5
Hauanika hanona itu ꞌabana,
aika haꞌiobina eka itu neia hanopakai nahamiaho aina hauna katekakina kupa ai itu ha Tirama kehore kebenaka,
weiana hanona maearima imakiai aꞌi tebabaina ia Tirama kipona ebabaina ituna kemiaho banaibanai.
2 Aika bariu hauanika ituna neianai nahamiaho aina nahaꞌarara ꞌarara,
eka nuatae apaꞌuana hanona eka itu kupai hauna weiana mauri hauanina pahabatotona habuni ꞌabana.
3 Aika habuni weiakia kahaba totonakia raninai,
mai hauka aꞌi katetabu ahinaka.
4 Hanopaka ituna hauanika neianai nahamiaho oho aonai nahapuma hoai nahaꞌarara ꞌarara hanona hanopakai hauanika habunina pahabakuri ahina paunai ahaꞌi,
ia mauri hauanina habunina kupai hauna pahabatotona paunai,
weiana mauri hauanina kehore ꞌari hauanina ꞌekana keaꞌina mauri banaibanai hauaninai keao.
5 Tirama hanona aka neiana aika ꞌeukai ebaꞌoruna,
ia ehore Auba Robe ebenaka aka neiana wairai kerama hauna ibatohana.
6 Ua buonai aika rani ikoinai aoka nitabura.
Aika haꞌiobina hauanika neianai nahamiaho aonai Obiapaka nemiaho ꞌekana herekai hanona atauꞌai.
7 Aika hanona aꞌikakauma taearanai nahamauri,
ia taba nahaiha paukiai ahaꞌi.
8 Aika aoka nitabura abomo eka nuatae tohana hauanika ituna neiana kahahabona kahaeao Obiapaka kipokia kahamiaho.
9 Hauanika ituna neianai kahamiaho ꞌao kahahabona,
ꞌabi ṉa ahaꞌi,
eka nuatae apaꞌuana tohana hanona Obiapaka aona kahabaonamona.
10 Pokina aika ikoikai Keriso ena bakai apaꞌuana wairanai kahakoroti kebabakainaka,
ha ha namo ꞌao kiꞌa hauani maurinai hababai ihobonai ꞌarana kahaꞌina.
Baibua Akana Kahababaina.
11 Ai ṯaꞌiobina Obiapaka aea kahataꞌuai aihona paunai maearima ṯabahi ahinakia.
Tirama eꞌiobi harainamai,
ba au nabuabenimi wai abomo aomi tohanai ua patoꞌiobi aihonamai.
12 Ai hanona heremiai kipomai ibanamomai aꞌi ṯahina muena,
ia ai hanona wai bero namona ṯabenimi katoapainamai,
ba weiakia maearima ihaihana mo tiapaina ia aokia aꞌi tiraona harai haukia ekia ꞌabi katobamuena.
13 Emai babai mai emai ꞌabiꞌabi matoha poꞌo haukia ꞌabana raninai weiana hanona Tirama atana paunai,
ia ai ṯaotipa raninai weiana hanona wai paumiai.
14 Weiana hanona Keriso ena raonaꞌau ehore ai ebahi ahinamai.
Ai ṯaꞌiobi haraina hau hamona aika ikoikai paukai eꞌari,
weiana anina aika ikoikai ia kipokia haꞌari.
15 Keriso maearima ikoikiai paukiai eꞌari weiana hanona bariu ṯemiaho haukia ia kipokia ekia miahoai aꞌi katemauri,
ꞌa Keriso ia paukiai eꞌari haeamona emikiri hauna paunai katemauri.
16 Ua buonai bariu rani neianai niaoaina ai hau ha hanopaka ena raonaraona taearanai aꞌi kataꞌuahina,
ꞌuainai Keriso hanona ua taꞌuahi aihona ia bariu hanona ua homana aꞌi ṯaraonana.
17 Hau ha Keriso aonai nemiaho raninai,
ia hanona aba maearima mahamahana,
mauri ꞌaiꞌaina aba ekapare ia aba maearima mahamahanai eao.
18 Taba neiakia ikoinai hanona Tirama ebabainakia.
Tirama ehore ia mai aika baiataka ebabaibuana Keriso paunai,
ba baibua akana ebenaka maearima kahamai ainakia ia ena hauai kateao.
19 Tirama ehore Keriso aonai ia mai hanopaka maearimakia baiatakia ebabaibuana,
maearima ekia kiꞌa aꞌi etuabinakia.
Ba baibua ꞌabina neiana ebenamai katahinana.
20 Ua buonai ai hanona Keriso pinanai ṯaeao,
Tirama hanona ai pinamaiai nehina benimi.
Ai Keriso atanai wai ṯahina benimi.
Wai Tirama kipokia katobaibua.
21 Keriso hanona kiꞌa hauna ahaꞌi,
ꞌa aika paukai Tirama ehore kiꞌa haunaia ebaona,
weiana aika hanona Keriso aonai bero haukai kahaeao Tirama wairanai.