Aika Tirama Nahuna.
4
Au naꞌuahina hauna neiana,
miori hanona hamana barina maikoinai keꞌaranakia,
iamo miori papana raninai,
ia hanona taꞌara aꞌi hauna ꞌabana.
2 Ekoꞌikoꞌi aonai,
iꞌimana hauna mai ihaꞌini hauna ekia ihaꞌini baꞌanai nemiaho keao mo hamana ebatohana ranina ketaina.
3 Ihobona aika abomo miori papaka raninai hanopaka aubakia haeai haeai taꞌarakia iaꞌikiai haeao.
4 Ia ranina tohana etaina aonai,
Tirama nahuna euhuna,
babiꞌe nuanai erama abomo Iuda ekia rauhubu baꞌanai erama,
5 weiakia rauhubu baꞌanai haukia kebamaurinakia,
weiana keaꞌinaka Tirama nahuna tohanai kebaonaka.
6 Bariu nahunai toao buonai,
Tirama hanona Nahuna Aubana euhuna emai aokai nemiaho,
Aubana weianai aika Tirama nahaparina,
“Hamaꞌu.”a
7 Ua buonai wai hanona taꞌaraꞌi haumi ahaꞌi,
ia Tirama nahuna.
Tirama nahuna tohami buonai barina ikoinai Aberahamo herenai eꞌabiꞌuai aina hauna wai ꞌeumi.
Paulo Aona Earoꞌari Galatia Haukia Herekiai.
8 ꞌUainai Tirama aꞌi toꞌiobina raninai,
wai hanona tirama tohakia ahaꞌi haukia ekia taꞌara aꞌi haumiai toao.
9 Ia bariu Tirama aba toꞌiobina,
au ṉa maꞌabi aiho,
Tirama abomo wai eꞌiobi harainimi,
aehoma buonai katomue auba haeai haeai ꞌabeꞌabekia ekia namo ahaꞌi haukia herekiai ekia taꞌara aꞌi haumiai katoao mue?
10 Wai hanona wapu,
nawa,
ihau hamona toꞌuna mai ihau ikoikiai tatukia mo emi beraura apaꞌuakiai tubaonakia.
11 Au hanona wai paumiai aoꞌu niaroꞌari,
pokina eꞌu aka ikoinai heremiai hanona anina aꞌi meahaꞌi.
12 Uahoꞌabaꞌu haumi e,
au wai nanoinimi,
au wai ꞌabamiai aba aeao ꞌuai ihobonai wai abomo rauhubuai tomokarahi ꞌabaꞌuai tomoao.
Hereꞌuai hoa ha aꞌi tubarea.
13 Wai toꞌiobina eꞌu inawa paunai heremiai amiaho pou namona airoroai ꞌuaina heremiai.
14 Eꞌu inawa ena pumai abaroꞌarinimi,
ia aꞌi toiha haonaꞌu,
aꞌi toaꞌi kiꞌanaꞌu,
aonai toaꞌiaꞌi harainaꞌu,
Tirama ena aneru patobanamona ꞌabana ꞌao Iesu Keriso patobanamona ꞌabana.
15 Ua raninai mai aonamomi tomiaho,
ia bariu emi aonamo aeana eao?
Au aꞌiobina rani weianai mahami patoipa ahinakia au patobenaꞌu ṉa tohoma.
16 Ia bariu au ꞌabi tohana nahinana heremiai buonai aba emi ꞌou hauꞌuai naeao, u?
17 Maearima weiakia ekia nuatae aomi kateana,
ia ekia raona mai ekia nuatae hanona aꞌi tebero,
ekia nuatae heremaiai katokapare,
katonuatae ainakia.
18 Maearima aona keiani maearimana weiana kebanamona paunai,
weiana hanona rani ikoinai enamo au heremiai pamiaho ꞌao ahaꞌi.
19 Nahaꞌu e,
wai buomiai naroꞌari,
miori nirama haiarana ꞌabana,
ua nahaiara aiho keao mo wai Keriso ihaihana ihobonai katoao.
20 Au aoꞌu niaroꞌari pokina heremiai kamiaho aiaꞌu kabahaeaina kabarainimi,
wai paumiai naraona raona ꞌari.
ꞌAbi Ibabatai Ihobona Hagara Mai Sara ꞌAbakia.
21 Wai tai ṯonuatae rauhubu baꞌanai katomiaho haumi tomohina benaꞌu.
Wai rauhubu taba ṉa ehoma hauna toꞌiobina,
ꞌu?
22 Puka Robenai ṉa erere aihona,
Aberahamo nahuna hanona rua,
ha hanona atawana weiana taꞌara aꞌi babiꞌena herenai ebaramana,
ha hanona ia atawana tohana herenai ebaramana.
23 Ia atawana taꞌara aꞌi babiꞌena nahuna hanona harama ihobonai erama,
ꞌa atawana tohana nahuna hanona Tirama ena ꞌabi ꞌuai miorina.
24 Ori neiana hanona ꞌabi ibabatai ꞌabana.
Babiꞌe rua hanona ꞌabiꞌuai apaꞌuakia rua.
Ha hanona Sinai oeonai emai taꞌaraꞌi haukia ebaramanakia,
ia hanona Hagara.
25 Hagara,
neꞌuahina hanona Sinai oeona Arabia aonai,
ia hanona bariu rani neiana Ierusalema aiarana ꞌabana ia mai nahuna kipokia ikoikiai rauhubu ena taꞌaraꞌi haukiai tiao.
26 Ia Ierusalema weiana kupai hauna hanona taꞌara aꞌi niaꞌi babiꞌena Sara,
ia hanona aika hinaka.
27 Puka Robenai aba ererena,
“ꞌOneꞌone babiꞌemu e,
koaonamo!
Beni haiarana aꞌi nuonobaina
babiꞌemu,
koabe koio mai
aonamomu.
Pokina babiꞌe ꞌabaea
nahuna hanona keboꞌo,
ia babiꞌe weiana mai atawana
hauna nahuna aꞌi keboꞌo.” Isa 54.1
28 Uahoꞌabaꞌu e,
bariu wai hanona Isako ꞌabana Tirama nahuna,
ia ena ꞌabiꞌuai ihobonai.
29 Rani weianai harama ihobonai erama miorina ehore miori weiana Auba Robe hiabunai erama hauna eꞌoatana,
bariu abomo ua mo homana.
30 ꞌA Puka Robenai aea terere aihona?
Ṉa eꞌabi aiho,
“Taꞌaraꞌi babiꞌena nahuna ohi mouꞌu ahinakia,
pokina eatawa tohana nahuna barina hanona taꞌara aꞌi babiꞌena nahuna ohi bari hamona aꞌi katewatena.”
31 Ua buonai uahoꞌabaꞌu e,
aika hanona taꞌara aꞌi niaꞌi babiꞌena nahuna,
ia taꞌaraꞌi babiꞌena nahuna ahaꞌi.