Paulo Ena Marere Ibaruana
KORINTO
Haukia Herekiai
Banamo ꞌAbina.
1
Au Paulo Keriso Iesu ena iuhubeau hauꞌu Tirama ena nuatae paunai,
mai aꞌikakaumai uahoꞌabaka Timoteo ohi marere neiana ṯarerena niwahi Tirama ena marea haumi Korinto aiaranai ṯomiaho abomo Tirama ena maearima ikoimiai Akaia hanona maikoina aonai ṯomiaho haumi heremiai.
2 Ṯabahubaꞌari Tirama aika Hamaka mai Obiapaka Iesu Keriso ekia aokoꞌo hoana mai baibua hanona ahamiai kemiaho.
Tirama Hanona Ao Bakiro Ikoinai Pokina.
3 Tirama kahabanamona aika eka Obiapaka Iesu Keriso hamana.
Ia hanona aokoꞌo mai ao bakiro ikoinai pokina Tiramana.
4 Emai aroꞌari ikoikiai ia ehore aomai ebakironakia,
weiana buonai Tirama aomai ebakironakia ihobonai bariu tiaroꞌari haukia aokia katabakirona abomo ketaina.
5 Pokina Keriso ehau haiara ihobonai ai abomo rani boꞌona ṯahau haiara,
ba rani boꞌona ao bakiro ꞌeumaiai niapaꞌua Keriso paunai.
6 Ai katahau haiara hanona wai aomi ibakirona mai ibamaurimi paunai,
ai aomai kebakirona wai aomi abomo kebakirona,
pokina ao bakiro weianai tabura katoaꞌina haiara weiakia herekiai katokori ꞌini ai hau haiara aokiai ṯakori ꞌini ꞌabana.
7 Emai buabeni heremiai hauna ekori ꞌini,
pokina ai ṯaꞌiobina kipokia nahahau haiara ihobonai ai mai wai kipokia aoka kebakironakia.
8 Uahoꞌabamai e,
ai tanuatae Asia hanonai taroꞌari haukia kato ꞌiobinakia.
Ai hau haiara tahoainakia hanona teapaꞌua kiꞌa baha abomo tepuma kiꞌa baha,
ai katamauri hauna aꞌi tabuabeni ꞌapuana.
9 Ai kipomai aomaiai taonobaina hanona aba kataꞌari.
Ia neiana erama hanona ai kipomai haumaiai aꞌi kataꞌikakauma paunai,
ꞌa ꞌariai nibamikiri muenakia Tiramana ikupaianamo kata aꞌikakaumana paunai.
10 Ia ehore ꞌari kiꞌa obona herenai ebamaurinamai abomo kebamaurinamai.
Haeamona ia ṯabuabena kebamauri muenamai.
11 Wai abomo katobarainamai emi bahubaꞌari ai.
Ba bahubaꞌari boꞌokia weiakia paukiai Tirama keba namonamai,
weiana maearima boꞌokia katehore namo ꞌabikia Tirama katebena ai paumaiai.
Paulo Ena Raona Ebaꞌoruna Hauna Ebahaeaina.
12 Emai apa hanona neiana aomai tohanai ṯabatohana,
emai mauri hanopakai abomo emai baihatiaꞌa wai kipokia hanona mai robena mai berona Tirama ꞌeunai.
Ai neiana tababaina hanona hanopaka ena aobero ai ahaꞌi,
ia Tirama ena aokoꞌo hoana hiabunai.
13 Ai wai katotuabina mai obona katobo hauna mo ṯarere benimi,
nanuatae maikoina katoꞌiobi haraina.
14 Wai bariu obomai aꞌi tuobo harai reꞌa au nanuatae wai ai katoꞌiobi harainamai,
weiana eka Obiapaka Iesu Keriso ena mai raninai ai wai ṯapainimi ihobonai wai ai katoapainamai.
15 Au neiana aꞌiobi haraina paunai,
weiana eꞌu raona abakorina kawahi ꞌuai heremi banamo ibaruana katoaꞌina.
16 Eꞌu raona abaꞌoruna hanona kawahi heremi ba kaeao Makedonia,
haeamona Makedoniai kamue hanona kamai heremi,
ba wai katohore katobarainaꞌu kaeao Iudea.
17 Wai turaonana eꞌu raona weiana abaꞌoruna raninai ꞌamaꞌamanai abakorina,
u?
ꞌAo hanopaka raonaraonanai ababaina ba rani hamonai ꞌe mai ahaꞌi ahinana,
u?
Ahaꞌi ꞌakina.
18 Tirama hanona aia ibabua ꞌauna hauna,
ihobonai emai ꞌabi ewahi heremi hauna hanona rani hamonai ‘ꞌe’ mai ‘ahaꞌi’ aꞌi tahinana.
19 Sila,a
Timoteo mai au wai baiatamiai tairoro aina hauna Tirama Nahuna Iesu Keriso hanona rani hamonai ‘ꞌe’ mai ‘ahaꞌi’ aꞌi ehinana,
ia aonai hanona rani ikoinai ꞌabi tohana ‘ꞌe’ mo nemiaho.
20 Pokina Keriso hanona Tirama ena ꞌabiꞌuai ikoikiai eba tohanakia.
Weiana buonai Iesu Keriso paunai ‘Amen’ nahahinana Tirama atana kahabanamona.
21 Wai mai ai kipokia Keriso aonai ebakori ꞌininaka hauna hanona Tirama.
Ia ehore ebahiabunaka.
22 Ia ena hoa haukai ehore ꞌauna aika hanona ia ꞌeuna abomo ena Auba Robe aokai ehorotina weiana hanona keba maurinaka hoana.