Paulo Ena Aka Neuhoreaina.
10
Maearima baika tiꞌabi au wai heremiai namiaho hanona naꞌamariꞌamari,
ꞌa naeao atauꞌai hanona natabura.
Au Paulo kipoꞌu nahore Keriso ena ao ꞌamariꞌamari mai ena rabo harai ai nanoinimi,
2 weiakia ṯeꞌuahinamai tiꞌabi hanopaka ena taearai ṯamauri ṉa tihoma haukia herekiai kaꞌabi pahihi,
ia au wai nanoinimi emi babaiai katobero,
kawahi heremiai raninai aꞌi paꞌabi pahihi.
3 Hanopaka neiana aonai nahamiaho iamo aika hanona hanopaka haukia ṯehuari taearanai aꞌi nahahuari.
4 Eka huari tabakia hanona hanopaka ena huari tabakia ꞌabakia ahaꞌi,
ia Tirama ena huari tabakia taburakia.
Weiakia tiaporo ekia miaho ꞌekakia pahihikia abomo kateahu ꞌitiꞌitinakia.
5 Aika maearima ekia raonaraona baiꞌoikia mai apa tabakia weiakia Tirama iꞌiobina taearana tikaiabuna haukia nahahu ꞌitiꞌitinakia,
maearima aokia maikoinai nahaeaoainakia Keriso aiana katekaꞌaina.
6 Wai ikoimiai Keriso aiana aba tukaꞌai ore haraina aonai,
ai katabaꞌoru weiakia aiana aꞌi tikaꞌaina haukia puma katabahoa ainakia.
7 Wai hanona taba kapekia mo ṯoihanakia.
Hau ha niraonana ia Keriso ena maearima raninai,
ia kipona keraona harai ꞌuaina,
pokina ai abomo Keriso ena maearima ia ꞌabana.
8 Obiapaka hiabu ebenamai hanona emi mauri kataba taburanakia,
ia aꞌi kataꞌi kiꞌanakia,
ua buonai hiabu weiana napai kiꞌa bahana reꞌa,
weiana aꞌi nahaumaea aina.
9 Au aꞌi nanuatae wai katoraonana kabataꞌunimi buonai marere neiakia narerenakia.
10 Hau baika teꞌabi tetibaha,
“Paulo ena marere ꞌabikia hanona tepuma abomo tetabura,
ꞌa ia kipona tohana nimai herekai hanona ia eꞌabeꞌabe ena ꞌabi abomo teꞌamari ꞌamari taba ahaꞌi.”
11 Maearima ṉa tiꞌabi aiho haukia kateꞌiobi haraina,
marere aokiai taba tarerenakia haukia mai ai tohamai katawahi heremiai taba kata babainakia haukia hanona ihobomo aꞌi tehaeai.
12 Ai aꞌi tanuatae maearima weiakia kipokia tiba apaꞌuanakia haukia kipokia aꞌi kataba ihobonamai.
Ia hanona ekia aotipa ahaꞌi.
Ia kipokia baiatakiai ekia babaiai kipokia tibaihobo aina.
13 Ia ai emai apa hanona aꞌi kekabanai kiꞌa baha,
ia Tirama aka ebenamai katababaina hauna ꞌekana aonai mo kemiaho,
wai abomo aka weiana aonai totabura.
14 Ai emai apa hanona aꞌi eao kiꞌa baha,
Keriso ena pou namona tawahiai ꞌuaina heremiai paunai,
emai apa ꞌekana aꞌi takahaboaina.
15 Ua buonai Tirama emai aka ꞌekana eꞌuahina hauna abihanai maearima baika aka ihobona tibabaina hauna aꞌi ṯapaina.
ꞌA ai emai buabeni hanona wai emi aꞌikakauma keapaꞌua ba ai emai aka Tirama eꞌuahina heremiai hauna abomo keapaꞌua.
16 Weiana paunai ai hanona pou namona katairoro aina hanopaka baika weia wai abihamiai maearimakia weiakia tai ha aꞌi eiroro ꞌapua ꞌekakia haukia herekiai.
Pokina hau ha ena aka ꞌekanai aka aba tebabaina hauna aꞌi katapaina.
17 Puka robenai tererena ꞌabana,
“Tai nenuatae keapa hanona
Obiapaka taba ebabaina hauna
meapaina.” Ier 9.24
18 Pokina maearima ha kipona namona nehinana hauna Obiapaka ia aꞌi niaꞌi taeana,
ia Obiapaka kipona nihore maearima nibatohana enamo hauna niaꞌi taeana.