2
Eꞌu raona abakorina hanona aꞌi kawahi heremi aomi aꞌi mehaiara taearanai.
2 Pokina au wai aomi kabahaiarana hanona tai kehore au kebaonamonaꞌu?
Ia wai mo naiami aomi aba abahaiarana haumi.
3 Weiana paunai marere naiana arerena,
au kawahi raninai wai au katobaonamonaꞌu haumi aomi aꞌi mabahaiarana marikina.
Pokina au aꞌiobi haraina au kaonamo hanona wai ikoimiai abomo katoaonamo.
4 Arere benimi raninai aoꞌu ehaiara abomo epuma mahaꞌu mai beina,
weiana hanona aomi kabahaiarana paunai ahaꞌi ia kabaꞌiobinimi au wai naraonaꞌau ainimi.
Heremiai Beho Tebabai Haukia Ekia Beho Katohina Hao.
5 Hau ha ehore ꞌabana aona ebahaiarana hanona au aoꞌu mo aꞌi ebahaiarana ia wai ikoimiai aomi ebahaiara ꞌapuana.
Au aꞌi kaꞌabi pahihi kiꞌa baha ia herenai.
6 Hau weiana ena kiꞌa ꞌarana wai boꞌomi tohore puma tobena hanona aba etaina.
7 Bariu hanona ena kiꞌa katohina hao abomo aona katobataburana,
aona aꞌi mebahaiara kiꞌa bahana taꞌuna.
8 Ua buonai au wai nanoinimi,
wai ia turaonaꞌauai tohana hoana katobaihana.
9 Marere weiana arere benimi ena poki tohana hanona au kaꞌiobina aiaꞌu tukaꞌai tohana rani ikoinai,
ꞌao ahaꞌi.
10 Wai hau ha ena kiꞌa katohina hao hanona au abomo ena kiꞌa kahina hao.
Au—ia kahina hao paunai—ena kiꞌa ahina hao weiana hanona Keriso wairanai ababaina wai paumiai.
11 Weiana hanona Satani kehore aꞌi meꞌoinaka marikina,
pokina aika hanona ena baihobo akakia aba haꞌiobinakia.
Paulo Ena Nuatae Tito Keihana.
12 Au aeao Toroa aiarana Keriso ena pou namona kairoro aina aonai taeara ikaikau au weia Obiapaka ena aka kababaina.
13 Ia aoꞌu hanona aꞌi enamo pokina uahoꞌabaka Tito weia aꞌi atabu ahina,
haparua ahinana maearima weia haukia herekiai ba aeao Makedonia.
Aika Hanona Timi Namona Keriso Herenai Nimai.
14 Iamo Tirama namo ꞌabina nabena pokina Keriso nihore rani ikoinai neꞌuai ainamai ena mauri taburana aonai katamiaho,
ai Keriso pouna namona katairoro aina kateꞌiobina ꞌeka maikoinai matoha timi namona nirama otaraina ꞌabana.
15 Ai hanona timi ha ꞌabana Tirama wairanai Keriso herenai nimai weiakia timauri mai tiꞌakauma haukia baiatakiai.
16 Weiakia tiꞌakauma haukia herekiai ai hanona timi kiꞌa obona ꞌari kemaiaina,
weiakia timauri haukia herekiai ai hanona timi namona mauri kemaiaina.
Tai etaina aka neiana kebabaina?
17 Ai hanona boꞌokia ꞌabakia ahaꞌi,
ia hanona Tirama ena ꞌabi kawakawa tabanai tibaona,
ꞌa ai hanona ꞌabi tohana ṯairoro aina mai aomai tohanai Tirama wairanai mai Keriso aonai ihobona Tirama euhunakia haukia ꞌabana.