Bamauri Hanona Rauhubu ai Aꞌi Nimai.
3
Galatia haumi e,
wai hanona poꞌo haumi.
Tai meai ebahureanimi?
Wairami tohanai Iesu Keriso pouna aba ikikipa haraina matiu ibiri ropoai teahu ꞌarina.
2 Au nanuatae taba hamona mo katohina benaꞌu,
Auba Robe toaꞌina hanona rauhubu tokaꞌai haraina paunai ꞌao pou namona tona toaꞌikakauma paunai?
3 Wai hama ṉa tupoꞌo aiho?
Popounai mauri neiana Auba Robeai toaꞌi ramana,
ia bariu hauani taburanai katobapuana?
4 Wai pou namona paunai tohau haiara ꞌari hanona anina keahaꞌi?
Ua kehoma raninai,
aba tohau haiara ꞌari ꞌabaea.
5 Taba buonai Tirama ena Auba ebenimi,
bataꞌu taꞌu huri akakia ebabai baiatamiai?
Ia rauhubu tokaꞌai haraina paunai ꞌao pou namona tona toaꞌikakaumana paunai?
6 Aberahamo tomoraonana.
Puka robenai ṉa terere aihona,
“Aberahamo Tirama eaꞌikakaumana,
ena aꞌikakauma paunai
Tirama ehore bero haunai ebaona.” Gen 15.6
7 Ua buonai katoꞌiobina weiakia Tirama tiaꞌikakaumana haukia ikoikiai hanona Aberahamo nahuna.
8 Puka Robena aba eiha ꞌuaina rama haeai haukia kateaꞌikakauma hanona Tirama kehore berokia kehinana,
ua buonai pou namona eiroroai ꞌuaina Aberahamo herenai,
“Oi paumuai hanopaka maearimakia ikoikiai Tirama kebanamonakia.”
9 Ua buonai weiakia mai ekia aꞌikakauma haukia hanona Tirama nibanamonakia aꞌikakauma hauna Aberahamo kipokia.
10 Rauhubuai temiaho haukia ikoinai hanona Tirama ena ururu baꞌanai ṯemiaho,
pokina Puka robenai ṉa erere aihona,
“Rauhubu pukanai terere ꞌabikia ikoikia aꞌi keꞌima haraina hauna hanona Tirama ena ururu baꞌanai nemiaho.”
11 Aba ewaira tina harai rauhubuai hanona hau ha aꞌi ebero Tirama wairanai,
pokina Puka robenai eꞌabi,
“Bero hauna hanona aꞌikakaumai
kemauri.” Hab 2.4
12 Ia rauhubu hanona aꞌikakaumai aꞌi emai,
terarua aꞌi teihobo,
Puka robenai eꞌabi,
“Maearima ha rauhubu ꞌabikia ikoikiai kekaꞌai orena hauna hanona weiakiai kemauri.”
13 Keriso aika eka ururu pumana ehoaina,
rauhubu ena ururu aonai eba karahinaka,
pokina Puka robenai aba ererena etibaha,
“Matiu ꞌubinai tiꞌari haukia hanona Tirama ena ururu aonai.”
14 Keriso ebakarahinaka pokina hanona banamo Aberahamo etauna hauna rama haeai haeai haukia katetabu ahina Keriso Iesu paunai,
ua buonai aika eka aꞌikakaumai hanona Auba Robe weiana eꞌabiꞌuaina hauna kahaꞌina.
Rauhubu Mai ꞌAbiꞌuai.
15 Uahoꞌabaꞌu e,
eka miaho maurina aonai ihaiha ha maꞌina hamaihana,
maearima rua ekia ꞌabiꞌuai tebabaina tebaꞌoruna murinai tai taba ha aꞌi keaꞌi parena ꞌao ahanai ha aꞌi keahuꞌauna,
ihobona mo kemiaho.
16 Tirama ena ꞌabiꞌuai Aberahamo ena rama herenai ebabaina.
Puka Robenai aꞌi eꞌabi ‘ena rama herekiai’ anina maearima boꞌona,
ia eꞌabi ‘ena rama herenai’ anina maearima hamona,
Keriso Iesu eꞌuahina.
17 Naꞌuahina hanona neiana,
Tirama ꞌabiꞌuai ebabai ꞌuaina ba ihau 430 teao murinai rauhubu ebaibeni hauna kehore ꞌabiꞌuai weiana aꞌi keaꞌi parena ꞌao aꞌi kebaꞌakaumana.
18 Rauhubuai itau kerama raninai,
ꞌabiꞌuaiai hanona itau aꞌi kerama.
Ia ꞌabiꞌuaiai Tirama ena aokoꞌo hoanai itau Aberahamo ebena.
19 Ba rauhubu ena aka hanona taba?
Rauhubu erama ena poki hanona beho ꞌekakia kebakarahinakia.
Ia hanona aneru temaiaina bairarao hauna imanai teutana akana erama,
keao mo rama weiana eꞌuahi ꞌuaina hauna kemai.
20 Tirama ena ꞌabiꞌuai aonai hanona abira hamona mo nemiaho,
weiana bairarao hauna ena aka ahaꞌi,
ia Tirama mo keikupai.
Rauhubu Eaoainaka Keriso Herena.
21 Rauhubu hanona Tirama ena ꞌabiꞌuai keaꞌi kiꞌana?
Ahaꞌi,
ahaꞌi ꞌakina.
Rauhubu weiana mauri ebaibeni raninai,
bero hanona aba rauhubuai pemai.
22 Ia Puka Robenai eꞌabi hanopaka neiana maearimakia maikoinai hanona kiꞌa ekaiabunakia aonai ṯemiaho.
Weiana buonai tiaꞌikakauma Iesu Keriso herenai haukia aꞌikakaumai ꞌabiꞌuai weiana kateaꞌina.
23 Aꞌikakauma neiana aꞌi emai baha raninai,
aika hanona rauhubu ekaiabunaka wapura hauka ꞌabana keao mo aꞌikakauma kewaira tina.
24 Weianai rauhubu hanona eka iha ꞌini hauna ꞌabana kebakaꞌanaka Keriso herenai weia aꞌikakaumai bero kebenaka.
25 Bariu aꞌikakauma hanona aba emai,
rauhubu ena iha ꞌini hiabuna herekai hanona aba eore.
Aꞌikakauma Keaoainaka Tirama Nahunai Kahaeao.
26 Keriso Iesu tuaꞌikakaumana buonai wai ikoimiai hanona Tirama nahuna.
27 Keriso kipokia toba hamomo ꞌuere robe toaꞌina haumi ikoimiai hanona Keriso ena mauri habunina ihobona aba tobatotona.
28 Ua buonai wai hanona ha aꞌi ehaeai,
Iuda hauna ꞌao Helene hauna,
taꞌara aꞌi hauna ꞌao taꞌara aꞌi hauna ahaꞌi,
hau ꞌao babiꞌe,
pokina ikoimiai hanona hamona Keriso Iesu aonai.
29 Ba wai Keriso ꞌeuna raninai,
wai abomimo Aberahamo ena rama haumi,
Tirama ena ꞌabiꞌuai barina hanona aba katotauna.