Keriso Aona Ihobonai Ha Ha ꞌAiaunuai ꞌAbami Kipokia Katobapaꞌuanimi.
2
Naꞌiobina emi bahamomo Keriso herenai nibataburanimi,
mai ena raonaꞌau ai nibarainimi.
Wai Auba Robe ai tubahamomo,
emi aokoꞌo mai rabo harai ꞌabami herekiai.
2 Weiana paunai nabahi ahinimi,
raona hamonai eꞌu aonamo katobapaꞌuana,
raonaꞌau hamonai katomiaho haeamo,
auba hamonai mai nuatae hamonai.
3 Kipomi taba ha aꞌi katobabaina baiꞌoata ai ꞌao apa ai,
ia ha ha ꞌaiaunu ai ꞌabami katoba apaꞌuanakia.
4 Ha ha kipomi emi namo aꞌi katotabuna,
ia ꞌabami ekia namo katotabuna.
5 Keriso Iesu aona ihobonai wai abomo katoaꞌina.
6 Keriso hanona taba ikoinai
Tirama ihobonai nemiaho,
iamo Tirama ohi peihobo
hauna aꞌi eraonana.
7 Kipona taba ahaꞌi ꞌabanai ebaona,
taꞌaraꞌi haunai eao,
maearima ihobokiai erama.
8 Maearima ihobo hobonai
eao aonai,
kipona eꞌaiaunu aina,
Tirama aiana eona eao mo eꞌari,
weia matiu ibiri ropo ꞌubinai eꞌari.
9 Weiana buonai Tirama ehore
eaꞌi taeana ꞌubi ꞌakinai,
ata ebena ata ikoikiai ꞌubikiai.
10 Kupa ai,
hanopaka ai mai
hanopaka baꞌanai haukia ikoikiai
Iesu atanai katekai pehu.
11 Maearima ikoinai pinakiai
katehina pouna Iesu Keriso
hanona Obiapaka,
Hamaka Tirama ibanuabina.
Maearima Herekiai Katoea Bihiu ꞌAbakia.
12 Ua buonai,
eꞌu raonaꞌau haumi e,
kipokia hamiaho aonai aiaꞌu tokaꞌaina,
ia bariu heremiai aꞌi namiaho ia rani ikoinai aiaꞌu katokaꞌainakia emi mauri akana katobaore haraina mai taꞌumi mai ꞌururu ꞌururumi weiana hanona taba apaꞌuana.
13 Pokina Tirama hanona wai aomiai niaka ena nuatae taearanai kipomi katobabaina mai hiabuna.
14 Taba ikoinai atetuai ꞌao baihara taeai aꞌi katobabainakia.
15 Weiana buonai wai aꞌi katobeho aꞌi katokiꞌa,
Tirama nahuna namomiai katoao,
wai hanona beho mai poꞌo hanopakana aonai ṯomiaho,
ia herekiai katoea matoha bihiu kupai ꞌabakia,
16 weianai mauri ꞌabina katobawaira tina haraina.a
Keriso ena mai mue raninai au kapa,
aꞌi abeau ꞌabaea mai aꞌi aroꞌari ꞌabaea.
17 Emi aꞌikakauma akakia robekia katobaibeni Tirama herenai hauna ahanai au aruaruꞌu pekiki oioi paꞌari matoha robe ibaibeni ꞌabana.
Au kaonamo mai au wai kipokia kahaonamo haeamo.
18 Taeara ihobonai wai abomo katoaonamo mai wai au kipokia hamaonamo haeamo.
Timoteo Mai Epaprodito.
19 Obiapaka Iesu nenuatae raninai nabuabena,
Timoteo aba kauhuna kewahi heremi,
weiana au abomo poumi kaona raninai katabura.
20 Pokina hau ha ia ihobona hereꞌu ai ahaꞌi,
ia kipona mo hanona au aoꞌu eaꞌina wai keiha ꞌini harainimi.
21 Maearima ikoinai kipokia ekia nuatae tabakia titabu ia Iesu Keriso ꞌeunai ahaꞌi.
22 Ia wai toꞌiobina Timoteo hanona maearima aea homana,
ia kipona ebatohana matoha miori ha hamana ebaraina ꞌabana ebarainaꞌu,
tararua tabahamomo pou namona akana tababaina.
23 Weiana buonai eꞌu buabeni hanona taba hereꞌu ai aea perama aiho paihana,
ba ia kauhu biaina kewahi heremi.
24 Obiapaka aonai naraonana ketaina au kipoꞌu abomo aba kawahi heremi.
25 Ia au naraonana ena namo hanona uahoꞌabaka Epaprodito kauhu muena kewahi heremi,
tararua taka haeamo mai tahuari haeamo,
ia hanona wai emi iuhubeau hauna wai touhuna eꞌu nuatae akakia kebabai.
26 Ia hanona ikoimiai niraona kiꞌa bahanimi aona niaroꞌari pokina pouna tona ia hanona neinawa.
27 ꞌAbi tohana ia einawa kiꞌa herekai mo peꞌari.
Ia Tirama ehore eaokoꞌo aina ia herenai mo ahaꞌi au abomo eaokoꞌo ainaꞌu,
eꞌu ao haiara aꞌi meapaꞌua marikina.
28 Weiana buonai eꞌu nuatae apaꞌuana hanona nauhuna kewahi heremi,
weiana ia katoiha muena raninai aomi kenamo,
mai au eꞌu ao aroꞌari hanona keꞌaera.
29 Obiapaka atanai ia katoaꞌi taeana mai aonamomi,
maearima ua homakia hanona katomariki ainakia.
30 Pokina Keriso ena aka paunai herekai mo peꞌari,
ia ena mauri ereana hanona emi barai barai akana hereꞌu ai epua hauna ia ebaorena.