Kepu Namona Puou Aonai ꞌAbana.
4
Tirama ena aokoꞌo ai aka neiana ebenamai ṯababaina,
ua buonai ai aomai aꞌi niꞌabeꞌabe.
2 Ai bunianai haumaea akakia tababai haukia aba taneꞌe,
ai baiꞌoi akakia aꞌi ṯababai abomo Tirama ena ꞌabi aꞌi ṯahina haeaina.
Ia ꞌabi tohana ṯahina karahi haraina,
weianai maearima aokia tohanai kateꞌiobina ai maearima aea homamai Tirama wairanai.
3 Ia pou namona ṯairoro aina hauna maearima herekiai ebuni raninai,
paꞌe weiakia mo kateꞌari haukia herekiai ebuni.
4 Satani hanopaka neiana tiramana nihore aꞌi tiaꞌikakauma haukia aokia nikaiabunakia paunai,
pou namona eana weiana Keriso ena nuabiai nibawaira tinana hauna aꞌi ṯeiha tinana.
Keriso hanona Tirama ihobo ihobona hauna.
5 Ai kipomai poumai aꞌi ṯairoro aina,
ia ai ṯairoro ṯaꞌabi Iesu Keriso hanona Obiapaka,
abomo ai hanona emi taꞌaraꞌi haumai Iesu paunai.
6 Tirama eꞌabi etibaha,
“Wapura aonai ea merama.”
Ba Tirama weiana ehore ena eai ai aomai ebaeana,
Tirama ena nuabi Keriso wairanai ewaira tina hauna obona ṯaobo mai taihana.
7 Ai hanona puou ꞌabana,
aomai kepu namona neiana nemiaho,
weiana nihore nibaihanakia hiabu apaꞌuana hanona Tirama herenai nimai,
ia ai heremai ai aꞌi nimai.
8 Taeara boꞌokia haeai haeai ai tibatetuanamai iamo aꞌi ṯaꞌeho,
taba boꞌokia aomai tibaroꞌarinakia iamo aomai aꞌi niꞌabeꞌabe.
9 Boꞌokia tiꞌoatanamai iamo Tirama ai aꞌi ehabonamai,
rani boꞌokia tiahunamai tibaꞌehonamai iamo aꞌi ṯakiꞌa.
10 Nahomanai rani ikoinai hauanimaiai Iesu ena ꞌari ṯabuana,
weiana hanona Iesu ena mauri ai hauanimaiai nemiaho hauna kewaira tina paunai.
11 Ai ṯamiaho emai mauri aonai rani ikoinai Iesu paunai ꞌari ṯawairana,
weiana hanona ai hauanimai neiana keꞌari hauna aonai Iesu ena mauri kewaira tina.
12 Weiana paunai ꞌari hanona ai aomaiai niaka,
ia mauri hanona wai aomiai niaka.
13 Puka robenai ṉa erere aihona,
“Au aꞌikakauma paunai,
aꞌabi.”
Aꞌikakauma hoana hamona weianai,
ai abomo ṯaꞌikakauma paunai,
ṯaꞌabi.
14 Ai ṯaꞌiobina Tirama,
eka Obiapaka Iesu ꞌari ai ebamikirina hauna,
kehore ai abomo Iesu kipokia kebamikiri haeamonamai,
ba wai mai ai kipokia keaoainaka ia herenai kahakoroti.
15 Taba neiakia ikoikiai hanona wai emi namo paunai ṯababainakia,
weiana Tirama ena aokoꞌo hoana maearima boꞌona boꞌona ketabu ahinakia,
ba namo ꞌabikia boꞌona Tirama katebena,
atana kateaꞌi taeana.
Aꞌikakauma Taearanai Nahamauri.
16 Ua buonai aomai aꞌi niraꞌoraꞌo.
Hauanimai hanona niꞌabeꞌabe,
iamo aomai hanona rani ha ha nimaha maha.
17 Hau haiara papana neiana bariu rani papana ṯahoaina hauna kehore nuabi rarina ꞌakina mai banaibanaina hauna kemaiaina,
nuabi weiana hanona eapaꞌua kiꞌa baha ba hau haiara neiana.
18 Ua buonai mahaka hanona taba nahaihanakia haukia herekiai aꞌi kemiaho ia aꞌi naha ihanakia tabakia haukia kahaiha,
pokina nahaihanakia tabakia hanona aꞌi katemiaho homaꞌa ia aꞌi nahaihanakia tabakia hanona katemiaho banaibanai.