Baibeni Akana Katobabaina Tirama Ena Maearima Ibaraikia.
9
Tirama ena marea maearima robekia Iudeai haukia ibaraikia akana pouna karere benimi hanona aꞌi nanuatae.
2 Pokina au aꞌiobina wai tonuatae katobaraibarai,
ba aꞌikakauma haukia Makedoniai haukia wairakiai apainimi,
aꞌabi atibaha,
“Akaia haukia hanona aba ihau murikai tebaꞌoru katebaibeni.”
Emi baibeni taburana weiana ehore ebahi ahinakia katebaibeni.
3 Bariu uahoꞌabaka neiakia nauhunakia tiwahi ena poki hanona emai apa wai ahamiai hauna anina aꞌi meahaꞌi paunai.
ꞌA au ahina benimi ihobonai wai emi baibeni tabana hanona katobaꞌoruna.
4 Weiana Makedonia haukia baika kipokia patawahi ba pateihanimi aꞌi tobaꞌoru raninai,
wai patohaumaea mo ahaꞌi,
tapainimi hauna paunai ai patahaumaea kiꞌa.
5 Ua buonai au araonana kenamo uahoꞌabaka neiakia kanoinakia kateꞌuai katewahi heremi emi beruberu tabana toꞌuahi ꞌuaina hauna katobaꞌoruna.
Weiana ai katakaraꞌau aonai baraibarai tabana hanona aba eꞌoru,
weiana kehore kebawaira tinana wai tobaibeni hanona mai aomi ikoinai,
ia bahi ahi paunai ahaꞌi.
6 Katoraona haraina,
ube bita ꞌaki kebatonakia hauna aniani bita ꞌaki mo keuꞌaunakia,
ꞌa ube boꞌona kebato hauna aniani boꞌona keuꞌaunakia.
7 Wai ha ha kipomi emi nuatae ihobonai katobaibeni,
ia mai ꞌarara ꞌararami ꞌao bahiahi paunai aꞌi katobaibeni.
Pokina Tirama hanona maearima aona namonai nibaibeni hauna niraonaꞌau aina.
8 Tirama hanona herenai etaina ena aokoꞌo hoana kebenimi hanona kebeni banainimi,
ba rani ikoinai taba namokia heremiai keboꞌo,
weianai wai emi baraibarai akakia namokia boꞌona katobabainakia.
9 Puka robenai tererena ꞌabana etibaha,
“Ia nihore taba namokia boꞌokia
uraru haukia nibenakia aona
mai beruberunai,
ena aka bero hanona kemiaho
banaibanai.” Sal 112.9
10 Tirama weiana nihore biraura hauna ube nibena mai aniani nibena hauna kehore ube boꞌona kebenimi katobato,
kebaꞌomunakia,
emi aka namokia buabuakia boꞌokia kebaramanakia.
11 Ia wai heremiai taba ikoikiai kebaboꞌonakia ba katobaibeni rani ikoinai.
Weiana emi beruberu tabakia kataeaoainakia herekiai hanona maearima boꞌona namo ꞌabina katehinana Tirama herenai.
12 Baibeni akana neiana tubabaina hanona Tirama ena maearima robekia ibaraikia akana mo aꞌi nibabaina,
ꞌa aka neiana kehore maearima boꞌona abomo namo ꞌabina Tirama katebena.
13 Emi baibeni akana neiana nihore Keriso ena pou namona ṯohina pouna mai akana tubabaina hauna nibatohana,
abomo emi beruberu akana ia herekiai mai maearima ikoikiai herekiai hauna nibatohana,
weiana paunai maearima Tirama katebanamona.
14 Kate bahubaꞌari wai ahamiai raninai,
kateraona kiꞌa bahanimi pokina Tirama ena aokoꞌo hoana apaꞌuana wai heremiai paunai.
15 Namo ꞌabina Tirama kahabena ena beruberu apaꞌuana herekai hauna paunai,
beruberu weiana pouna ꞌabiai kahahina hina haraina hanona aꞌi ketaina.