Paulo Ehina benakia Aꞌikakauma Aonai Katemiaho.
13
Neiana hanona rani ibaihauna au kawahi heremi.
Puka robenai tererena ꞌabana,
“Beho ha hanona maha ihaa maearimakia rua ꞌao aihau ekia ꞌabiai kahabatohana.”
2 Au eꞌu bakibaki ibaruana heremiai aonai ꞌuainai tobeho haumi abaraonanimi.
ꞌA bariu atauꞌai namiaho aonai harina maikoina haumi nabaraona muenimi.
Au kawahi mue heremi hanona beho haumi ikoimiai puma katoaꞌina.
3 Wai ṯonuatae katobatohana Keriso hana au pinaꞌuai niꞌabi.
Weiana toꞌiobina Keriso hanona ena aka wai heremiai aꞌi niꞌabeꞌabe,
ia ena hiabu heremiai hanona nitabura.
4 ꞌAbi tohana Keriso hanona ꞌabeꞌabe paunai matiu ibiri ropo ꞌubinai teahu ꞌarina,
iamo bariu nimauri nemiaho Tirama ena hiabuai.
ꞌAbi tohana Keriso ena mauri aonai ai abomo ṯaꞌabeꞌabe,
ia emai baihatiaꞌa heremiai hauna aonai Tirama ena hiabuai Keriso ena mauri aonai katamiaho katabarainimi.
5 Kipomi emi mauri tomoiha harainakia,
abomo kipomi tomoꞌiobi harainimi wai hanona aꞌikakauma aonai ṯomiaho ꞌao ahaꞌi.
Wai toꞌiobina Keriso Iesu hanona emi mauri aonai nemiaho.
Ahaꞌi raninai wai hanona aꞌi tuaꞌikakaumai tohana.
6 Au nanuatae wai katoꞌiobina ai hanona Keriso ena iuhubeau haumai tohamai.
7 Ai Tirama herenai ṯabahubaꞌari wai beho ha aꞌi katobabaina paunai.
Ai Keriso ena iuhubeau haumai ꞌao iuhubeau haumai ahaꞌi reꞌa weiana hauna aomi aꞌi kebaroꞌarina,
ia emai nuatae apaꞌuana hanona wai aka berokia katobabai.
8 Ai hanona ꞌabi tohana iaꞌikiꞌana akana ha aꞌi katababaina,
ia ibaraina akana mo katababaina.
9 Ai ṯaꞌabeꞌabe iamo wai tutabura hanona aomai ninamo.
Ba ai ṯabahubaꞌari wai katobero ꞌaunimi.
10 Weiana buonai atauꞌai namiaho aonai ꞌabi neiakia narerenakia tiwahi heremi,
weiana kawahi aonai Tirama hiabu ebenaꞌu haunai aꞌi mahinabe pahihinimi.
Hiabu neiana hauna emi aꞌikakauma kebapaꞌuana ia aꞌi keaꞌi kiꞌana.
ꞌAbi Orena.
11 ꞌAbi orenai,
uahoꞌabaꞌu e,
bariu hanona ikoimiai haparua.
Katoaka tabura emi aꞌikakaumai katobero ꞌaunimi.
Eꞌu noinoi ꞌabikia katoaꞌi taeanakia,
ha ha aomi katehamomo abomo baibuai katomiaho.
Ba raonaꞌau mai baibua Tiramana hanona heremiai kemiaho.
12 Tirama ena banamoai ha ha katobanamonimi.
13 Tirama ena robe maearimakia ikoikiai ekia banamo ꞌabikia ṯeuhunakia heremiai.