Paulo Mai Iuhubeau Haukia Baiꞌoikia.
11
Au nanuatae hanona katoiha haonaꞌu,
napoꞌo ꞌapua reꞌa,
ia tomoiha haonaꞌu.
2 Au hanona wai nauhore ainimi,
matoha Tirama neuhore ainimi ꞌabana.
Wai hanona uaho rari namona ꞌabana,
aꞌabiꞌuai ainimi hau hamona katoatawana,
weiana hanona Keriso.
3 Ia au aoꞌu niaroꞌari,
pokina ꞌerau ehore Eba eꞌoina ebahureana ihobonai wai abomimo raona kiꞌa obokia katehore aomi katebahureanakia Keriso ikutiaina taearana tohana aꞌi tomohabona.
4 Pokina hau ha nimai Iesu ai tairoro aina hauna ahaꞌi ia Iesu haeai ha neiroro aina hauna aꞌi tukaiabuna ia tuaꞌi taeana mai aonamomi,
abomo Auba Robe mai pou namona heremaiai toꞌo haukia aꞌi tuaꞌi taeanakia ia auba haeai mai pou haeaimo neiroro ainakia haukia tuaꞌi taeanakia.
5 Au naraonana iuhubeau haukia apaꞌuakia ṉa tiho haukia tiwahi heremi hanona aꞌi tenamo kiꞌa baha ba au.
6 Iamo taina,
paꞌe ꞌabiꞌabiai hanona aꞌi etainaꞌu,
ia aotipai hanona etainaꞌu,
neiana hanona rani ikoikiai mai taeara ikoikiai aokiai tabawaira tina haraina heremiai.
7 Tirama ena pou namona heremiai airoro aina hanona ꞌaraꞌu aꞌi atabuna,
hoa weianai kipoꞌu abaꞌaera ꞌaeranaꞌu wai kaꞌi taeanimi paunai.
Ba weiana hanona ababai kiꞌa,
ꞌu?
8 Au wai baiatamiai aka aonai,
Tirama ena marea haukia baika aiara haeai haukia tebarainaꞌu,
au hanona herekiai moni aꞌi ꞌabaeana,
weianai wai kabarainimi paunai.
9 Au heremiai amiaho aonai moniai patobarainaꞌu paunai aꞌi abaroꞌarinimi,
uahoꞌabaka Makedoniai temai hanona taba anuataeai haukia ikoikiai tebenaꞌu.
Rani ꞌuainai ihobona mai rani wairakai,
abomo au hanona aroꞌari aꞌi kabeni ꞌapuanimi.
10 Keriso ena ꞌabi tohana aoꞌuai nemiaho haunai,
naꞌabi au eꞌu apa neiana hauna Akaia hanona maikoina aonai hau ha aꞌi kebaꞌorona.
11 Aꞌi naraonaꞌau ainimi paunai ṉa naꞌabi aiho,
ꞌu?
Ahaꞌi.
Tirama eꞌiobina naraonaꞌau ainimi.
12 Au bariu ꞌara aꞌi natabuna hauna kababai toꞌona weiana iuhubeau haukia ṉa tiho haukia baika ekia apa ꞌabina tehinana tetibaha,
“Ia hanona aika kipokia taeara hamonai ṉahaka,”
hauna kabaꞌorona paunai.
13 Pokina hau weiakia hanona iuhubeau haukia tohakia ahaꞌi,
ia hanona iuhubeau haukia baiꞌoikia,
ekia akai hanona tibaiꞌoi,
abomo ihakia tibahaeainakia matoha Keriso ena iuhubeau haukia ꞌabana.
14 Aꞌi kahamaharea,
pokina Satani abomo kipona ihana ebahaeaina matoha ea aneruna ꞌabana.
15 Ua buonai ena iuhubeau haukia ihakia kateba haeaina matoha bero akana tibabaina haukia ꞌabana hanona herekiai aꞌi epahihi.
Muriai hanona ekia babai kiꞌa obokia ihobokiai ꞌarakia kateaꞌi.
Paulo Ena Hauhaiara Iuhubeau Akana Aonai.
16 Naꞌabi mue mo,
hau ha aꞌi meraonana au hana poꞌo hauꞌu.
Ia ua turaona aihonaꞌu raninai,
tomoaꞌi taeanaꞌu matoha poꞌo hauꞌu ꞌabana ba au papana kapa ꞌapua.
