Emi Puma Katobua Haeahaea.
6
Uahoꞌabaꞌu e,
hau ha beho aonai etoto raninai,
aomiai Auba Robe niaka haumi ha kohore aomu namonai kobaberona.
Ia oi abomo kipomu koꞌima harainiꞌo,
baihobo aꞌi meaꞌiniꞌo marikina.
2 Emi puma katobua haea haea,
taeara neianai hanona Keriso ena rauhubu katoaꞌi taeana.
3 Taba ahaꞌi hauna mo niraonana ia hanona maearima apaꞌuana ha raninai,
ia kipona niꞌoina.
4 Ha ha kipomi emi babai kato hobonakia,
taba obabai haraina hauna hanona kipomu koapainiꞌo,
ia aꞌi koaoaina maearima wairakiai.
5 Maearima ikoikiai kipokia ekia puma katebuanakia.
6 Tirama ena ꞌabi emarereaina hauna hanona ena taba namokia ikoinai ena baꞌiobi hauna ohi katebinaꞌanakia.
7 Kipomi aꞌi katohaorea,
maearima ha Tirama aꞌi kebapoꞌona.
Maearima ube ebatona ihobonai mo anina keaꞌina.
8 Ba hauani ena nuataeai ebato bato hauna hanona hauani herenai ꞌari ketabu ahina,
ia Auba Robe ꞌeunai ebato bato hauna hanona Auba Robe herenai mauri banai banai ketabu ahina.
9 Aka namona ibabainai aꞌi kahahau hororo,
aika aꞌi kaha ꞌabeꞌabe raninai,
eueu ranina kemai aonai buabua namona kahaꞌina.
10 Ua buonai namo nahatabu ahi ranikiai maearima ikoikiai herekiai namo kahababainakia,
ia aꞌikakauma haukia herekiai hanona namo kahababai harainakia.
Banamo ꞌAbina Orena Mai Bahubaꞌari.
11 Rererere rarikia neiakia katoihanakia au imaꞌuai arerenakia tiwahi heremi.
12 Weiakia ṯenuatae atakia keapaꞌua haukia tibahi ahinimi itare katoaꞌina,
ekia poki tohana hanona Keriso ena matiu ibiri ropo paunai maearima aꞌi teme ꞌoatanakia.
13 Weiakia aba tetarenakia haukia mo,
rauhubu aꞌi tikaꞌaina,
ia wai ṯenuatae ainimi itare katoaꞌina,
hauanimi paunai katebaroꞌe.
14 Au taba ha aꞌi kapai ꞌabaeana,
ia eka Obiapaka Iesu Keriso ena matiu ibiri ropo ikupaiana mo kapaina,
Keriso paunai hanopaka eꞌari au hereꞌuai,
au abomo abaꞌari hanopaka herenai.
15 Itare ꞌao itare ahaꞌi terarua anikiꞌa ahaꞌi,
ia taba apaꞌuana hanona rama mahamahana.
16 Tirama ena baibua mai aokoꞌo hanona raona neiana tiaꞌi taeana haukia ikoikiai herekia,
abomo Tirama ena maearima weiakia aubai Isaraela haukiai tiao haukia herekia.
17 Eꞌu ꞌabi puanai hau ha aꞌi mebaroꞌarinaꞌu,
pokina au hauꞌuai maniꞌa ṯemiaho tibaihana au Iesu ena taꞌaraꞌi hauꞌu.
18 Uahoꞌabaꞌu ikoimiai e,
nabahubaꞌari eka Obiapaka Iesu Keriso ena aokoꞌo hoana ahamiai kemiaho.
Amen.