2 ꞌEkamai katohorena aomiai.

Ai hau ha herenai beho aꞌi tababaina,

hau ha ena aꞌikakauma aꞌi taꞌi kiꞌana,

abomo hau ha aꞌi taꞌoina ena taba aꞌi taꞌi.

3 ꞌAbi neiana nahinana hanona puma kabenimi paunai ahaꞌi.

Ia ꞌuainai ahina benimi ꞌabana,

ai katamauri ꞌao kataꞌari reꞌa wai hanona rani ikoinai aomaiai katomiaho.

4 Au hanona wai ṉaꞌi taeanimi mai napai kiꞌa bahanimi,

ua buonai emai hauhaiara aokiai aoꞌu nitabura abomo naonamo kiꞌa baha.

5 Ai Makedonia ai takaraꞌau raninai abomo aꞌi tarai ꞌapua,

atetua haeai haeai aokiai tamiaho,

baika kipokia tabaiara,

aomai mai taꞌumai tamiaho.

6 ꞌA ao ꞌabeꞌabe haukia aokia niba taburanakia Tiramana ehore Tito euhuna heremaiai ba aomai eba taburanakia.

7 Weiana ena mai mo ahaꞌi,

ia wai aona aea tobatabura aihona pouna taona hanona aomai etabura,

abomo ṯonuatae katoihanaꞌu,

hereꞌuai tobabai kiꞌa haunai turaona kabe mai emi aka tabura au pauꞌuai hauna pouna ehina benamai hanona eꞌu aonamo eapaꞌua kiꞌa baha.

8 Eꞌu marere weiana atiu ahina heremiai hauna aomi ebaroꞌarina reꞌa,

bariu au weiana aꞌi naꞌarara aina.

ꞌUainai,

rani papana aꞌarara aina pokina araonana marere weiana aomi ebaroꞌarina.

9 Ia bariu hanona aoꞌu ninamo.

Weiana aomi tearoꞌari paunai ahaꞌi,

ia emi ao aroꞌari ehore ebaraona kabenimi paunai naonamo.

Wai aomi tearoꞌari hanona Tirama ena nuataeai erama,

ua buonai ai paumaiai kiꞌa ha aꞌi totabu ahina.

10 Ao aroꞌari weiana Tirama ena nuataeai nirama hauna hanona maearima aona nibahaeaina nibaraona kabena bamauri ketabu ahina,

weiana hauna aꞌi kahaꞌarara aina.

Ia ao aroꞌari hanopaka ena nuatae paunai nirama hauna hanona ꞌari kebaramana.

11 Ao aroꞌari neiana Tirama ena nuataeai erama hauna paunai heremiai ebaramanakia tabakia katoraona harainakia.

Toaka harai,

emi beho ahaꞌi hauna tobatoha haraina,

beho topuere aina,

Tirama totaꞌu aina,

raonaꞌau nuataenai toaka,

beho tobaberonakia.

Wai ꞌeka ikoikiai emi beho ahaꞌi hauna tobawaira tinana.

12 Au arere benimi hanona beho ebabaina hauna ꞌao herenai beho erama hauna paunai ahaꞌi,

ꞌa Tirama wairanai wai aea turaonaꞌauai kiꞌa bahanamai hauna kewaira tina paunai arere benimi.

13 Weiana ehore aomai ebatabura haraina.

Weiana mo ahaꞌi,

Tito ena aonamo paunai aomai abomo enamo kiꞌa baha pokina wai tobaraina aona toba namona paunai.

14 ꞌUainai au Tito wairanai apainimi,

ba wai au aꞌi tobahaumaeanaꞌu.

Tahina benimi tabakia ikoikiai hanona ꞌabi tohakia,

ihobonai mo tobatohana ai Tito wairanai tapainimi hauna hanona ꞌabi tohana.

15 Tito ena raonaꞌau heremiai hauna niapaꞌua kiꞌa baha,

pokina ia niraona ꞌinina wai ikoimiai aiana tokaꞌaina abomo toaꞌi taeana mai taꞌumi mai marikimi.

16 Eꞌu aonamo eapaꞌua pokina aꞌiobi harai kiꞌa bahanimi wai emi hoahoa tenamo.