Paulo Ena Mahabanai.
12
Apa hana taba namona ha aꞌi nibaramana,
ia au hanona ṉapa mo.
Bariu Obiapaka taba baika mahabanaiai mai ibawaira tina taearanai ebaihanaꞌu haukia robakia kahunakia.
2 Ihau harau haea bani teao aonai au Keriso ena maearima ha aꞌiobina hauna teaꞌi taeana teaoaina kupa ibaihauna hauna aonai.
(Au aꞌi aꞌiobina,
neiana hanona hauaninai eao ꞌao aubanai eao,
Tirama kipona mo eꞌiobina.)
3 Naꞌabi mue mo,
hau neiana hanona teaꞌi taeana teaoaina Paradiso aonai.
(Au aꞌi aꞌiobina,
neiana hanona hauaninai eao ꞌao aubanai eao,
Tirama kiponamo eꞌiobina.)
4 Abomo weia ꞌabi baika maearima pinakiai patehina aꞌi petainakia,
mai taba weiakia poukia maearima aꞌi katehina haukia aiakia eoꞌo.
5 Au hau neiana hauna kapaina,
ia au kipoꞌu aꞌi kapainaꞌu,
haeamona taba weiakia eꞌu ꞌabeꞌabe tibawaira tinana tabakia haukiamo kapainakia.
6 Au panuatae papa raninai,
au hanona poꞌoai aꞌi paeao pokina au hanona ꞌabi tohana pahinana.
Ia aꞌi kapa,
pokina au aꞌi nanuatae wai ha au taba ababai toihanaꞌu mai ahina urukia toꞌo haukia paukiai aꞌi tomotibaha au hanona apaꞌua kiꞌa baha.
Paulo Hauaninai Haiara Ha Emiaho Aꞌi Keapa.
7 Taba namoabukia aihanakia paukiai aꞌi mapa kiꞌa baha hanona Tirama hauaniꞌuai haiara rarina ha ehorotina kebaꞌoronaꞌu,
Satani hanona haiara neiana aonai niaka keba ꞌehonaꞌu abomo kebaꞌoronaꞌu aꞌi mapa.
8 Rani aihau abahubaꞌari Obiapaka anoina haiara neiana hereꞌuai hauna keaꞌi obona.
9 Ia Obiapaka ehina benaꞌu etibaha,
“Eꞌu aokoꞌo hoana ikupaiana mo kabeniꞌo,
pokina oi nuꞌabeꞌabe aonai eꞌu hiabu hanona niapaꞌua kiꞌa baha.”
Ua buonai eꞌu ꞌabeꞌabe ꞌekakiai ṉapa hanona aoꞌu ninamo kiꞌa baha,
pokina Keriso ena hiabuai keꞌaeanaꞌu paunai.
10 Keriso paunai au naꞌabeꞌabe,
ꞌabi kiꞌa obokia ṯehina hereꞌuai,
tibahau haiaranaꞌu,
tiꞌoatanaꞌu abomo tibatetuanaꞌu aokiai aoꞌu ninamo.
Pokina au naꞌabeꞌabe aonai au hanona natabura toha.
Paulo Ena Aoaroꞌari Korinto Haukia Herekiai.
11 Wai tobahi ahinaꞌu paunai au nababai matoha poꞌo ꞌabana.
Wai hanona pouꞌu namona patohinana haumi.
Iamo taina eꞌu namo ahaꞌi reꞌa,
ia emi iuhubeau haukia apaꞌuakia ṉa tiho haukia weiakia au aꞌi tetara haonaꞌu.
12 Au baiatamiai amiaho aonai aoꞌu abapahihina,
hoa haeai haeai mai bataꞌu taꞌu huri akakia mai hiabu hoakia ababai haukia tehore tebatohanaꞌu au hanona Keriso ena iuhubeau hauꞌu ha.
13 Tirama ena marea haukia ꞌeka haeai haeaiai ṯemiaho haukia herekiai aka ababainakia haukia ihobokia mo wai heremiai ababai.
Ia wai heremiai hanona ꞌaraꞌu aꞌi atabuna.
Weiana hanona ababai kiꞌa raninai,
eꞌu kiꞌa tomohina haona.
14 Bariu neiana hanona rani ibaihauna au abaꞌoru kabaki bakinimi,
abomo au hanona aꞌi kabaroꞌarinimi.
Pokina au hana wai mo nanuatae ainimi,
ia emi kepu aꞌi nanuataeai.
Haeamona miori hana hama hina ekia taba aꞌi katebaꞌoru,
iamo hama hina haukia katehore miori ekia taba katebaꞌoru.
15 Ua buonai au hanona mai aonamoꞌu eꞌu taba ikoikiai kabenimi mai au kipoꞌu abomo kabaibeni ainaꞌu wai ibaraimi paunai.
Eꞌu raonaꞌau niapaꞌua heremiai hanona emi raonaꞌau kekoꞌikoꞌi hereꞌuai,
u?
Ahaꞌi,
ua aꞌi kehoma.
16 Wai ikoimiai toꞌiobina,
weiana au hanona puma aꞌi abenimi,
iamo hau baika tiꞌabi au hanona aba haoreanimi baiꞌoi ai abarewanimi.
17 Aea aꞌoi aihonimi?
Auhunakia haukia herekiai aꞌoinimi emi taba aꞌinakia,
u?
Ahaꞌi,
toꞌiobina au weiana aꞌi ababaina.
18 Au Tito auhuna ewahi heremi aonai uahoꞌabaka ha abomo auhuna terarua tewahi,
ba Tito eꞌoinimi emi taba eaꞌinakia,
u?
Ahaꞌi,
Tito mai au tararua hanona aomai hamonai ṯaka abomo taeara hamonai ṯakaꞌa.
19 Wai paꞌe turaonana rani ikoinai ai hanona kipomai emai bero taearana heremiai ṯatabuna,
u?
Ahaꞌi.
Tirama wairanai ai hanona Keriso ena aka haumai ꞌabi neiakia ṯahinanakia,
abomo taba ṯababai haukia ikoikiai hanona wai emai hau kiꞌami ibaraimi paunai.
20 Au hanona aoꞌu niaroꞌari,
pokina kawahi raninai,
katabu ahinimi au naraonanimi ihobonai ꞌao ahaꞌi,
wai abomo au katotabu ahinaꞌu wai turaonanaꞌu ihobonai ꞌao ahaꞌi.
Au aoꞌu niaroꞌari taba neiakia heremiai aꞌi matabu ahinakia paunai,
baiara mai wamuru,
opuere mai ani kiꞌa,
ꞌabi kiꞌa mai uahiuahi,
apa mai baripuripu.
21 Au hanona aoꞌu niaroꞌari,
pokina kawahi mue raninai eꞌu Tirama kehore kebahaumaeanaꞌu wairamiai,
boꞌokia ꞌuainai tebabai kiꞌa hoahoa ꞌopukiai,
ekia nabau kiꞌai mai ekia maha poreporeai aꞌi teraona kabe haukia paukiai kahai.