Kahabahamomo Keriso Hauanina Aonai.
4
Au Paulo Obiapaka ena aka ababaina buonai wapura itunai tekaiabunaꞌu,
ba wai Tirama eaparinimi haumi nabahi ahinimi ia ena nuatae maurinai katomiaho.
2 Rani ikoinai katoꞌaiaunu,
katomamata,
katobakiro,
raonaꞌauai ha ha emi puma ꞌekakiai katobarai barai.
3 Auba Robe bahamomo weiana ebenimi baibua ai ebahamomonimi hauna katoꞌini bena.
4 Weiana Keriso hauanina hanona hamona,
Auba Robe abomo hamona,
ihobonai mo Tirama eaparinimi ebahamomonimi buabeni hamona weiana aonai katomiaho.
5 Obiapaka abomo hamona,
aꞌikakauma abomo hamona,
ꞌuere robe abomo hamona.
6 Tirama abomo hamona,
ia hanona maearima ikoikai Hamaka,
ia hanona maearima ikoikiai arakiai,
mai maearima ikoikiai aokiai niaka,
abomo maearima ikoikiai aokiai nemiaho.
7 Ia Keriso aika ha ha ena ibeni haeai tohakia ebenaka,
aokoꞌo hoana weiana hanona kipona ena nuatae ihobonai ewatenakia maearima ha ha ebenakia.
8 Puka robenai ṉa erere aihona,
“Ia ekaraꞌau eao ꞌubi ꞌakina raninai,
wapura haukia eaoainakia
mai maearima beruberu
ebenakia.” Sal 68.18
9 ꞌAbi neiana ‘Ia ekaraꞌau eao ꞌubi’ anina hanona taba?
Weiana anina hanona ia aba eriri ꞌuai eao hano benunai.
10 Eao hano benunai hauna haeamona ekaraꞌau emue eao kupa ꞌubina ꞌakinai hanona ena obiai ꞌeka maikoinai mai taba ikoikiai kebahu abunakia paunai.
11 Ia hauna kipona ibeni ena robe haukia ebenakia hanona baika iuhubeau haukiai kateao,
baika mahabanai haukia kateao,
baika ebaneria haukiai kateao,
baika hanona iroro haukiai mai baika bamarere haukiai kateao.
12 Keriso ibeni weiakia ebaibeni hanona Tirama ena robe maearimakia ikoikiai kebaꞌorunakia marea akakia ibabaikiai,
marea ketabura kekori ꞌini weiana hanona Keriso hauanina.
13 Taeara neianai aika ikoikai kahamai kahabahamomo Tirama Nahuna kahaꞌikakaumana mai kahaꞌiobina keao mo Obiapaka aonai kahakiro harai,
Keriso ena hoahoa namona maikoina ihobonai kahaeao.
14 Ba aika hanona miori papakia ꞌabakiai aꞌi kahaeao,
maearima weiakia ekia baiꞌoi ꞌabikiai mai ekia iriara ai aꞌi kateꞌoinaka matoha baura ꞌabana keabuao abuaonaka.
15 Ia aika raonaꞌau ai ꞌabi tohana kahahinana hanona taba ikoikiai aokiai aika kahapaꞌua Keriso ꞌabanai kahaeao,
ia hanona aika eka ara hauna.
16 Keriso aonai hanona hauani maikoina earaꞌau haeamo abomo hauani maikoina hanona ibakai nihore niaꞌi ꞌinina ba hauani puapuakia ha ha ikau ena aka ai tibarai barai tiaka,
weiana hanona hauani maikoina raonaꞌauai kipona nibapaꞌuana nibakori ꞌinina.
Mauri Mahamahana Keriso Aonai.
17 Ua buonai Obiapaka atanai au wai nahina benimi abomo naba raonanimi,
bariu wai emi miaho maurina hanona aꞌi keao rama haeai haukia ekia mauri ꞌabana,
ia ekia raona hanona anikia ahaꞌi.
18 Ia aokia hanona tewapura abunakia.
Tirama ebaibeni maurina hanona ia herekiai ahaꞌi,
pokina ekia raonaraona ahaꞌi mai ekia ao tubu paunai.
19 Ia taba tibabaina hauna aꞌi tihaumaea aina hoahoa kiꞌa obokia tibabai,
abomo hoahoa ꞌopukia ṯenuataeai kiꞌa bahanakia.
20 Ia wai Keriso pouna hanona ua aꞌi tomarereai aihona.
21 Abaꞌiobina wai Keriso pouna tona abomo ꞌabi tohana weiana Iesu aonai nemiaho hauna taearana tebaꞌiobinimi.
22 Ua buonai hauanimi ꞌaiꞌaina weiana mauri kiꞌa obona taearanai eba miahonimi hauna katobakuri ahina,
weiana hauani ena nuatae baiꞌoikia tihore kipona niaꞌi kiꞌana.
23 Aomi mai emi raonaraona hanona katobamaha mahanakia.
24 Hauani mahamahana katobatotona,
weiana hanona Tirama ihaihanai erama hauna ꞌabi tohanai ebero mai erobe.
25 Ua buonai wai ikoimiai baiꞌoi katohabona,
heremi haukia herekiai ꞌabi tohakia katohina,
pokina aika ikoikai hanona hauani puapuakia ha ha Keriso hauanina hamona aonai.
26 Aomi tiopuere raninai katoꞌima ꞌima harainimi kiꞌa aꞌi katobabaina,
beraura maikoina aomi mai opuerekia katomiaho hanona aꞌi kenamo.
27 Satani ꞌekana aꞌi katohorena.
28 Nibainao hauna bainao mehabona meaka kipona taburanai aka namona mebabaina,
ba weianai uraru haukia kebarainakia.
29 Pinamiai ꞌabi kiꞌa obokia ha aꞌi katohina ꞌapuana,
ia ꞌabi namokia katohina,
aiami tiona haukia kebarainakia katetabura,
ba emi ꞌabi tohinana hauna kehore namo kebenakia.
30 Tirama ena Auba Robe aona aꞌi katobaokoꞌona,
ia hanona Tirama ena batoha hoana wai heremiai keao rani weiana kemai hanona kebamaurinimi.
31 Baibata nuakiꞌa opuere baiara mai ꞌuahiꞌuahi neiakia katohabonakia,
haeamona bakiꞌa raonaraonakia haeai haeai katohabonakia.
32 Ia ꞌabami ha ha herekiai katorabo harai mai aomi keberuberu,
ba ha ha ꞌabami ekia kiꞌa katohina hao,
ihobona Tirama ehore Keriso paunai emi kiꞌa ehina haonakia ꞌabana.