17 Au taba naꞌuahina hauna Obiapaka herenai aꞌi emai,
apa ꞌabiꞌabinai naꞌabi hanona matoha poꞌo hauna ha ꞌabana.
18 Ia maearima boꞌona hanona hanopakai taba taba tebabai haukia tiapainakia,
ba au abomo uamo kahoma.
19 Wai kipomi turaonana toaobero kiꞌa baha,
ua buonai poꞌo haukia hanona tuaꞌi taeana.
20 Wai hau ha neuhuao uhuaonimi,
niꞌoiꞌoinimi,
ꞌao nibapoꞌo poꞌonimi,
heremiai nibaroꞌe,
ꞌao wairami niboꞌanakia hanona tuaꞌi taeana.
21 Au hanona ua aꞌi nababai aiho.
Wai turaonana au naꞌabeꞌabe paunai ua aꞌi nababaina,
ꞌao ua aꞌi nababaina hauna kahaumaeana,
ꞌu?
Ia hau ha taba ha keapaina raninai,
(au naꞌabi matoha poꞌo hauna ꞌabana) au abomo kapa ia ꞌabana.
22 Ia Heberu haukia,
au abomo Heberu hauꞌu.
Ia Isaraela haukia,
au abomo Isaraela hauꞌu.
Ia Aberahamo ꞌabaꞌabana,
au abomo Aberahamo ꞌabaꞌabana.
23 Ia Keriso ena taꞌaraꞌi haukia,
u?
(Au naꞌabiꞌabi matoha beauꞌari hauna ha,)
ia au hanona taꞌaraꞌi hauꞌu namoꞌu ba ia.
Au hanona aka tabura kiꞌa baha,
rani boꞌokia awapura,
teꞌati kiꞌa bahanaꞌu,
abomo rani boꞌokia hereka ꞌakinai mo patebaꞌarinaꞌu.
24 Rani ima Iuda haukia iꞌati pumakia ikoinai harau aihau ꞌababani hamomo (39) tebenaꞌu.
25 Rani aihau Roma haukia matiuai teꞌatinaꞌu,
abomo rani hamona piharai teahunaꞌu.
Rani baihau ahi aeheꞌau haukia teuhu,
ba baiatakiai ha hanona wapu hamona maikoina ꞌaku aonai abure.
26 Eꞌu kaoao boꞌokia aokiai au hanona kiꞌa boꞌokia ꞌeka neiakiai atabu ahi,
tou atekia herekiai,
bainao haukia herekiai,
kipoꞌu eꞌu rama haukia mai rama haeai haukia herekiai,
kiꞌa baika hanona aiara apaꞌuakia aokiai,
hanoꞌakukiai mai ꞌakupakai atabu ahi,
haeamona tihatiaꞌa baiꞌoinaꞌu haukia herekiai kiꞌa atabu ahi.
27 Au hanona aka mai aroꞌari,
rani boꞌokia aꞌi aparua,
mareꞌa aꞌari abomo ꞌakoꞌu eꞌororo,
rani boꞌona aniani hereꞌu eahaꞌi,
eꞌu parua ꞌekana eahaꞌi abomo habuniꞌu eahaꞌi.
28 Weiakia mo ikupaiakia ahaꞌi,
ia rani boꞌona Tirama ena marea haukia ꞌeka haeai haeai ṯemiaho haukia iꞌimakia paunai aoꞌu niaroꞌari.
29 Hau ha niꞌabeꞌabe raninai au abomo naꞌabeꞌabe,
hau ha kiꞌa aonai tibakatotona raninai au aoꞌu nihaiara.
30 Au kapa raninai,
taba weiakia au eꞌu ꞌabeꞌabe tibawaira tinana haukia kapainakia.
31 Tirama eꞌiobina au aꞌi nabaiꞌoi.
Ia hanona Tirama eka Obiapaka Iesu Keriso Hamana,
Ia atana kahabanamona banaibanai.
32 Au Damaseko ai amiaho raninai obia ꞌarana atana Areta ena Kabana hauna ehore ꞌima haukia aiara apaꞌuana paꞌabina ꞌakonai ehorotinakia katebirinaꞌu.
33 Ia uahoꞌabaka baika tehore areha ha aonai teutanaꞌu pihia ꞌererenai tebaririnaꞌu,
ia herenai abeau ꞌakaumana.