Makedonia Aꞌikakauma Haukia Mai Aonamokia Beruberu Tebaibeni.
8
Uahoꞌabamai e,
ai ṯabaꞌiobinimi Tirama hanona ena aokoꞌo hoana ia ena marea maearimakia Makedoniai haukia ebenakia.
2 Ia hau haiara rarina aonai ṯemiaho abomo ṯeuraru kiꞌa baha,
iamo mai aonamokia beruberu boꞌona tebaibeni.
3 Au wai heremiai ia nabatohanakia,
taba herekiai hauna boꞌona tebaibeniaina,
abomo kipokia ekia nuataeai tebaibeni banaina.
4 Ia rani boꞌona tenoinamai,
ia abokiamo Tirama ena maearima Ierusalemai haukia ibaraikia akana katebabaina.
5 Ekia baibeni weiana hanona eapaꞌua kiꞌa baha ba ai taraonana hauna.
Koriꞌuaina hanona kipokia tebaibeni ainakia Obiapaka ꞌeunai kateao,
haeamona Tirama ena nuataeai kipokia tebaibeni ainakia ai ꞌeumaiai kateao.
6 Weiana buonai Tito tanoina,
ia aba beruberu akana neiana baiatamiai eaꞌi ramana paunai,
kebarainimi keaomo aka neiana katobaorena.
7 Taba ikoikiai hana tubabai harainakia,
emi aꞌikakaumai,
emi ꞌabiai,
emi ꞌiobiai,
emi nuataeai,
abomo emi raonaꞌau heremaiai haunai.
Ua buonai ai ṯanuatae beruberu akana neiana abomo katobabai haraina.
8 Au rauhubu haꞌi nahorotina.
Ia eꞌu nuatae hanona baika ekia baraibarai aea homana hauna kabawaira tinana heremiai ba kaꞌiobina wai emi raonaꞌau hanona tohana.
9 Wai aba toꞌiobina eka Obiapaka Iesu Keriso ena aokoꞌo hoana aea eapaꞌua aiho.
Ia hanona obia hauna,
ia wai paumiai uraru haunai eao,
pokina ena uraruai wai kebaobianimi.
10 Au eꞌu raona baraibarai akana neiana herenai hana ṉahomana,
wai taba ihau murikai toaꞌi ramana hauna patobaorena hana mai emi namo.
Aka neiana hanona wai toaꞌi rama ꞌuaina abomo tobabaina mai aomi ikoinai.
11 Ua buonai bariu aka neiana katobabaina keaomo katobaorena.
Iaꞌiramana tonuatae aina paunai heremiai ṯemiaho tabakia katoba orena.
12 Wai katobaibeni mai nuataemi raninai,
Tirama kehore wai heremiai ṯemiaho tabakia katobena haukia keaꞌi taeanakia,
ꞌa taba heremiai ahaꞌi hauna robana aꞌi keahuna.
13 Wai heremiai kepuma ba baika herekiai keꞌamaꞌama,
weiana hanona eꞌu nuatae ahaꞌi.
Ia nanuatae ha ha ikoikai kahaihobo.
14 Bariu rani neianai heremi taba teboꞌo haumi tekapu haukia katobarainakia,
ba wai emi kapu raninai ia ekia taba kateboꞌo aonai wai katebarainimi.
Weiana ikoikiai baraibarai ihobona kahaꞌina.
15 Puka robenai aba ererena ꞌabana,
“Boꞌona ebararo hauna ꞌeuna aꞌi eboꞌo kiꞌa baha,
bita mo ebararo hauna ꞌeuna aꞌi ebita ꞌaki.”
Paulo Aka Haukia Tito Mai ꞌAbana Ohi Euhunakia Teao Korinto.
16 Tirama namo ꞌabina nabena,
pokina emai nuatae katabarainimi hauna ihobonai Tito abomo nenuatae.
17 Emai noi ia kewahi heremiai hauna eaꞌi taeana.
Weiana emai noi paunai mo ahaꞌi,
ia kipona enuatae kiꞌa baha kewahi heremi.
18 Uahoꞌabaka ha ṯauhuna Tito ohi tiwahi,
ia hanona pou namona neiroro aina paunai Tirama ena marea maearima ikoikiai tibanamona hauna.
19 Weiana mo ahaꞌi,
ia hanona Tirama ena marea haukia tehore teaꞌi taeana ai keꞌabanamai kebarainamai,
kipokia eka raonaꞌau baibeni monina neiana kataeaoaina Ierusalema.
Weiana hanona eka nuatae baraibarai akana kewaira tina Obiapaka ena nuabi paunai.
20 Ai ṯaꞌima harainamai pokina ai raonaꞌau baibeni monina rarina neiana kataꞌimana aonai hau ha beho ha aꞌi metabu ahina aꞌi meꞌabi kiꞌa paunai.
21 Ai ṯanuatae aka namona mai berona katababaina Obiapaka mo wairanai ahaꞌi ia maearima wairakiai abomo.
22 Ba uahoꞌabaka haeai ha abomo ṯauhuna kipokia tiwahi,
rani boꞌokia tahobona ba taihana ia hanona ena nuataeai ebaraibarai.
Bariu ia aba eꞌiobi harainimi aonai nenuatae kiꞌa baha kebaraibarai.
23 Tito hanona au ꞌabaꞌu ṯaka haeamo wai ibaraimi.
Mai uahoꞌabaka weiakia ia kipokia tiwahi haukia hanona Tirama ena marea haukia teaꞌi taeanakia haukia Keriso ena nuabi katebawaira tinana paunai.
24 Ua buonai emi raonaꞌau hoana katoba ihanakia,
weiana Tirama ena marea haukia ikoikiai katebatohana abomo kateꞌiobina wai tapainimi hanona ebero.