Keriso Erubunaka.
5
Keriso ehore aika aba erubunaka rauhubu aonai aꞌi kahamiaho.
Ua buonai tomokori ꞌini,
aꞌi temebiri muenimi rauhubu ena taꞌaraꞌi haumiai aꞌi tomoao marikina.
2 Tomobahu,
au Paulo wai nabaꞌiobinimi,
itare patoaꞌina raninai Keriso ena aka hanona anina ahaꞌi heremiai.
3 Haeamona nahinabe pahihi muenimi natibaha,
itare keaꞌina hauna hanona rauhubu ikoikiai keꞌima harainakia kenamo.
4 Wai rauhubuai bero tutabuna haumi hanona Keriso ꞌeunai kipomi tokabe obonimi,
Tirama ena aokoꞌo hoanai hanona aba tokapu.
5 Ia aika hanona eka aꞌikakaumai mai Auba Robe hiabunai nahabuabena Tirama bero kebenaka.
6 Aika Iesu Keriso aonai kahahamomo raninai,
itare ꞌao itare ahaꞌi ena haeai hanona ahaꞌi,
ia taba apaꞌuana hanona aꞌikakauma,
raonaꞌauai niwaira tina.
7 Wai ꞌuainai hanona aꞌikakaumai tokaꞌa harai kiꞌa baha,
ia tai eharabunimi ꞌabi tohana iaꞌi taeanai?
8 Aoani ꞌabikia weiakia hanona eaparinimi Tiramana herenai aꞌi timai.
9 Katoraonana,
“Bakupu muramurana papana nihore parawa maikoinai nibakupuna.”
10 Au hanona Obiapaka naꞌikakaumana kebarainimi wai raona haeai ha aꞌi katoaꞌina.
Baoao baoao nibenimi hauna hau aea homana ia Tirama kehore ꞌarana kebena.
11 Uahoꞌabaꞌu e,
itare nairoro aina raninai aehoma buonai tiꞌoatanaꞌu?
Weiana petohana raninai Keriso ena matiu ibiri ropo kairoro aina hanona atetuana ahaꞌi.
12 Au nanuatae weiakia itareai tibatetuanimi haukia hanona patekatuꞌa pateao atetua tabana patekabe obona.
13 Uahoꞌabaꞌu e,
Tirama eaparinimi hanona kerubunimi.
Erubunimi haumi hanona hauani akakia kiꞌa obokia aꞌi katobabai,
ia raonaꞌauai ha ha kipomi katobarai barai haeamo.
14 Rauhubu ikoinai aba ebahamomonakia ꞌabi neianai,
“Heremuai hauna koraonaꞌau aina oi kipomu nuraonaꞌau ainiꞌo ꞌabana.”
15 Katoꞌima ꞌima harainimi wai kipomi emi baiarai mai emi ꞌau boꞌo ꞌau boꞌoai kipomi aꞌi tomobaorenimi taꞌuna.
Auba Robe Buabuana Mai Hauani Ena Hoahoakia.
16 Ua buonai naꞌabi,
Auba Robe emi mauri keꞌuai aina raninai hauani ena nuatae akakia kiꞌa obokia aꞌi katobabai.
17 Pokina hauani ena nuatae akakia hanona Auba Robe nihao abuna,
Auba Robe ena nuatae akakia abomo hauani nihao abuna,
ia terarua tibaitaeai,
ua buonai wai patobabai haukia aꞌi tubabai.
18 Auba Robe wai keꞌuai ainimi raninai,
wai hanona rauhubu baꞌanai aꞌi katomiaho.
19 Hauani ena hoa hanona emahanai kiꞌa baha.
Taba neiakiai,
nabau,
raona ꞌopukia,
maha porepore,
20 kaibaꞌuku ikutiaina,
mea,
baiꞌoata,
ꞌau,
wamuru,
opuere,
ꞌaoꞌaea,
baihabapaꞌa,
baꞌiobi baiꞌoikia,
21 raona kiꞌa,
inu ꞌari,
ripuripu,
ba babai uahomakia ikoikiai.
ꞌUainai abahinabe pahihinimi,
bariu haeamona nahinabe pahihi muenimi,
aka uahomakia tibabai haukia hanona Tirama ena obia aiarana aꞌi katetabu ahina.
22 Ia Auba Robe eka mauri keꞌuai aina buabuana hanona raonaꞌau,
aonamo,
baibua,
bapahihi,
aokoꞌo,
rabo harai,
aia oꞌo,
23 ꞌaiaunu mai aokiro.
Neiakia ikoikiai hanona rauhubu aꞌi niꞌoatanakia.
24 Keriso Iesu ena maearima hanona hauanikia mai ekia hoa kiꞌa obokia mai ekia nuatae kiꞌa obokia aba ikokoꞌau matiu ibiri ropo ꞌubinai.