꞌiobina weiana maearima hanona rauhubu iaꞌi taeanai aꞌi kebero,
ia Iesu Keriso keaꞌikakaumana hanona kebero.
Ua buonai aika abomo Keriso Iesu nahaꞌikakaumana,
weianai kahabero Keriso iaꞌikakaumanai ia rauhubu iaꞌi taeanai ahaꞌi,
pokina rauhubu iaꞌi taeanai hanona maearima ha aꞌi kebero.
17 “Ia aika Keriso herenai eka bero nahatabuna,
ia mo kiꞌa haukai kahawaira tina matoha rama haeai haukia ihobokiai raninai,
weiana anina hanona Keriso kiꞌa haukai nibabainaka hauna,
u?
Ia weiana hanona ahaꞌi ꞌakina.
18 Kipoꞌu aꞌi kiꞌana rauhubuna kabakori muena raninai,
au kipoꞌu kabatohanaꞌu au rauhubu nakabena hauꞌu mai kiꞌa hauꞌu.
19 Au hanona rauhubu paunai aꞌari rauhubu herenai,
weiana buonai Tirama ꞌeunai kamauri.
20 Au hanona Keriso ohi matiu ibiri ropo ꞌubinai aba tebaꞌarinamai,
ba au aꞌi namauri,
ia Keriso au aoꞌuai nimauri.
ꞌA mauri neiana bariu hauaniꞌuai namiaho aina hauna hanona Tirama Nahuna eraonaꞌau ainaꞌu kipona ena mauri ebenaꞌu hauna naꞌikakaumana buonai namauri.
21 Tirama ena aokoꞌo hoana hanona aꞌi ṉaꞌi kiꞌana.
Rauhubuai bero pahaꞌina raninai,
Keriso hanona aba eꞌari ꞌabaea.”