Tirama Ena Aka Haukia Hanona Atetua Aokiai Katebapahihi.
6
Ai Tirama kipokia ṯaka haeamo haumai ṯabahi ahinimi,
Tirama ena aokoꞌo hoana toaꞌina hauna aꞌi katobakiꞌana.
2 Pokina Tirama eꞌabi etibaha,
“Eꞌu nuatae ranina tohanai
aiami aona,
abomo bamauri beraurana tohanai
abarainimi.”
Isa 49.8
Au wai nahina benimi Tirama ena nuatae ranina weiana hanona bariu, bamauri beraurana weiana abomo bariu.
3 Hau ha aona aꞌi tamabakaiꞌau kaiꞌauna,
weiana maearima emai aka beho aꞌi katetabu ahina paunai.
4 Ia wairakiai ai kipomai tabatohanamai ai Tirama ena aka haumai taeara haeai haeai ikoikiai aokiai,
weiakia ao aroꞌari,
hau haiara,
mai atetua aokiai tabapahihi,
5 teꞌatinamai,
teba wapuranamai abomo toꞌukiai tehari abunamai,
taka ꞌari,
aꞌi taparua harai abomo mareꞌa taꞌari,
6 emai robeai,
aotipai,
bapahihiai abomo hoahoa namokiai,
Auba Robe taburanai mai maearima iraonaꞌauaikiai maearima tabaihanakia ai Tirama ena taꞌaraꞌi haumai.
7 ꞌAbi tohana tahina karahina,
mai Tirama ena hiabuai taka.
Bero akakia hanona emai huari tabakia imamai abira abirai taꞌinakia.
8 Baika atamai teaꞌi taeana baika atamai teaꞌi kiꞌana,
tebapoꞌonamai abomo temariki ainamai,
iamo ai Tirama ena aka haumaiai taeao.
Maearima baiꞌoi haumaiai tibaonamai,
iamo ai hanona ꞌabi tohana ṯahinana.
9 Maearima aꞌi ṯeꞌiobinamai,
ia Tirama neꞌiobinamai.
Maearima tiraonana aba ṯaꞌari,
ia maurimaiai ṯamiaho.
Puma rarina tibahoainamai,
ia aꞌi taꞌari baihana.
10 Aomai tibahaihaina ia rani ikoinai ṯaonamo.
Uraru haumai ꞌabana ia maearima boꞌokia ṯabaobianakia.
Heremai taba ahaꞌi moioina,
ꞌa taba ikoikiai hanona ai ꞌeumaiai ṯemiaho.
11 Emai hau Korinto ai haumi e,
taba ikoikiai wairamiai tahina pounakia,
aomai ikoinai heremiai tabawaira tinana.
12 Ai hanona wai ṯaokoꞌo ainimi ia wai hanona ai aꞌi tuaokoꞌo ainamai.
13 Au wai nahina benimi matoha nahaꞌu ꞌabana,
ai ṯababai heremiai ihobona pato babaina heremaiai,
aomi ikoinai heremaiai katobawaira tinana.
Aika Hanona Mauri Tiramana Ena Marea Robena.
14 Aꞌi tiaꞌikakauma haukia kipokia aꞌi katobahaeamo.
Bero mai kiꞌa aea katebahamomo aiho?
Ea mai wapura hanona aꞌi katemiaho hamomo.
15 Keriso mai Tiaporo aokia aea katebahamomo aiho?
Aꞌikakauma hauna mai aꞌi niaꞌikakauma hauna ohi ekia raona hanona hamonai aꞌi kemiaho.
16 Tirama ena marea robe mai kaibaꞌuku terarua hanona aea katebahamomo aiho?
Aika hanona mauri Tiramana ena marea robena.
Tirama kipona ṉa eꞌabi aiho,
“Au hanona ia kipokia katamiaho
oioi,
abomo aꞌi kahabonakia.
Au hanona ia ekia Tiramai kaeao,
ia hanona au eꞌu maearimai kateao.” Lev 26.12
17 Ua buonai Tirama eꞌabi etibaha,
“Wai hanona ia tomohabonakia
herekiai tomokapare.
Opu akakia aꞌi katobabai.
Ba au wai kaꞌi taeanimi. Isa 52.11; Esk 20.34, 41
18 Au hanona wai Hamamiai kaeao,
wai hanona au nahaꞌu haukia
mai babiꞌekia ai katoao.
Tabura ikoinai Obiapakana,
eꞌu ꞌabi neiana.” 2 Sam 7.14