ꞌAbiꞌuai Mahamahana Ena Aka Haukia.
3
Turaonana ai kipomai ṯapai muenamai,
u?
ꞌAo baika tibabaina ꞌabana,
baika herekiai ai ibanamomai marerekia katanuatae ainakia kataꞌi katawahi heremi,
ꞌao wai heremiai ibanamomai marerekia kataꞌi kataeao baika herekia?
Ahaꞌi ꞌakina.
2 Wai hanona ai emai marere,
aomaiai tererena maearima ikoikiai ṯeꞌiobina abomo ṯetuabina.
3 Ewaira tina harai wai hanona Keriso ena marere,
ai tamaiaina,
umu ai aꞌi ererena ia mauri Tiramana ena Auba Robeai ererena,
pihara ahanai aꞌi ererena ia maearima aonai ererena.
4 Ai ṉa ṯapa aiho pokina Tirama wairanai weiana ṯabatohana Keriso paunai.
5 Ai hanona aꞌi ṯaꞌabi kipomai emai taburai aka neiana ṯababaina,
ꞌa tabura weiana hanona Tirama herenai nimai.
6 Tirama ehore ꞌabiꞌuai apaꞌuana mahamahana akana katababaina haukiai ebaonamai,
ꞌabiꞌuai mahamahana neiana hanona rauhubu pukanai tererena hauna ahaꞌi ia Auba Robe ꞌeuna.
Rauhubu irere hauna hanona ꞌari kemaiaina ia Auba Robe hanona mauri kebenaka.
7 Rauhubu pihara ahanai ererenakia ba Mose ebena raninai Tirama ena nuabi ewaira tina Mose wairanai ea,
ea kiꞌa baha buonai Isaraela haukia aꞌi teiha ꞌariai ꞌariaina,
ba rani aꞌi ehomaꞌa ea weiana mahari mahari eꞌakauma.
Rauhubu weiana ꞌari nimaiaina hauna nuabi uahomana aonai emai raninai,
8 Auba Robe ena aka weiana mauri nimaiaina hauna nuabina hanona aea keapaꞌua aiho!
9 Maearima beho ꞌekakiai kehorotina akana enuabi raninai maearima bero kebenakia akana nuabina hanona aea keapaꞌua aiho!
10 Nuabi ꞌuaina hauna enuabi,
iamo nuabi apaꞌuana mahamahana emai hauna paunai nuabi weiana hanona matoha aꞌi enuabi.
11 Taba emiaho ꞌapua hauna mai nuabina raninai,
kemiaho banaibanai tabana nuabina hanona aea keapaꞌua aiho!
12 Emai buabeni neiana paunai ṯaꞌabi tabura.
13 Mose hanona mukoai wairana eꞌaeana pokina Isaraela haukia ea weiana niꞌakauma hauna aꞌi temeihana paunai.
Ai hanona aka uahomana aꞌi ṯababaina.
14 Aokia hanona tekaiabu toha abomo bariu rani neianai rauhubu ꞌaiꞌaina pukana tetuabina aonai ia aokia hanona muko hamona weianai tekaiabunakia.
Hau ha Keriso ena mauri aonai ketoto hanona muko weiana kekapare.
15 Bariu rani neianai abomo Mose ena rauhubu katetuabina raninai,
muko hanona aokia nikaiabu ohona mo.
16 Ia hau ha keao Obiapaka herena raninai,
muko ia herenai hauna aba iaꞌi obo.
17 Obiapaka hanona Auba,
ba Obiapaka Aubana aeꞌeai hanona aika rauhubu herenai haꞌabaea.
18 Aika ikoikai wairakai muko keirubu Obiapaka ena nuabi kahabawaira tinana matoha oreore ꞌabana,
ba aokai Obiapaka Aubana niaka hanona aika ia ihobo ihobonai nahaeao nuabi niapaꞌua hao apaꞌua hao hauna aonai.
Obiapaka hanona Auba,
ia nihore aka neiana nibabaina.